drahmed.arfa

صديقي العزيز مراد ❤️

ميرنا المهدي علي مدار السنوات اللي فاتت كانت لافتة بحضورها القوي علي السوشيال و جمهورها اللي بيتوسع في مساحة الشباب من جيل زي و تواجدها في المعارض وتحط كتبها علي ساحة البوك توكرز و قدرت تعمل شخصية لنفسها في الكتابة في اتجاه معين بحيث اللي بيحب الروايات البوليسية هيترشحله اسمها أكيد علي المستوى العربي و ده مجهود شخصي لميرنا تستحق عليه الإشادة..

ولكن ده شخص ميرنا أما ال٣ روايات اللي في الصورة اللي هما ٣ كتب من سلسلة تحقيقات نوح الألفي اللي بتكتب تحت عنوانها ميرنا كتبها في سلسلة متصلة الأشخاص الأساسيين كمحققين شرطة من نوح البطل وخطيبته وصديقه قطز و زميله المتنمر صلاح بيكملوا معانا كخط أساسي بيتقاطع مع خطوط قصص الجرائم اللي بيشتغلوا عليها.

الكتابة بالعامية لا تستهويني للأسف واتفاجئت ان الروايات بالعامية ، فسمعتها أوديو بوك و ده حسن من تقبلي للروايات ، مش تقليل للكاتبة في شئ ولكن الكتابة بالعامية من وجهة نظر خاصة هي كتب مش هيتكتبلها حياة مديدة وبنت زمانها زي ما العامية بتتغير بالزمن ، بالإضافة لإن جزء من الأدب هو اللغة والتمكن منها و نقلها عن طريق التلقين في اللا وعي للقارئ فيرتفع الكاتب بالقارئ لغوياً مع استمرارية القراءة وبالتالي تحقيق هدف سامي للكتابة في حد ذاتها.

الشخصيات كانت الساخمش حاجة مبهرة تماما لكن مع تقدم السلسلة رسم الشخصيات بيتحسن وأدائها وده يمكن راجع لتطور الكاتبة نفسها مع تقدم الأعوام لكن ما زالت في مستوى متوسط.

فكرة ان نوح الألفي البطل بيتواصل مع الأرواح نتيجة حادثة في وقت مبكر من حياته ، في رأيي كانت سيئة خاصة لمحقق جرائم بوليسية ، هي بتخدم انها بتقدم صوت للضحية خلال التحقيقات لكن الصوت ده كان ممكن توفيره بطريقة تانية غير ان يكون محقق شرطة وعنده قوة الحاسة الخارقة دون ملايين البشر بتشكل استسهال مش لطيف في الأدب البوليسي.

النقطة القوية في الروايات هو الحس الفكاهي في مواضع كتير و أنها روايات خفيفة ممكن تكون رفيقة مواصلة او سفر او سهرة ، أنا متفهم الناس اللي بتشكر جداً في الرواية و يمكن كان ليهم تأثير مُحبط لما قرأت لأن التوقع كان أعلى ، متفهم أن الروايات من النوعية دي مهمة أحياناً لأنها بتضيف قراء جدد ممكن تكون بوابتهم لدخول عالم القراءة وده في حد ذاته كويس ، لأن نوعية الكتاب دي قليلة في الفترة دي و ان كان موضة كتابة الرعب اللي عمت العشر سنوات اللي فاتت بدأت تخفت وقبلها كانت موضة الكتابة والكوميديا السوداء ، فالجيل الحالي من القراء الجدد بينتمي بشكل أصيل للأدب البوليسي اللي يقدر يوفر احداث سريعة وغامضة والغاز تجذب انتباهه المتشتت دائماً.