Karpit

ឯកឧត្តម ហ៊ុន ម៉ានី អញ្ជើញបើកព្រឹត្តិការណ៍ប្រកួតបាល់ទាត់ពានរង្វាន់ SOCCER LEAGUE ឆ្នាំ២០២៦........
ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា បានអញ្ជើញជាអធិបតីពិធីបើកការប្រកួតបាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦ នៅកីឡដ្ឋានវិសាខា នារសៀល ថ្ងៃទី៦ ខែមិថុនា ឆ្នាំ២០២៦។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសម្តែងនូវសេចក្តីសោមនស្សរីករាយ នឹងកោតសរសើរចំពោះគណៈកម្មការរៀបចំការប្រកួត បាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦ ប្រព្រឹត្តិក្រោមប្រធានបទ “សាមគ្គីភាព ជាតិរឹងមាំ” ដែលជាការផ្សាភ្ជាប់ទៅនឹង ការកសាងស្មារតីជាតិនៃប្រជាជន តាមរយៈការរួបរួមសាមគ្គីជាធ្លុងមួយដរាបណាស្មារតីជាតិនៅតែមាន សាមគ្គីភាពជាតិ កាន់តែរឹងមាំ មិនមានសត្រូវណាអាចបំបែកបំបាក់ប្រទេសជាតិយើងបាននោះឡើយ។

គួរបញ្ជាក់ថា ការប្រកួតកីឡាបាល់ទាត់ពានរង្វាន់SOCCER LEAGUE លើកទី៩ ឆ្នាំ២០២៦នេះ មានការចូលរួមប្រកួតចំនួន ៦៤ក្រុម ក្នុងនោះមានប្រុស ៥៦ក្រុម និងស្រី ៨ក្រុម៕

ក្រសួងអប់រំ ចាត់វិធានការក្តៅលើសិស្សស្រីមួយក្រុម ដែលព្រួតគ្នាប្រើអំពើហិង្សា
_____________
ក្រសួងអប់រំ យុវជន និងកីឡា នៅថ្ងៃទី៦ ខែមិថុនានេះ បានចេញសេចក្តីប្រកាសព័ត៌មានជុំវិញចំណាត់ការលើករណីសិស្សស្រីមួយក្រុមមកពីវិទ្យាល័យទួលទំពូង បានព្រួតគ្នាប្រើអំពើហិង្សាលើសិស្សស្រីម្នាក់ នៃវិទ្យាល័យ ហ៊ុន សែន ប៊ុនរ៉ានី ផ្សារដើមថ្កូវ កាលពីថ្ងៃទី០៦ ខែមិថុនា នេះ។

ក្រោយកើតហេតុ ក្រសួងអប់រំ សហការជាមួយមន្ទីរអប់រំរាជធានីភ្នំពេញ គណៈគ្រប់គ្រងសាលា និងអាជ្ញាធរ បានចុះដោះស្រាយភ្លាមៗ ដោយដាក់វិធានការវិន័យធ្ងន់ៗ រួមមាន៖ ទី១៖ តម្រូវឱ្យសិស្សបង្កហេតុធ្វើកិច្ចសន្យាបញ្ឈប់សកម្មភាពហិង្សា ដោយមានការដឹងឮ និងផ្តិតមេដៃពីអាណាព្យាបាល។ ទី២៖ ដាក់ពិន័យឱ្យធ្វើពលកម្ម ឬការងារបម្រើផលប្រយោជន៍សាធារណៈក្នុងសាលា រយៈពេល ១ខែពេញ។ ទី៣៖ ប្រសិនបើនៅតែបន្តប្រព្រឹត្ត នឹងត្រូវផ្អាកការសិក្សាពី ១ ទៅ ២សប្តាហ៍ ឬបណ្តេញចេញឱ្យទៅរៀននៅសាលាផ្សេង និងអាចប្រឈមមុខនឹងផ្លូវច្បាប់បន្ថែមទៀត។

ជាមួយគ្នានេះ ក្រសួងអប់រំក៏បានណែនាំដល់គ្រប់សាលារៀន ត្រូវបង្កើនការតាមដានចរិតរបស់សិស្ស និងពង្រឹងកិច្ចសហការជាមួយអាណាព្យាបាល ដើម្បីរួមគ្នាទប់ស្កាត់អំពើហិង្សាក្នុងសាលារៀនគ្រប់ទម្រង់៕

កូរ៉េខាងជើង ប្រកាសសាងសង់នាវាចម្បាំងខ្នាតយក្សជាលើកដំបូង ដើម្បីពង្រឹងអំណាចចរចាជាមួយចិន
____________
កូរ៉េខាងជើង បានប្រកាសជាផ្លូវការនូវផែនការសាងសង់នាវាពិឃាតខ្នាតយក្ស ទម្ងន់ ១០,០០០ តោន ជាលើកដំបូងបង្អស់ ក្នុងប្រវត្តិសាស្ត្រយោធារបស់ខ្លួន។ បទបញ្ជានេះ ត្រូវបានធ្វើឡើងដោយផ្ទាល់ពីមេដឹកនាំកំពូល លោក គីម ជុងអ៊ុន ក្នុងអំឡុងពេលដែលលោកចុះត្រួតពិនិត្យសមយុទ្ធកងទ័ពជើងទឹក កាលពីពេលថ្មីៗនេះ។

ទីភ្នាក់ងារសារព័ត៌មាន ⁠Al Jazeera ក្រៅពីនាវាពិឃាតខ្នាតយក្សនេះ លោក គីម ជុងអ៊ុន ក៏បានបញ្ជាឱ្យពន្លឿនការផលិតអាវុធសម្ងាត់ក្រោមទឹក និងពង្រីកឃ្លាំងអាវុធនុយក្លេអ៊ែរផងដែរ។

អ្នកវិភាគអន្តរជាតិបានមើលឃើញថា ការបង្ហាញសាច់ដុំយោធាផ្លូវសមុទ្រនាពេលនេះ គឺជាយុទ្ធសាស្ត្រគណនាយ៉ាងច្បាស់លាស់ របស់ទីក្រុងព្យុងយ៉ាង ដើម្បីបង្កើនអំណាចចរចា មុនពេលដែលប្រធានាធិបតីចិន លោក ស៊ី ជិនភីង ធ្វើដំណើរមកដល់ទីក្រុងព្យុងយ៉ាង សម្រាប់ទស្សនកិច្ចផ្លូវការ នៅថ្ងៃចន្ទ និងថ្ងៃអង្គារ សប្តាហ៍ក្រោយនេះ៕

#កូរ៉េខាងជើង #គីមជុងអ៊ុន #នាវាពិឃាត #ចិនកូរ៉េខាងជើង #ស៊ីជិនភីង #ព័ត៌មានអន្តរជាតិ