Islam chef

رجعتو كل الحلويات ذوقها متشابه تحت شعار "يذوب في الفم والعجينة السحرية" فقدت الحلويات ذوقها الأصلي تاع بكري ورجعت الكل نفس الذوق وكامل ذوق حلوى "الغريبية"

سيدتي المقروض اذا جاك يذوب في الفم معناها ماعرفتيش تخدميه يا اما كثرتي الدهان يا اما ناقص طياب يا اما عمرتيه فرينة وبيض. المقروض الحقيقي يجي مقرمش من برا ولداخل يجي مرمل. هذاك هو المقروض الصح ما نحطو فيه لا فرينة لا بيض لان ذوقه يتبدل. المقروض ثلاث كيلات سميد متوسط +كيلة الا صبع سمن مكملة بشوية زيت.

التشاراك اذا جاك" يذوب في الفم" معناها ما نجحلكش. التشاراك تجي فيه قرمشة تشبه العجينة المورقة محتفظ بالطراوة تقريبا يعني يجي مقرمش بصح طري شوية. التشاراك ما يجي فيه لا بيض لا حليب تشاراك ثلاث كيلات فرينة وكيلة سمن تلم بالماء زهر هذا ماكان.
تشاراك العريان يجي طري نوعا ما عكس التشاراك المسكر وفيه خاصية الترميل الي تلقايها في حلوة الطابع.

حلوة الطابع اذا جاتك تتفتت معناها خدمتيها كيما الكروكي و درتي فيها المايزينة واذا جاتك طرية بزاف معناها كثرتي البيض والزيت وخدمتيها كيما الصابلي وفي كلتا الحالتين ما نجحتلكش. حلوة الطابع كأس زيت كأس بيض كاس سكر خميرة مبشور ليمون وتلمي بالفرينة (كأس بيض يقابله زوج شكاير خميرة حلوى)

البقلاوة تجي مورقة صح بصح مش لدرجة وراقها طالعين وخارجين عن بعضهم كيما رانا نشوفوا فيهم تجي تاكليها تذبحك في قراجمك. اذا جاتك هكذا معناها راكي كثرتي المايزينة بطريقة غير معقولة والأوراق خشنتيهم بزاف احسن بقلاوة هي الي تورقيها بالسمن لان المايزينة تيبس بزاف والبقلاوة تخرج عن ذوقها الأصيل. البقلاوة يجي تورقيها بسيط مع الاحتفاظ بالطراوة.
الحلوى الوحيدة الي لازم تجي تذوب في الفم هي الغريبية فلا تجعلي كل حلوياتك غريبية. مش معناها كي حلوتك تذوب في الفم انك ماهرة العكس معناها انك عندك وصفة واحدة تبيعيها في كامل الوصفات وانك ما تعرفيش تفرقي بين خصائص الحلويات. راكي تبدلي برك في ديكور الحلويات هذا ماكان اما الذوق فكله متشابه.