Car Tech

من خلال لون العادم اللي بيخرج من الشكمان تقدر أنت تحدد كل حاجة خاصة بحالة المكنة بتاعة عربيتك :-

- لو لقيت لون العادم أسود هيكون ده سببه إن فيه زيادة فى أستهلاك البنزين و إن الكربيراتير مش مظبوط أو ممكن يكون فيه تسريب فى حالة العربيات اللي بتشتغل بنظام الإنجكشن أو كمان ممكن يكون فلتر الهوا مسدود أو حساس البنزين يكون بايظ.

- لو لقيت لون العادم أبيض معنى كده إن فيه تسريب من ماء الريدياتير لغرفة الإحتراق و بيكون سبب التسريب ده تلف جوان وش السلندر أو إن فيه أعوجاج فى راس الأسطوانة نفسها و أنت ممكن تلاحظ الحكاية دي فى بداية تشغيل العربية و تسيبها مثلاّ ساعتين تلاتة كدة.

- لو لقيت لون العادم أزرق أو أبيض بس مايل للون الأزرق و ده معناه إن فيه كمية كبيرة من الزيت بتدخل غرفة الأحتراق و بيكون سبب الحكاية دي تلف واحدة من الجوانات.

- الحالة الأخيرة بقي لما تسمع صوت العادم من الشكمان و فى الحالات الطبيعية بيكون الصوت مستقر و هادي و بيستمر بنفس الدرجة إنما بقي الصوت المتقطع للعادم ده بيدل على تلف البوجيهات و إنها لازم تتغير في أقرب وقت و طبعاّ الصوت العالى للعادم ده بيدل على وجود عطل فى نظام العادم نفسه و طبعاّ في الحالة دي لازم تروح لأقرب ميكانيكي.