Midassy

لما تحس أنك تتعب و تخدم بزاف على مشروعك لكن المبيعات ثابتة، هنا لازم تحبس وتبدّل طريقة العمل لي راك تمشي عليها

أول حاجة، ركّز على المنتجات اللي راهم يمشو مليح، إذا تبيع بزاف منتجات شوف واش من منتج يطلبوه الناس بكثرة وخلي مجهودك كامل موجه ليه..هكذا طلع مداخيلك بلا ما تتعب و تصرف بزاف

ثاني حاجة، حاول تربح الوقت قد ما تقدر، الأسئلة اللي تعاود تتكرر من الزبائن، حضّرلها ردود قصيرة وجاهزة. تقدّر حتى تدير Auto-reply ولا تشات بوت ينقص عليك الخدمة لي تتعاود. هكذا ما تعياش من نفس الحوار كل يوم.

ثالث حاجة، الزبون اللي جربك مرّة سهل أنو يرجع يشري عليك. اعرض عليه تخفيض صغير ولا ديرلو باكاج فيه منتج يكمل اللي شرى قبل. تفاصيل ممكن تبانلك بسيطة لكن راح جيبلك مبيعات إضافية

رابع حاجة، ما تبقاش محصور في قناة بيع واحدة. إذا راك تعتمد غير على إعلانات فيسبوك، جرّب تغير قناة البيع ، تيك توك مثلاً، ولا تبعث رسائل مباشرة بالواتساب للزبائن اللي شروا. حاول ما تعددش بزاف قنوات البيع ، اتوسع بلعقل و لي جيبلك مبيعات بزاف ركز عليها

وأخيراً، راقب الأرقام لي فعلاً تهمك. أي إعلان جابلك مبيعات؟ أي منتج مربح أكثر؟ هاذي المعطيات الصغيرة توريك وين تحط جهدك بلا ما تضيع

التوسع يبدأ بخطوات بسيطة وواضحة. ما تحتاجش تعقيد ولا فريق كبير. غير تعديلات صغيرة تقدر تغيّر كامل اتجاه مشروعك

هل تحتفظ بزبائنك ولا جيب زبائن جدد ؟

واش هي طرق البيع لي جابتلك مبيعات مليحة من غير السبونسور ؟

✅ علامات ضعف الـ Positioning في مشروعك:

- الزبون يسمع اسم مشروعك وما يعرفش واش تقدم بالضبط
- الناس يخلطوك مع منافسينك وما يميزوش الفرق ( مشروعك غير مميز في السوق)
-لازم تفسر بزاف قبل ما الزبون يفهم واش تقدم كقيمة
-تخسر في التسعير لأن القيمة غير واضحة( كثرة التخفيضات ، هامش ربح صغير)

❌ إذا ما عرفكش السوق وين تتموضع، حتى لو كان عندك منتج قوي راح تلقى صعوبات في البيع...

لذلك لما تطلق مشروعك مهم جدا تخدم على الـ positioning

مصطلحات متشابهة في التجارة و التسويق - الجزء 04

✅ علامات النزيف المالي في مشروعك

- ارتفاع المصاريف الشهرية بلا ما تزيد المبيعات
- إعلانات تستهلك ميزانية وما تجيبش نتائج ملموسة
تكثر من التخفيضات و تنقص هامش الربح
- يكثر الروتور ولا السلعة تتلف
- مصاريف خفية ما تتحسبش في التسعير، كيما التغليف أو مصاريف الإعلانات

❌ كل تسريب مالي صغير إذا استمر بلا مراقبة يقدر يخسر المشروع في فترة قصيرة

مصطلحات لازم تفهمها في التجارة الالكترونية - الجزء الخامس

#مصطلحات

باش تعرف إذا مشروعك نجح بعد عامو اللول ، ما تقيسش على نسبة الأرباح لي دخلتها فقط، كاين علامات على أساسها تعرف إذا راك في طريق النجاح أو لازم تغير الخطة لي مشيت عليها

🔹 نسبة الزبائن اللي رجعوا يشترو منك
إذا أكثر من 25% من زبائنك رجعو يشرو بعد أول تعامل، هذي علامة قوية أنك وفرت تجربة و خدمة مرضية لأن الزبون ما يرجعش إلا إذا كان راضي

🔹 الطلب على منتجاتك أو خدماتك يزيد من غير سبونسور كبير
إذا لاحظت أن الناس بدات تجيك عن طريق recommandations أو البحث المباشر، فهذي إشارة أن سمعتك بدات تنتشر و بنيت قاعدة مليحة لمشروعك

🔹استقرار المبيعات شهريا
ماشي شرط تحقق مبيعات خيالية، لكن المهم أنها ما تهبطش بشكل كبير فجأة. الاستقرار يعني أنك قدرت تخلق قاعدة زبائن ثابتة

🔹 نسبة الربح الصافي منتظمة
ماشي مهم أنك رجعت كل رأس المال لي صرفتو في سنة، لكن إذا المصاريف أقل من المداخيل بفارق إيجابي ثابت، فهذي علامة جيدة على بداية نجاح مالي

🔹وجود نظام عمل واضح ومكرر
إذا وليت تعرف بالضبط وش تدير كل يوم وأي مشكل يجيك تعرف كيف تحلو، هذا يعني أنك اكتسبت خبرة و راك قادر تكمل في مشروعك

🔹 عندك بيانات واضحة عن السوق والزبائن
إذا جمعت معلومات دقيقة عن الفئة اللي تشتري منك و عرفت واش تحب و واش ترفض، يعني راك عارف جمهورك المستهدف و تقدر توسع قاعدة الزبائن لي عندك على المدى الطويل

🔸 تحكم أفضل في التكاليف
إذا تعلمت وين تصرف ووين توقف، وتجنبت المصاريف الزايدة اللي ما تجيبش مردود، فهذا مؤشر أنك راك تدير المشروع بعقلية مستثمر ماشي تاجر فقط

🔹 تحسن في جودة المنتج أو الخدمة
إذا بعد عام منتجك أو خدمتك أصبحت أحسن من البداية سواء من ناحية الجودة، التغليف، أو سرعة الخدمة، فهذا مؤشر إيجابي على تطور المشروع

🔹 خطة للعام الثاني
إذا اليوم عندك خطة واضحة لما بعد العام الأول، تعرف أهدافك و منتجاتك، واستراتيجيتك، فهذا يعني أن مشروعك يمشي في طريق النجاح

من بين هذ العلامات، شحال وحدة لقيتها في مشروعك هذي السنة؟

#ميداسي