Electrical Works

حاجه من ضمن الحاجات اللي بتخلي مهندس الكهرباء إنه يكون بشمهندس مكتب فني او تصميم يتشتت هي عدم معرفته بعناصر المنظومه و إيه اللي بيحصل بالظبط في الشغل .. ف انا حاولت اني اعمل بوست يرتب الدنيا دي

اى مشروع ف الدنيا بيتكون من تلت أطراف رئيسية بالترتيب

١-المالك : ودا باختصار راجل عنده قرشين حب إنه يستثمرهم في بناء حاجه معينه .. الحاجه دي ممكن تكون مستشفي ممكن تكون مدرسه المهم إنه هو صاحب فكرة المشروع ومصدر الفلوس بس ميقدرش ينفذ اي طوبه ف المشاريع اللي جت في دماغه دي لأن للاسف مش بيكون عنده النقاط الفنيه أو المرجعية الفنيه اللي تخليه يقدر ينفذ فبيضطر يروح للطرفين الجايين

٢-الاستشارى: و دا بيتقسم لكذا نوع كدا .. المهم في النهاية إن أي استشاري منهم مسؤول عن إنه يحول المشروع من فكرة في دماغ المالك لرسومات نقدر ننفذها وبيعتبر داخل المشروع هو نقطة الوصل بين المالك والمقاول اللي هنتكلم عليه كمان شويه.. بنقدر من خلال الرسومات دي اقدر احط ايدي علي المشروع وأعمل المقايسة اللى من خلالها أحدد ميزانية المشروع مع المالك .. يعني علي حسب الرسومات دي والمقايسه بقول للمالك إن المشروع علي سبيل المثال هيتكلف خمسه مليون .. .
في نفس الوقت دا ببعت للمقاول بقي أكلمه وهو دا الطرف التالت
ببعتله حاجه اسمها (project package) واللى بتتمثل فى الرسومات التصميمية والمقايسة وقائمة الموردين المعتمدين ومواصفات المشروع عشان يبدأ المقاول فى مرحلة التسعير.

٣- المقاول: هو دا انت ي معلم في المشروع .. اغلب الوقت بتكون انت الشخص دا .. بتستلم الرسومات التصميمية من استشاري التصميم وبتكون انت الطرف القادر علي اخراج الرسومات التنفيذيه اللي هيستلمها منك ناس تقدر تنفذ علي طول من غير ما تسأل عن أي حاجه ..
المشروع بيتعرض ازاي بقي ..في اكتر من طريقه لكن أهمهم هم الطريقتين اللي جايين دول والنقطه التانيه تنقسم لقسمين
١-اسناد مباشر :- ودا بيبقي معناه إنك عارف بعض شركات المقاولات المميزة فتبعتلها ظرف كدا في المشروع وهي ف اغلب الأحيان هتقبله بسبب إن الإسناد المباشر اكيد بيبقي نابع عن علاقه جيده وسمعه جيده بين شركه المقاولات دي وبين أصحاب المشروع .
٢- المناقصه
و دي عشان تفهمها لازم تفتكر معايا من الافلام العربي اللي بتشوفها معني المزايده
يعني مثلا
فاكر في أي مزاد كان مثلا لو انا عارض قطعه أثرية .. الناس كانت بتفضل تزايد علي بعض دا يعرض مليون و دا اتنين مليون و دا تلاته مليون وكانت ف الاخر ترسي علي أعلي سعر ؟
المناقصه بقي العكس
بترسي علي أقل سعر .. بعد ما سعرت بنود المشروع

بعد ما بيرسى المشروع على شركه معينه
بتعمل 3 مراحل EPC

1-مرحلة ال engineering
دي بيشتغل فيها إدارة المكتب الفني .. وبيكون فيها مهندسين المكتب الفني بدأوا يعملوا الرسومات التنفيذيه اللي هناخدها وننفذ منها الشغل علي أرض الواقع.

2-مرحلة ال procurement
او بمعني آخر .. التوريدات
ودي بيشتغل فيها ال procurement engineer إنه يبدأ يتكلم مع إدارة المرحله دي ويبدأوا في شراء كل المواد اللي محتاجينها للمشروع طبقا للحصر اللي قدمه مهندس المكتب الفني .

3-مرحلة ال construction
دي باختصار مرحلة التنفيذ و دي بقي حكايتها حكايه
بس ملخص حوارها إن المشروع بنبدأ نطبقه علي أرض الواقع بالتوريدات اللي جبناها والرسومات اللي عملناها
وكدا خلاص ي عم .. كل عام وانتم بخير
بس لازم تركز ف المرحلة دى اوي لأنها بتأثر علي ال performance بتاع المشروع