Content

في 2016 صدرت حلقة بعنوان معركة اللقطاء في مسلسل صراع العروش ومعها مشهد المعركة الملحمي الذي تم تصنيفه واعتباره أعظم معركة تم عرضها على الشاشة الصغيرة وحصلت الحلقة على تقييم 9.9/10 وتم تصوير المعركة في 25 يوما وشارك فيها تقريبا 500 كومبارس و 600 من أفراد طاقم العمل و عدد من الخيول بلغ 70 حصانا.
وبعد عرض الحلقة والمعركة حصلت على 7 جوائز ايمي منها أفضل اخراج و افضل سيناريو.
قال النقاد عنها إنها حلقة سيخلدها التاريخ وخاصة مشهد مواجهة البطل وحده دون فرس أو رجال جيش كامل من الأعداء بيتقدم ناحيته فيقف البطل الهوليودي وحيدا ليقرر أن يشهر السيف ويقف في وجه الجيش وحيدا مقاتلا حتى النفس الأخير.
وفي عام 2018 صدرت رواية - باري "أنشودة سودان" - للكاتب السكندري الرائع المتميز إبراهيم أحمد عيسى وفيها مشهد ملحمي لما بيقف البطل في مواجهة جيش بعد موت كل أصحابه مقاتلا حتىا لرمق الأخير مهما كانت العواقب.
الرواية حصلت على جايزة كتارا ومن وجهة نظري كانت أجمل وأفضل رواية تاريخية اتكلمت عن بطولات المسلمين.
مشهد النهاية في الرواية ملحمي وعظيم وعبقري والرواية كلها تستحق الإشادة والجائزة.
الإقبال على الموت مقبلين واحدة من سمات وصفات المسلمين ولنا في الشخ عبد الكريم الخطابي والشيخ عز الدين القسام ومن قبلهم جميعا جليبيب الأنصاري حبيب رسول الله صلى الله عليه وسلم.
ولنا في عبد الله بن جحش مثال عدما دعى الله صادقا وقال
"يا رب! أسألك هذا اليوم، أن تلاقي بيني وبين عدو لك شديد حرجه، قوي بأسه، كافر بك، فيقتلني، ثم يبقر بطني ويجدع أنفي، ويفقأ عيني ويقطع أذني، فألقاك يا رب بهذه الصورة فإذا قلت لي يوم القيامة: لم فعل بك هذا؟ فأقول: فيك يا رب!؟"
وقد استجاب الله تعالى
في 2018 ظهر رجل كان قد اقترب على الستين وقف في مؤتمر صحفي وقال إن أعظم هدية ممكن يقدمها العدو له هو إن يقتله في الميدان
ولأنه صدق مع الله فصدقه الله.
جاء الأمر من الله سبحانه وتعالى وتحركت معدات العدو وكاميراته ودباباته ليرصد لنا ونشاهد بأعيننا رجل صدق كلمته ونرى تلك الشهادة العظيمة محطما بكل المقاييس ما جاء في أعظم عروض التلفزيون وأجمل الروايات ونرى رجل في الستين من العمر يواجه معسكر الغرب كله بثبات ورجولة محطما الرقم القياسي في الرجولة.
مشهد استشهاد مولانا وولي الله علامة فارقة في تاريخ الرجال - الرجال فقط -
@متابعين
إبراهيم أحمد عيسى

فعلا النوم سلطان فما بالك لو كان السلطان ده أسود، تعالوا نشوف حكاية النوم الأسود ده يا جماعة.

