Rahma

البنت اللي فى الصورة دي اسمها ريم ابراهيم بنت مصرية راحت الاهرامات عادي .. واتصورت عادي .. و نشرت صورتها برضو عادي .. وكل اللي عملته انها كتبت علي الصورة انها فخورة باللي عمله اجدادها .

في اقل من 24 ساعة كانت صورتها العادية دي تريند على اكس ووصلت المشاهدات ليها فوق ال5 مليون مشاهدة تخيلوا ليه ؟!

لان بدل ما يتكتب لها كلام حلو عن الاهرامات وعظمة الحضارة الفرعونية حصل عليها هجوم كبير من ناس غير مصريين قعدوا يشككوا في فكرة ان المصريين الموجودين دلوقتي مالهمش علاقة بالفراعنة وحضارتهم

وان المصريين دلوقتي اصلهم عرب ومسلمين ودول مش المصريين الاصليين اللي معروف عنهم ان اسمهم قبط في الحضارة القديمة !!

الغريب ان في عرب كمان دخلوا ينسبوا الحضارة المصرية ليهم وانها بتاعتهم

وكل من هب ودب قعد يقولك الحضارة دي بتاعتنا ؟!!

وطبعا في المقابل دخل مصريين كتير يردوا ويعلقوا بكل لغات العالم واتقلبت الصورة البسيطة دي لازمة وجدال كبير مالوش اي اساس من الصحة ومش مقصود منه غير بس الهجوم علي الهوية المصرية والتشكيك فيها

ودا ان دا علي شئ فهو ان مصر معلمة علي الكل وكل الناس نفسها يبقي عندها ربع اللي عندنا ..

واللى لازم نعمله دلوقتي اننا نواجه التشكيك اللي بيحصل دا ونعلم عيالنا كويس اوى حضارتهم ونخليهم مؤمنين بعظمة بلدهم وحضارتها عشان يعرفوا يدافعوا عنها في المستقبل اللي اكيد هيبقي الهجوم فيه اكبر من دلوقتي بكتير