Markaz Alumni

🌙 റമദാൻ: ആത്മവിശുദ്ധിയുടെ വസന്തം

പുണ്യങ്ങളുടെ പൂക്കാലമായ വിശുദ്ധ റമദാൻ വീണ്ടും സമാഗതമായിരിക്കുന്നു. വൃതവിശുദ്ധിയിലൂടെ മനസ്സിനെയും ശരീരത്തെയും പരുവപ്പെടുത്താനും, പ്രപഞ്ചനാഥനിലേക്ക് കൂടുതൽ അടുക്കാനുമുള്ള സുദിനങ്ങളാണ് ഇനി മുന്നിൽ.
ലോകമെമ്പാടുമുള്ള വിശ്വാസികൾക്ക് ഐക്യത്തിന്റെയും കാരുണ്യത്തിന്റെയും സന്ദേശം പകരുന്ന ഈ മാസം, പ്രാർത്ഥനകളാലും സൽക്കർമ്മങ്ങളാലും ധന്യമാക്കാൻ നമുക്ക് സാധിക്കട്ടെ.

കാലം നമിക്കുന്ന കർമയോഗി; ഞങ്ങളുടെ പ്രിയപ്പെട്ട ഉപ്പയ്ക്ക്... ❤️

കേരളത്തിന്റെ തെരുവോരങ്ങളിലൂടെ സ്നേഹത്തിന്റെ തൂവെള്ള വസ്ത്രമണിഞ്ഞ്, ആത്മീയതയുടെ പരിമളം പരത്തി ഒരു നായകൻ നടന്നുനീങ്ങുകയാണ്. കേരള മുസ്ലിം ജമാഅത്ത് നയിക്കുന്ന 'കേരള യാത്ര'യുടെ പടവുകൾ ഓരോന്നായി കയറുമ്പോൾ, ആ ചുവടുകൾക്ക് പിന്നിൽ തൊണ്ണൂറ് വയസ്സിന്റെ അവശതകളില്ല, മറിച്ച് ഒരു ജനതയെ മുഴുവൻ നെഞ്ചിലേറ്റിയ കരുത്തുറ്റ ഒരു ഹൃദയമാണുള്ളത്.

സുൽത്താനുൽ ഉലമ കാന്തപുരം ഉസ്താദ്... ലോകം അദ്ദേഹത്തെ മഹാപണ്ഡിതനെന്നും നേതാവെന്നും വിളിക്കുമ്പോൾ, മർക്കസിന്റെ മുറ്റത്ത് നിന്ന് അറിവ് നുകർന്ന ഞങ്ങൾക്ക് അദ്ദേഹം ഞങ്ങളുടെ 'ഉപ്പ'യാണ്. സ്വന്തം മക്കളെപ്പോലെ ഞങ്ങളെ ചേർത്തുപിടിച്ച, ഞങ്ങളുടെ വിയർപ്പിനും കണ്ണീരിനും ഒപ്പം നിന്ന വാത്സല്യത്തിന്റെ ഹിമാലയം.

90 വയസ്സ് പിന്നിട്ട ഈ സന്ധ്യയിലും, വിശ്രമിക്കാൻ മടിക്കുന്ന ആ പാദങ്ങൾ ആർക്ക് വേണ്ടിയാണ് ഇത്രയേറെ ഓടുന്നത്? അന്തിയുറങ്ങാൻ ഇടമില്ലാത്തവന്റെ വേദനയും, അറിവ് തേടി അലയുന്നവന്റെ ദാഹവും സ്വന്തം നെഞ്ചിലെ കനലായി കൊണ്ടുനടക്കുന്നതുകൊണ്ടല്ലേ ഉപ്പാ അങ്ങേക്കിപ്പോഴും ഉറങ്ങാൻ കഴിയാത്തത്? ഓരോ യാത്രയിലും അങ്ങ് തളരുമെന്ന് ഞങ്ങൾ ഭയപ്പെടുമ്പോഴൊക്കെയും, പ്രാർത്ഥനയുടെ കരുത്തിൽ അങ്ങ് കൂടുതൽ കരുത്തനായി പുഞ്ചിരിക്കുന്നത് കാണുമ്പോൾ ഞങ്ങളുടെ കണ്ണുകൾ ഈറനണിയാറുണ്ട്.

ഒരു ആയുസ്സ് മുഴുവൻ മറ്റുള്ളവർക്കായി ഉരുകിത്തീരുന്ന മെഴുകുതിരിയായി, വഴിവിളക്കായി അങ്ങ് ജ്വലിച്ചുനിൽക്കുന്നു. മർക്കസ് എന്ന മഹാസാമ്രാജ്യം അങ്ങ് പടുത്തുയർത്തിയത് കല്ലും മണ്ണും കൊണ്ടല്ല, മറിച്ച് അങ്ങയുടെ ഓരോ തുള്ളി കണ്ണീരും പ്രാർത്ഥനയും കൊണ്ടാണ്. ആ തണലിൽ വളർന്ന ഞങ്ങൾക്ക് അങ്ങയുടെ ഈ പ്രായത്തിലെ ഓട്ടം കാണുമ്പോൾ ഹൃദയം വിങ്ങുന്നുണ്ടെങ്കിലും, ലോകത്തിന് അങ്ങ് പകർന്നുനൽകുന്ന ഈ മാനവികതയുടെ സന്ദേശം ഞങ്ങളെ അഭിമാനം കൊള്ളിക്കുന്നു.

പ്രിയപ്പെട്ട ഉപ്പാ... അങ്ങയുടെ തണൽ ഞങ്ങൾക്ക് ഇനിയും വേണം. അങ്ങയുടെ ആയുസ്സിനും ആരോഗ്യത്തിനും വേണ്ടി പ്രാർത്ഥിക്കാത്ത ഒരു നിമിഷം പോലും കടന്നുപോകുന്നില്ല. ഈ കേരള യാത്ര കേവലം ഒരു പര്യടനമല്ല, മറിച്ച് ഒരു ജനതയുടെ അതിജീവനത്തിനായുള്ള പ്രവാചകാനുരാഗിയുടെ വിപ്ലവമാണ്. ​അങ്ങയുടെ മക്കൾ, ഈ യാത്രയുടെ ഓരോ മണൽത്തരിയിലും അങ്ങയോടൊപ്പം ഹൃദയം കൊണ്ട് കൂടെയുണ്ട്.

നാഥൻ അങ്ങയെ ദീർഘകാലം കാത്തുരക്ഷിക്കട്ടെ..

സ്നേഹാദരങ്ങളോടെ,
മർക്കസ് അലുംനി സെൻട്രൽ കമ്മിറ്റി