Hager Mostafa

وتظنُّ أنك خسرت، والحقيقه أنّ ما خسرته تمهيدًا لمكسب عظيم سيكافئ الله قلبك به.

وتظنُّ أنك حُرِمت، والحقُّ أنك رُحِمت..

وتظنُّ أنّ الله ابتلاك، والحقيقة أنّه نَجَّاك..

وتظنُّ أنّ الأوان قد فات، ويكون الأجمل ما هو آت.⁣..

المحايد وقت الظلم مش دايمًا بريء

في ناس كتير بتحب تقول: “أنا ماليش دعوة”، “أنا محايد”، “مش عايز أدخل نفسي في المشاكل”… لكن الحقيقة إن في مواقف معينة، الحياد فيها مش فضيلة، الحياد فيها مشاركة.

لما تشوف حد بيتظلم وتسكت، ولما تشوف كدب بيتقال على شخص وتفضل واقف تتفرج، ولما تشوف حق بيتسرق وتقرر إنك تحافظ على راحتك ومصلحتك… يبقى إنت ما بقيتش محايد، إنت اخترت جانب، حتى لو ما اعترفتش بده.

الظالم عمره ما كان أقوى من عدد الناس اللي سكتت عنه. كتير من الظلم اللي بنشوفه كل يوم ما استمرش بسبب قوة الظالم، لكن بسبب صمت المتفرجين.

في وقت الشدة، ناس كتير بتجري على الضل. يخافوا على مصالحهم، على صورتهم، على علاقاتهم. يسيبوا الشخص الصادق يواجه لوحده حملات التشويه، والافتراء، والهجوم. وبعد ما المعركة تخلص، ييجوا يقولوا: “إحنا كنا عارفين إنه مظلوم.”

طب ما كنتوا فين وقتها؟

الشجاعة مش إنك تقف مع القوي، الشجاعة إنك تقول كلمة حق لما الكل ساكت. الشجاعة إنك ترفض الظلم حتى لو مش واقع عليك شخصيًا. لأن اللي بيتفرج النهارده على ظلم غيره، ممكن بكرة يلاقي نفسه الضحية ومحدش واقف جنبه.

أسوأ حاجة مش وجود الظالم… أسوأ حاجة وجود ناس شايفة، وفاهمة، ومتأكدة من الحقيقة، ومع ذلك اختارت الصمت.

الحياد أمام الرأي المختلف شيء محترم، لكن الحياد أمام الظلم شيء تاني خالص.

لأن بين الحق والباطل مفيش منطقة رمادية… وفي لحظات معينة، السكوت بيبقى موقف، والصمت بيبقى شراكة.

✍️سلمي عرفه