🔪اسم العمل : النوم الأسود
🔪اسم الكاتب : مروى جوهر

مش اول مره اقرأ للكاتبة مروى جوهر وأكيد مش هتكون الاخيرة.
قرأت قبل كده "سرداب قصر البارون" والنهاردة معانا رواية "النوم الأسود".
ونبدأ مع الانطباع الأخير بعد القراءة يتلخص في مطلع أغنية:
"نمت ننه طب والحب اللي بينا
مش هتكلمني سيكا مش هتدلعني سِنة
فوق لي حبة ده أنا Overdose محبة
ومشاعري لسه شابة والنار في القلب شابة"
ومحدش يسألني ليه بس هي جت معايا كده.
والخلاصة إن الرواية منعشة يمكن الرعب اللي فيها طفولي شوية وعاطفي إلى حد ما بس بصراحة القصة بسيطة ولذيذة وفيها فكرة حلوة.
طب خلونا نتكلم عن الانطباع الاول
ممكن الانطباع الأول كان مع الكلمة اللي على ظهر الرواية وهي مثيرة لكن من وجهة نظري كان في أحسن كتير.
وأما عن الغلاف وأسم الرواية فهو جيد مناسب للأجواء الموسيقية بتاعة الرواية.
ويلا بينا ندخل على البداية والمقدمة والافتتاحية.
تبدأ الرواية مع حلم قاسي وموت والد بطلة الرواية "فريدة" ونشوف تأثير الموت على قلبها وأفكارها وتكرار سؤالها عن الموت.
يمكن مكنش في أسئلة أو غموض أو جوانب الإثارة في الافتتاحية تخليني عايز انجرف مع القراءة لكن أنا كان عندي فضول للاستمرار يمكن عشان انا عرفت اسلوب الكاتبة من الرواية السابقة.
البداية مش مرعبة على قد ما كانت كئيبة ومن خلال البداية والافتتاحية دخلنا على طول إلى عقل وقلب البطلة بتاعتنا ونفسيتها.
ويلا بينا نتكلم عن الفكرة في الرواية.
فكرة العمل بكل بساطة هي الموت والحياة، الكاتبة كانت مهتمة جدا بالكلام عن الموت وما بعد الموت وتأثير الموت، من الواضح إن الكاتبة كمان كانت مركزة على دفع القارئ لقراءة رسائل الحياة.
بعض الرسائل واضحة جدا ومكتوبة بشكل مباشر يمكن زيادة عن اللزوم لدرجة أنك ممكن تحس في بعض الأحيان إن الرواية عبارة عن كتاب رسائل روحية أو دينية مع لغة عصرية ومن الواضح طبعا أن الرواية محملة بكم محترم من رسائل التوعية الرومانسية للبنات وده كان واضح كتير أوي في الحوار ما بين بطلتنا فريدة وصديقتها حنين.
ولو جبنا سيرة الحوار يبقى نتكلم عن السرد واللغة
الرواية بالكامل كانت باللغة العربية الفصحى البسيطة في الوصف والحوار دون أي تدني.
السرد في الرواية كان على لسان أو من منظور البطلة وهي "فريدة"
مفيش استعراض لغوي لكن هتلاقي اقتباسات حلوة في الرواية زي مثلا:
" الموت، تلك الكلمة التي نتحاشاها ونطلق عليها «شر»، المعنى الذي لا ندركه، الوجه الآخر للحياة، أو الحياة الأخرى التي سوف نحياها ولن نسردها أبدًا، لكنه يقينًا الحقيقة الوحيدة في هذه الحياة."
"الآن أُدرك القاعدة الوحيدة الثابتة في الحياة «لا شيء ثابت.. لا توجد ثوابت»، لذلك تعودت ألا أغتر بالفرحة أو أنغمس في الحزن، فكلاهما غير دائم،"
"القرار الأصعب على النفس هو الأصلح لها،"
"الخوف يُعلِّم السلبية، الخوف للجبناء، الخوف يحجب مُتع الحياة، بل يُوقف الحياة نفسها،"
"الموت ليس نقيض الحياة وإنما هو وجه الحياة الحقيقي بعد التخلي عن زيف الدنيا."
"الجماد أصدق من كل ابن آدم بلا شك، فليس له غرض ليكذب أو يزور الحقائق."
يمكن ملحوظ برده إن تركيز الكاتبة كان على الفكرة والرسالة أكتر من التركيز على المغامرة أو جانب الرعب.
بصراحة حبيت اللغة العربية الفصحى غير المبتذلة لكنها بشكل ما كانت موجهة للفتيات في مرحلة المراهقة أو في الجامعة يعني وده كان واضح في شخصيات العمل.
ويلا بينا على طول نتكلم عن الشخصيات.
معندناش شخصيات كتير خالص بالعكس تماما عندنا عدد صغير من الشخصيات وهم 3 شخصيات رئيسية "فريدة - حنين - يونس" وعندنا 3 مشتبه فيهم "عم سيد - دكتور صالح - دكتور قابيل"
وعشان كده رأيي إن القصة طفولية شوية معندناش شخصيات كتير ولا معيدين كتير ولا طلبه كتير في كلية التربية الموسيقية كل حاجة تم تركيزها في 6 شخصيات فقط.
كل الشخصيات مرسومة كويس بطريقة تخدم القصة والفكرة.
وهنا ممكن نتكلم عن النهاية.
النهاية كانت متوقعة ومعنديش تفسيرات كتير ليها كانت محتاجة توضيح أكتر.
بس خلوني أقول إن النهاية كانت مرضية بشكل طفولي برضه، الحقيقة تظهر والمجرم بياخد عقابه واللعنة بتتفك لكن ليه وإزاي مفيش تفاصيل مرضية كفاية.
ده طبعا ميقللش من أن العمل حلو ومناسب للفتيات والشباب في مرحلة الجامعة وأكيد ممكن ترشيح الرواية لفئة الشباب لقراءة جديدة.

