Cuisine Ramdani Farida

هذا القاطو محشي بالجلجلان مرحي مع حلوة الترك معجون بالعسل
الوصفة:
250غ مارغارين
كاس موش معمر سكر قلاص
فانيلا
2صفار بيض
2مغارف نشا ورشة ملح
الفرينة حسب العجينة ولازم تكون شوي طرية
الحشو
كمية من الجلجلان مرحي زيديه حلوة الترك ومغرف صغيرة كاكاو وخلطي مليح مع بعض من بعد بليه بشوي عسل تتحصلي على حشو متماسك شكلي كويرات من العجينة الكويرة بوزن 35غ والحشو 12غ من بعد شكليهم بالمول وطيبيهم في فرن مسخن من قبل حتى ياخذ اللون الذهبي من بعد لتخرجيه خليه يبرد وعمري الثقبة بالمعجون ولى شوكولا اختياري وبالتوفيق
ملاحظة: الجلجلان تحبي ترحيه او ديريه حب هذا اختياري

وصفة كروكي حلوة روس لي راه داير حالة في تيك توك
الوصفة لذيذة جداا نصف كأس سكر بني او عادي +نصف كأس عسل +
125غ زبدة حطيهم في كسرونة مع التحريك المستمر فوق نار هادئة وكيبدأ يغلي حطي مغرف صغيرة بكربونات وحركي شوي راح يحصل تفاعل ويتبدل اللون يولي بني فرغيه في ماعون اخر خليه حتان يبرد من بعد حطي البيضة الاولى وحركي مليح وزيدي البيضة الثانية حتى تكملي البيضة الثالثة وزيدي نصف كاس زيت نفس الكاس لكيلتي به السكر والعسل وزيدي شوي فانيلا وخلطي مليح بالخلاط الكهربائي من بعد شيحي بالفرينة مع مغرف صغيرة انتاع قهوةخميرةكيميائيّة تتحصلي على عجينة متكونش يابسة ومتكونش طرية بزاف وشكلي لحرابش تاعك وحطيهم ايطيبو وكي يخرج وهو اسخون اطليه بالمعجون انتاع المشماش من لفوق وقصي لحواشي تع كل حربوش وارحيهم وخلطيهم مع شوي كوكاو مرحي ومقلي وزيني به من فوق من بعد قطعيه وشهية طيبة تحيات Ramdani farida

وصفة الكعيكعات:
500غ فرينة
250غ سمن
شوي فانيلا
قرصة ملح
ماء زهر باش تشمخي العجينة
الطريقة:
الفرينة مع السمن دخليهم مليح مع قرصة ملح وشوي فانيلا وشمخي بماء زهر تتحصلي على عجينة طرية متكونش يابسة من بعد نحضرو
الحشو انا استعملت العقدة الطايبة لهي
كاس موش معمر سكر يتشمخ مع ربع كاس ماء زهر ونحطهم فوق النار مع مغرف زبدة كيبدأ يغلي نرميلو 3كيلات لوز او كوكاو الشيء لعند وتقعدي تحركي حتان تنشف وتولي عجينة نطفي عليها ونخليها تبرد مليح تقدري ديريها في الروبو او بواسطة كف اليد فسخيها مليح وزيديها فانيلا او قرفة تتحصلي على حشو طري وارطب من الاحسن تخليه يبات او من الصباح لعشية باش تقدري تستعمليه
من بعد جيبي العجينة لكنتي حضرتيها لازم تكون طرية شوي متكونش يابسة نوزنها كويرات 33غ والحشو 15غ
تحلي الكويرة شكل مربع من بعد تحطي الحشو ولفيها من بعد حاولي دخلي الاطراف في بعضاهم تتحصلي على كعيكعة شكل مسياسة اثقبيهم فوق كل حبة بواسطة عود الاسنان وخليهم يريحو مدة 2 ساعات او اكثر من بعد طيبيهم على نار متوسطة حوالي 15 دقيقة حتى ياخذ اللون الذهبي خرجيهم وخليهم يبردو مليح من بعد نسكرهم نوجدلهم السيرو كاس سكر
2كيسان ماء
يغلو 5دقايق ونطفي ونفرغ عليهم كاس ماء زهر نخليه يبرد مليح من بعد ندير كمية قليلة ب3حبات او4فقط نديرهم في السيرو من بعد نحطهم يقطرو ونرميهم في سكر قلاص يكون مغربل ونغطيهم مليح بالسكر نخليهم مدة 10دقايق من بعد بواسطة كف اليد نسقمهم ونحطهم ونزيد نرش عليهم شوي سكر بواسطة صفاية نخليهم يباتو من بعد نديرهم في لكسات والتزيين اختياري وشهية طيبة وبالتوفيق Ramdani farida
ملاحظة: للأمانة انا الحشو درت عيني ميزاني المهم الحبة تجي معمرة الله يبارك .
ا