Doppalife.com

Сахавәт йолида бирләшкән анилар
(«Ишбиләрмән аяллар» клубиға – 20 жил)

Аял гөзәлдур бәәйни баһар,
Айму асманда хиҗил боп бақар.

Тонулған сәнъәткар Турдибүви Аблизова риясәтчилигидә «Ишби-ләрмән аяллар» клуби тәрипидин уюштурулған мәрасим мәзкүр шеирий мисралар билән ечилди. Һәр жилдики әнъәнә бойичә, бийилму 8-март – Хәлиқ ара ханим-қизлар байримиға беғишланған кәчкә мәдәнийәт вә маарип саһасида әмгәк қилип келиватқан ханим-қизлар билән тиҗарәтчи анилар вә җәмийәт ишлириға өз үлүшини қошуватқан җанкөйәрләр тәклип қилинди.

Клара Шардинова рәһбәрлиги-дики «Ишбиләрмән аяллар» клубиниң әзалири Гүлҗаһан Искән-дәрова, Сара Обулова, Адаләт Насирова, Роза Җаппарова, Зоя Һез-бақиева, Мира Розиева, Халидәм Акимбек, Хатигүл Әһәт, Мая Мә-мәтбақиева, Римма Насирова, Зәйтүнәм Тохтиевалар миллий мәдә-нийитимизниң тәрәққиятиға үлүш қошқан, узун жиллар давамида пидакарлиқ хизмәт қилип келиват-қан уйғур ханим-қизлириға һөрмәт билдүрүп, уларға ахчилиқ соғилирини тәғдим қилди. Клуб әзалири Алмута шәһиридики ана тилимизда билим бериватқан мәктәпләрниң мудирлири билән устазлирини, Уйғур театриниң хадимлирини, җәмийәт ишлириға өз үлүшини қошуватқан җанкөйәр-ләрни тәбрикләп, уларниң жуқури җавапкәрлик билән атқуруватқан хизмитигә миннәтдарлиғини билдүрди.

Алмута шәһиридә паалийәт елип бериватқан «Ишбиләрмән аяллар» клубиниң қурулғиниға бийил жигирмә жил толди. Бу вақит арилиғида клуб пәқәт тәдбиркар аниларниң бирлишиш мәйдани болупла қалмай, бәлки җәмийәткә, болупму миллий мәдәнийитимиз билән маарип саһасиға дайим қол учини сунуп келиватқан сахавәтчиләр уюшмисиға айланди. Клара Шардинованиң рәислигидә, клуб әзалири жигирмә жил мабайнида көплигән изгү ишларни әмәлгә ашурупту. Муһтаҗ җанларниң дуаси билән чин көңлидин чиққан миннәтдарлиғини әң алий мукапат һесаплиғачқа, бу ишларниң һәммисини тизип көрситишни өзлириму халап кәтмәйду.
Дәсләпки қәдәмлиридин башлапла, «Ишбиләрмән аяллар клу-биниң» әзалири сахавәтлик вә хәйрихаһлиқ ишларни өзлириниң асасий нишани қилған еди. Клуб әзалири җәмийәттики һәр хил саһаларда ишлигән һәм тиҗарәт билән шуғуллинип жүргән аяллардин тәркип тапқан болсиму, уларни бирләштүрүп турған әң қиммәтлик ғайә – әл-жутқа пайдилиқ иш қилиш, миллий мәдәнийәтни, маарипни қоллаш вә ярдәмгә муһтаҗ инсанларға яр-йөләк болуш еди.

Өткән жигирмә жил давамида клуб әзалири җәмийәтниң һәр қатлимиға қол учини сунди. Меһриванлиқ вә сахавәтлик роһини асас қилған бу паалийәтләр даирисидә мүмкинчилиги чәкләнгән инсанларға, турмуш шараити төвән аилиләргә ярдәм көрситилди. Шундақ қилип, турмушта қийин-чилиққа учриғанларға турақлиқ һалда маддий вә мәнивий ярдәм көрситиш йолға қоюлди.

Ана тилимизда билим бериватқан мәктәпләрдики оқуғучиларни рәғбәтләндүрүш, устазларниң әмгигини қәдирләш – клуб паалийитиниң муһим йөнилишлириниң бири болуп кәлмәктә. Чүнки, келәчәк әвлатниң миллий роһта тәрбийилиниши, ана тилниң сақлинип қелиши дәл шу билим дәргаһлиридин башлиниду. «Ишбиләрмән аяллар» клуби қоллап-қувәтләп келиватқан саһаларниң бири – миллий мәтбуат. Миллий мәтбуатниң җәмийәттики орни алаһидә екәнлиги һәммимизгә яхши аян. Милләтниң авази болған гезит-журналларниң хәлқимизниң мәдәний-мәнивий һаятидики роли көпчиликкә мәлум. Шундақла, улар миллий сәнъитимизниң очиғи Уйғур театриниң хадимлириниму маддий һәм мәнивий җәһәттин қоллаш арқилиқ хәлқимизниң мәдәний мирасиға һөрмәт билдүрүп кәлмәктә. Қисқиси, «Ишбиләрмән аяллар» клубиниң жигирмә жиллиқ паалийити йәкүни, җәмийәт алдидики җавапкәрликни чоңқур һис қилған аялларниң ортақ тиришчан-лиғиниң нәтиҗисидур.

Җәмийәт тәрәққиятида аялларниң роли алаһидә. Милләтниң мәдәнийитини, тил вә әнъәнисини сақлап қелишта аниларниң сал-мақлиқ үлүши бар. Әйнә шу җә-һәттин қариғанда, «Ишбиләрмән аяллар» клубиниң жигирмә жиллиқ паалийити мабайнида миллий мәдәнийәтни, маарипни қоллаш, җәмийәттики меһриванлиқ вә са-хавәтлик роһини күчәйтиш охшаш изгү ишлири көпчиликкә үлгә болиду, десәк мубалиғә болмас.

Румиләм ҖӘРИПОВА.
«Азия бүгүн».
Алмута шәһири.