#أحمدمجدي

وكان فضل الله علينا عظيم.
خلصت مسابقة شغف الكتب الموسم الرابع على جروب فنجان قهوة وكتاب ودلوقتى نقدر نرجع تاني للقراءة والمراجعة وأكيد هنبدأ نعيد نشر المراجعات ونشتغل عليها من جديد.
وتعالوا النهاردة نتكلم عن أول قراءة ليا بعد المسابقة.

🔪اسم العمل : زائر منتصف الليل
🔪اسم الكاتب : خالد أمين

مش اول مره اقرأ للكاتب خالد أمين ومش هتكون الأخيرة.
قرأت "جرائم الغراب السبعة" و"إنهم يأتون ليلا" و دلوقت معانا رواية "زائر منتصف الليل".
الانطباع الأخير بعد القراءة يتلخص في مطلع أغنية:
"غريبة الناس غريبة الدنيا ديا... اعز الناس بيتغير عليا"
الرواية حلوة يا جماعة وتنتمي لعالم الكاتب الروائي، عندنا قصة متكاملة ممتعة وترقب وأجواء قاتمة وظهور شرفي للكاتبة ناردين الصباغ.
طب خلونا نتكلم عن الانطباع الاول
الغلاف حلو أوي وكنت متحمس جدا لقراءة جديدة للكاتب المحترم وخصوصا مع الكلمات على الغلاف وفكرة البعبع.
وبمجرد ما مسكت الرواية مقدرتش اسيبها وبسببها متعشتش يوم الخميس ٢٩-٨-٢٠٢٤.
و دلوقتي معانا البداية والمقدمة والافتتاحية.
تبدأ الرواية مع صفحة أو جزء من مذكرات قدري صديق البطل أكرم وكنت بصراحة مستغلس البداية دي وحسيت انه ممكن الاستغناء عن المقدمة دي وممكن ندخل على طول على أول مشهد مع أكرم اللي بيصحى من النوم يكتشف أنه كان متخدر وان مراته وابنه اتخطفوا.
ايوه بقى هي دي البداية المنعشة المثيرة، وعلى طول نبدأ رحلة البحث عن الأسرة المخطوفة ونرجع مع ذكريات أكرم لفترة التسعينات وذكريات الطفولة ونعيش حالة من نوستالجيا أجهزة الأتاري والفيديو كاسيت و سلسلة صرخة الرعب وكل أفكار مرحلة الطفولة اللذيذة المنعشة.
ويلا بينا نتكلم عن الفكرة.
فكرة العمل هي نفس فكرة رواية إنهم يأتون ليلا، الرعب والشيطان اللي عايش جوانا والشر الخارجي الموجود ومستني لحظة أنه يتمكن من نفس بشرية.
هل الإنسان شرير بطبعه ولا هو ضحية للشر اللي جاي من بره؟
امتى ممكن الإنسان يتحول للشر؟ وليه؟ وايه هو الشيء القادر على ده؟؟
من الواضح طبعا تأثر الكاتب بفكرة المسارح والأدب العالمي والعربي ومن الواضح طبعا أن الرواية محملة بكم محترم من الرعب النفسي مع شوية تشويق وإثارة وغموض وكمان كوميديا اجتماعية بسيطة رسمت ضحكات على وشي في مشاهد وحوارات معينة.
ولو جبنا سيرة الحوار يبقى نتكلم عن اللغة
وكما العادة اللغة في العمل عربية فصحى بسيطة في السرد والوصف والحوار دون تدني في الشرح.
يمكن مفيش استعراض لغوي ولا اقتباسات عظيمة يمكن نستخرجها من الرواية لكن كان في متعة في الحكي وجاذبية في الحوار.
تركيز الكاتب كان هنا على المغامرة والمتعة منها ولا عيب في ذلك.
طبعا حبيت السباب باللغة العربية الفصحى غير المبتذلة وحبيت لغة الحوار ما بين الشخصيات في الرواية.
ويلا بينا على طول نتكلم عن الشخصيات.
معندناش شخصيات كتير خالص بالعكس تماما عندنا ٤ شخصيات رئيسية اكرم وقدري وأدهم ونسرين.
كل شخصية اترسمت بشويش وعلى نار هادية وكنت مستمتع جدا جدا وفي لحظة ما توقعت النهاية وده يمكن اللي زعلني.
ويلا نتكلم عن النهاية.
مش هقول النهاية كانت متوقعة لكنها كانت مش متماسكة ناقصه حاجة فيها جابات أو فراغات.
اينعم انا انبسطت جدا فيها وحسيت بالصدمة والتويستاية لكن كان ممكن تكون افضل واحسن من وجهة نظري.
وده طبعا ميقللش من أن العمل حلو جدا جدا وممكن ترشيحه لفئة الشباب من عشاق الرعب والمغامرة.
وأخيرا انا حبيت الرواية والكاتب ومستمر في استكشاف العالم الروائي بتاعه بشغف.

#أحمدمجدي