Tarooo

"كان أقرب صحابها مسافرين ، بتعيط وزعلانة ولما جيت أقولها الكام كلمة المحفوظة من معلش هى دى سنة الحياة ، والصحاب بتروح وتيجى ، وكلنا حواليكى ، ردت عليا بأغرب رد انا سمعته ، قالت : " انا مش زعلانة إنها ماشية وإنها هتوحشنى ، انا زعلانة عشان معاها تفاصيلى اللى حفظتها فى ٧ سنين ، ومعنديش قوة أستنى كمان ٧ سنين على ما غيرها يحفظهم " بعدين كملت وهى بتعيط وقالت "الفرق بين أى حد قريب وأى حد عادى التفاصيل واللى حافظها ، انا لو إتصلت بحد عادى متضايقة وبقوله عمى هنا ، مش هيعرف إنى متضايقة عشان عمى ولاده صغيرين ، وابنه الصغير بينام عندى وانا ورايا إمتحان كل يوم سبت فى الكلية ومش هعرف أذاكر ، وإن النهاردة الخميس اللى بحب أسهر فيه أتفرج على المسلسل واللى ماما بتكون طابخه فيه سمك عشان بابا بيكون جاى من سفر الشغل وهو بيحبه ، وانا بكون عايزة أخرج أكل برة فى اليوم ده ومش هينفع عشان عمى هنا ، انا مضطرة أشرح نص ساعة فى تفاصيل عشان يفهموا الكلام العادى ، الناس اللى بتحبنا مش هى اللى بتفهمنا ، الناس اللى حافظينا هم اللى بيفهمونا ، وانا خسرت واحدة حفظانى" فى ناس فعلا فى حياتنا موفرين علينا شرح بالساعات ، موفرين كلام كتير ، وحجج كتيرة ، لمجرد إنهم حافظين تفاصيلك ، تفكيرك ، حياتك ومواقفك ، مش شرط يكونوا أقرب الناس ليك ، بس انت دايما بتلاقيهم فاهمين ، لا مضطر تشرح ولا تفسر ، دول تقريبا بيكونوا مركزين فى كل حاجة تخصك ، والتركيز أصله إهتمام ، والإهتمام أصله حب❤
متنسوش تشيروا المنشور

مرحبا بكل من زار صفحتنا المتواضعة