Thetitanium.Fit

Le bodybuilding nous permet de voir l'invisible.

السلام عليكم ورحمة الله وبركاته..
بعد غياب طويل على الكتابة او اي شيء يتعلق بكمال الاجسام فقط فالسوشل ميديا على العكس فالحياة الواقعية ديالي باقي منضبط على التمرين و التغذية على قدر المستطاع بحكم العمل و المسؤوليات الكبيرة لي كاتكون على عاتق كل واحد فكايكون صعيب انك تبقى اكتيف و ديما تكتب و تحط حوايج جداد...
بطبيعة الحال هاد الوقيتة بديت فترة التضخيم لي الغرض منها ماشي اكتساب الوزن بزاف و الفات بقدر ما بغيت نجرب اشياء جديدة لي غادي نشاركها معاكم و منها ال MK677 لي الكل تكلم عليه و كل واحد عطا الراي ديالو و لكن انا غادي نعطيكم خلاصة القول عليه من خلال اربعة اسابيع من الاستعمال الى حدود كتابة هاته الاسطر وواش بصح خاصك تاخدوا او لا و واش يستاهل هاد الضجة لي دايرين عليه و شنو الايجابيات و السلبيات ديالوا و واش عندوا شي منفعة خصوصا ففترة التضخيم؟
هادشي كامل انشاء الله غادي نبارطاجيه معاكم غذا فموضوع مفصل و نشرح ليكم فيه كل حاجة بخصوص هاد المكمل..
انشاء الله غادي نحاول انني نبارطاجي معاكم هاد فترة التضخيم كاملة لانني يالاه بديت فيها و غادي نشوفوا كاملين كيفاش غادي تسالي و الخطوات كاملة لي غادي ندوزوا منها و اي شخص عندوا شي سؤال او استفسار احنا هنا للمساعدة..
نشوفكم غذا انشاء الله 🍲🍗🍲🍗👌

Put a plan, trust it.. You will see the results 👀👀

السلام عليكم ورحمة الله وبركاته
موضوع اليوم غادي يكون عبارة عن برنامج تدريبي لي شخصيا بديت كانخدم بيه مؤخرا بعدما غيرت البرنامج التدريبي العادي لي كنت خدام بيه او نقدروا نقولوا الكلاسيكي.

هاد النظام التدريبي شخصيا كايعجبني بزاف بزاف و كانلقا فيه راحتي و حتى الجسم ديالي كايطور فيه و كايرتاح فيه، النظام هو (دفع، جر، الرجلين) او PPL / PUSH PULL LEGS و من خلاله كاتخدم الجسم ديالك جوج مرات فكل ثمانية ايام كالتالي :

الأثنين : PUSH
الثلاثاء : PULL
الأربعاء : LEGS
الخميس : OFF
الجمعه : PUSH
السبت : PULL
الاحد : OFF
الاثنين : LEGS

كيفما شفتو الاسبوع فهاد البرنامج كايكون فيه 8 ايام ماشي 7، و من بعد كاتكمل الاسبوع ديالك عاوتاني بنفس النظام.

البرنامج مستخرج من كتاب خاص بنظام ال PPL ماشي اختارعتوا من راسي و كيفما قلت انا شخصيا كانرتاح فيه حيت اولا كايخليك تعاود بزاف ديال الزوايا فالجسم ديالك فنفس الاسبوع و ايضا فترة التدريب كاتكون اقصر الشي لي كايخليك تبقا مرتاح اكثر ايلا كنتي كاتخدم او كاتقرا و كاتنوض فالصباح بكري.

بالنسبة للتغذية و المكملات داكشي كايبقا لكل واحد و شنو داير فالنظام ديالو.

و السلام عليكم ورحمة الله وبركاته. 🙏🙏✅✅