NAILA Methodist Church

mp:TUSITI - 16/06/2026
Macawa ni Valenibula
ULUTAGA: Na i Sala ni Bula ni Oti na Dredre
LESONI: Jemesa 1:12-18

TIKINA KOULA: 12:
"Sa kalougata na tamata sa vosota ni sa vakatovolei, io, ni sa vakatovolei oti, ena rawata nai sala ni bula o koya sa yalataka na Turaga ki vei ira sa lomani koya."

NA KENA I VAKAMACALA
Na i vola oqo e vakarautaka ko Jemesa, na taci Jisu, me i dusidusi ni veiqaravi kei na i vakarau ni bula vaKarisito. Sa vakabibitaki kina na veivakatovolei kei na veitemaki ka ra na sotava na tamata vakabauta e na nodra veiqaravi; kei na veivakasalataki ni veiqaravi kei na veivakatataki cake me ra tudei e na nodra vakabauta.
E tekivu na noda lesoni ena nona vola ko Jemesa e dua na vosa ni yalayala; “sa kalougata na tamata sa vosota ni sa vakatovolei...” na i vakamacala oqo e vakaraitaka ni veivakararawataki (persecution) e ra sota kaya sa sala ni nodra vakalougatataki.
E vica na ka eda vulica ena lesoni oqo.
1.E bibi ena noda i lakolako ni vakabauta na “vosota”. E sega ni rawarawa se logaloga vinaka tu ga na gaunisala ni muri Jisu. Eda na daubolei, biliraki, kaseti, vakalewai kei na vuqa tale. Kakua ni ko guce se yalolailai. Ke sega ni ko rawata na vakacegu ena bula vakayago oqo, ia na i covi ni oti na bula oqo, bula tawa mudu sa bera mai.
2.E sega ni rawa ni temaki na Kalou, se me temaki keda. E vakadeitaka na nona savasava, ka biuta e dua na i vakarau ni noda temaki e sega ni vu mai Vua, e vakarautaka na vakacegu vei keda e da lako curuma na veivakatovolei e vuravura.
3.Eda sa dau temaki e na gauna e da lako sese mai na sala e da dau muria. Oqo e kaya ni veitemaki e vu mai na gagadre ni lomada, ka sega ni vu mai e na dua na ka e tautaku ni noda bula. Me da raici keda vakamatua, ka teivaka ki na lomada na nona kaukauwa na Kalou.
4.Na veisolidoli vinaka kecega e soli mai cake. Me da dau vakavinavinaka vua na Kalou e na nona lomani keda.
5.E digitaka na Kalou me da yavutaki e na veika dodonu. Na kaukauwa ka yavutaki e na kosipeli me vakasucumi keda vou tale e na veika dodonu kei na vakabauta.
6.Me da tu vakadodonu e na gauna ni veivakatovolei me vaka na tauvi mate se vakacegui mai ena cakacaka, ka me laurai na noda yalodei kei na tubu ni sa tiko ga kei keda ko Koya.
7.E rawa ni laurai na Kalou e na noda tudei ni lako sivita na veitemaki ni vuravura.
ULUTAGA ME MASULAKI:
Me’u vosota na dredre ena yalovinaka.

1) NIDA VOSOTA NA VAKATOVOLEI EDA NA RAWATA NAI SALA NI BULA.
**JEMESA 1:12 - Sa kalougata na tamata sa vosota ni sa vakatovolei, io, ni sa vakatovolei oti, ena rawata nai sala ni bula o koya sa yalataka na Turaga kivei ira sa lomani koya.

2) EDAU VERETAKI KEDA GA NA GAGADRE CA NI LOMADA.
**JEMESA : 1 : 13 - 14
[13] Ni sa dauveretaki e dua, me kakua ni kaya, Sa dauveretaki au na Kalou: ni sa sega ni dauveretaki rawa na Kalou ki na ka ca, a sa sega ni dauveretaka e dua na tamata ko koya: [14] ia sa dauveretaki na tamata yadua, ni sa vecei koya na nona garogaro ca ka bacani koya.

TINITINI
Ni da vosota rawa na noda vakatovolei mai na meca keina ca ena kauta mai na kalougata. E dusia vei keda ko Jemesa ni sa kalougata na tamata e vosota na veivakatovolei. Na vakatovolei e sega ni ka rawarawa, ia ni da vakararavi vua na Kalou ka tu dei ena vakabauta, eda na tubu vakayalo kina ka rawata na kaukauwa e lomada. Na noda vosota sa i vakadinadina ni noda lomana na Kalou ka nuitaki koya ena gauna dredre.

Nai sau ni noda vosota sai koya eda na rawata nai sala ni Bula me noda.
Ni sa oti na noda vakatovolei ka da kunei ni da yalodina tiko ga, sa yalataka na Kalou me solia vei keda na "sala ni bula." Oqo e dusia na bula tawamudu kei na noda tiko vata kei koya ena nona i serau. Na noda vosota nikua e sega ni ka wale; e tiko na kena isau levu sa vakarautaka na Kalou vei ira era lomani koya ka muria tiko na nona I vunau kecega.

Na macawa ni valenibula oqo eda sa uqeti kina meda qaravi ira na wekada tauvimate ena vosota era tiko e vale se ra curu tiko e valenibula. Vei keda talega na vesuki tu ena vau ni tauvimate meda vosota tiko ena vakabauta keina nuinui vua na Vunibula ni na ia na veisereki keina veivakabulai.

Na vakatovolei e sega ni kena iotioti na rarawa, ia e dua na sala e tuberi keda kina ki na kalougata kei na sala ni bula sa yalataka na Kalou. Meda vosota tiko ga ka vakararavi vua na Turaga ena veika kecega.

E. M. E. N. I
Me kalougata na noda vuvale vakaturaga.
(Ai katalau vakayalo ni Matakacaca)

🙏🙏

4 Rally 2026 #
🙏🙏❤️❤️