VALOR

දයාබර සොයුර/ සොයුරිය,
ලාංකේය දේශපාලනයේ සුවිශේෂී කාර්යභාරයක් ඉටුකළ සෝමවංශ අමරසිංහ සහෝදරයා අපෙන් සමුගෙන 2017 ජුනි 15 වන දිනට වසරක් සපිරීම සිදුවිය. 1971 ජනතා නැගිටීම සඳහා සක්‍රීය දායකත්වයක් එක්කල සෝමවංශ අමරසිංහ සහෝදරයා එදා එම අරගලයේ ආදරණීය නායකයා වූ රෝහණ විජේවීර හා එක්ව මේ රටේ දුක්විඳින හා අසරණභාවයට පත්කළ ජනතාව වෙනුවෙන් තම කාලය, ශ්‍රමය, බුද්ධිය ඇතුළු සියල්ල කැපකළේය. එමෙන්ම 87-89 අරගල වකවානුවේදීද රෝහණ විජේවීර සහෝදරයාට සමීපතම සටන් සගයා ලෙසින්ද, මිතුරා ලෙසින්ද මහත් කාර්යභාරයක් ඉටුකළේය. රෝහණ විජේවීර ඇතුළු දේශපාලන මණ්ඩලයම ඝාතනයට ලක්වන ඒ අඳුරු පැයේදී අහඹු ලෙස දිවි ගලවාගත් සෝමවංශ අමරසිංහ ලංකේය සමාජය මවිත කරමින් අළු මතින් නැගිසිටි ෆීනික්ස් පක්ෂියා මෙන් නැවතත් ලංකාවේ වමේ ව්‍යාපාරය දේශපාලනය බිමේ ඉහලින්ම ඔසවා තැබීමට සමත් විය.
සමාජ සාධාරණත්වය හා ප්‍රජාතන්ත්‍රවාදය සඳහා නව මාවතක් ඔස්සේ ගමන්කලයුතු බව පෙන්වාදුන් මෙම කෘතහස්ත දේශපාලන×යා 2015 ජුනි මාසයේදී ජනතා සේවක පක්ෂය නිර්මාණය කළේය. ලංකේය ජනතාවගේ හද ගැස්ම තේරුම්ගත් ජනතාව සමග බද්ධවිය හැකි දේශපාලන ව්‍යාපාරයක අවශ්‍යතාවය ඔහු අවධාරණය කළේය.
එහෙත් එම නව සමාජ ව්‍යාපාරය ගොඩනංවා වසරක් ගතවන මොහොතේ, එමෙන්ම ලංකේය දේශපාලන භූමියට ඔහුත් ඔහුගේ සේවයත් අවශ්‍යම මොහොතක ඔහු අපෙන් සමුගත්තේය.
වසර හැත්තෑ තුනක දිවියෙන් අඩසිය වසක් ඉක්මවූ දේශපාලන ඉතිහාසයක් ඇති මේ සොඳුරු මිනිසා මිහිමත කිසිදු නිශ්චල හෝ චංචල දේපලක් එකතු කලේ නැත. ඔහු එකතු කලේ ජනතාව හා දැණුම පමණක්ම විය.