Lambda Core

مساء الخير عزيزي القارئ
تعالي نتعرف النهاردة عن تطبيق عملي واقعي في حياتنا ممكن مش كلنا عارفينه واللي هيعرفه لأول مرة هيحس انه زي قدرة خارقة الإنسان توصل ليها.
النهاردة هنتكلم عن ال Non-Destructive Tests او ما تسمي بالNDTs.

الNDTs هي عملية بنقوم فيها باختيار المواد أو المعدات الي قدامنا باستخدام شوية طرق و techniques تسمحلنا إننا نعرف بعض الخصائص بدون ما ندمرها. طب تعالى نعرف اصلا ايه الفرق مابين الDestructive و الNon-Destructive tests...
بخلاف إن الإسم موضح الفرق بس أنا هستفاد ايه لما مدمرش المادة اللي عاوز اختبرها؟؟
بستفاد إن المادة دي مبقتش waste أو هدر لأن أنا بعد ما بدمرها أو أعرضها لdestructive test مبقدرش أستعملها تاني أو إني أخليها تقوم بوظيفتها بشكل سليم.

بستفاد من الNDT بردو إني أقدر أختبر المعدات وهي شغالة وبتقوم بوظيفتها وقتياً ودا طبعا بيبقي شئ مهم لأنه ممكن يكشفلنا تصرفات داخلية في المعدة وهي شغالة مثلا ممكن تكون محتاجة تتغير. ال Efficiency بتاعت الNDTs عالية لإنها سريعة في تنفيذها ودقيقة فنتائجها ودا بردو بيساعد في جانب تاني وهو ان احنا نكتشف المشاكل بشكل مبكر ودا اقتصاديا هيوفر كتير علي المدى البعيد. و بردو لما نكتشف المشاكل بدري فدا هيعلي من مستوى السلامة لأنه هيحد من المخاطر الي بتظهر اثناء استعمال المادة/المعدة.

طب احنا بردو مش فاهمين الNDT بيتم ازاي ولا هو عبارة عن ايه؟
زي ما قولنا الNDT بينقسم جواه أنواع كتير جدا من الطرق أو الاختبارات وكل طريقة مختلفة عن التانية وبتحقق هدف معين في الاختبار الي بتقدم، هنتكلم عن بعض الاختبارات المتعارف عليها و بيتم استخدامها في وقتنا الحالي:

1- Magnetic Particle Test (MP)
الاختبار دا زي ما هو واضح بيعتمد علي الخصائص المغناطيسية للمادة بشكل أساسي. بمعني انه مش هينفع تطبقه غير مع معادن في اغلب الوقت. الاختبار دا بيتم عن طريق انك بتوصل المعدن بتيار كهربي عشان يولد magnetic field و بتبدأ تحرك Electromagnet علي سطح المعدن عشان يلقط التغير في المجال المغناطيسي. طب امتى يحصل التغير دا؟ لما يبقي في عدم انتظام في سطح المعدن (بما ان المجال أصلا خارج من السطح دا ف طبيعي هتغير بتغيره). و دا بالظبط الي بيعرفنا وجود حفر أو مشاكل في السطح.

2-Liquid Penetrant Test (LP)
كان عندنا مشكلة في الاختبار الاول دا و هو انه مينفعش يتطبق غير علي مادة معدنية، ودا بالظبط الي بيحله الLP test. بنستخدم مادة معينة بيتم دهنها علي المادة و بتتساب لفترة معينة بحيث انها تتوغل في الثغرات الموجودة علي سطح المادة/المعدة و بعدين بيتم ازالتها عشان يبان الفرق بين السطح المنتظم العادي و مبين الحفر الموجودة فيه. الاختبار دا ليه اسم تاني بردو وهو الDye Penetrant test

طب احنا كل دا بردو بنتكلم عن مشاكل بتواجه "سطح" المادة ، طب ما احنا ممكن بمجرد النظر نكشف حاجات زي دا. و هو في الحقيقة كلامك مظبوط و دي بالمناسبة نوع من انواع الاختبارات المدرجة ضمن الNDTs و بيسمي بالVisual Test او Visual inspection و لكن مش دي النقطة. ساعات بيكون عدم الانظام في سطح المادة دا دقيق جدا و صعب إنك تتفحصه عن قرب بذات لو الاختبار هيتم لمساحات كبيرة من المادة.

3-Radiographic Test (RT)
في التيست دا بنبدأ نكتشف ميزة من مزايا الNDT الأساسية و هي إن إحنا ممكن نكتشف اصلا الاخطاء الموجودة في المعدة داخليا بدون ما نفتحها او نضطر أن إحنا نكسرها. التيست دا يعتبر تطبيق مباشر لاستخدام الاشعاع حيث بيتم فيه استعمال الX-Rays للمواد الرفيعة او الأقل كثافة و بنستعمل الGamma radiation للمواد الأسمك او الأكثر كثافة. المادة بتتعرض للاشعاع و بيتم وضع Recording media ورا المادة الي بيتم اختبارها. بمعني إن الإشعاع اللي انت بتعرضه للمادة دا محتاج انك تعرف ايه عدي منه و اختلاف شدته بتغير اختلاف المادة و دا عشان تعرفه محتاج حاجة زي الX-Ray Film عشان تمتص الإشعاع الخارج دا عليها. بعد ما بنلقط اسقاط الاشعاع علي الFilm بيبان عليه الثغرات، الثقوب والمشاكل الموجودة في المادة بشكل عام داخليا.
طب احنا مش عارفين بردو هو الNDTs بتفيدنا ازاي في حياتنا؟ تعالى نقول بعض الأمثلة :
- تغليف المنتجات في المصانع: المصانع بتحتاج انها تتأكد إن مفيش أي تسريب بعد ما تم تغليف المنتج عشان ميحصلوش اي اضرار قبل ما يوصل للعميل أو المستهلك. بردو بنشوف تطبيق تاني و هو إن في بعض الصناعات بيتم اختبار أجزاء المنتج قبل ما يتم تجميعها او ادخالها لعملية الانتاج عشان يطلع المنتج النهائي سليم.
- شركات توليد الطاقة: بنحتاج اننا نكتشف ايه المشاكل الموجودة في منطقة اتعمل فيها لحام قبل كدا عشان نلحق مشاكل كتير متضرش توصيل الكهرباء.
- فصل القمامة: بعض منشأت بتستخدم الNDTs كوسيلة انها تعرف ايه الMetals القابلة انها يتم استعمالها مرة تانية.
- صناعة السيارات: مثلا بيتم اختبار Pistons الموتور بما إنها من أهم أجزاء السيارة.
- صناعة الطائرات: في عملية التصنيع بيتم الكشف على المعدن المصبوب في القالب المخصص ليه بعد ما تم استخراجه عشان نتأكد إن القطع كلها لما تتركب مع بعض عشان تشكل الطيارة تبقي كلها متوافقة مع التصميم المحدد.
- السفن: بنحتاج الNDTs في إن إحنا نعرف لو فيه أماكن في السفينة اتعرضت للتآكل عشان نقوم بمعالجتها بدري.

لو فضلنا ندرج في انواع اختبارات الNDTs و تطبيقتها في حياتنا مش هنقدر نوفيها في مقالة واحدة بس الي نعرفه انها تسببت في نقلة نوعية للبشرية في مجالات كتيرة زي الي ذكرناها.

نتمني انكم تكونو استمتعتوا و إلي لقاء قريب.