Smart Tech Online Class

အခုတလော Messages ထဲခဏခဏဝင်နေတဲ့ လင့်တွေကိုဝင်လိုက်ရင်ဘာဖြစ်မလဲကြည့်ရအောင် 🚨

လင့်ကိုနှိပ်လိုက်တာနဲ့ Apk ဖိုင်တစ်ခုဒေါင်းခိုင်းပါလိမ့်မယ်။
လင့်အမျိုးမျိုး Domain အမျိုးမျိုးဖြစ်နေပေမယ့် ဆာဗာတစ်ခုထဲမလို့ဒေါင်းခိုင်းတဲ့ APK ကအတူတူပါပဲ။
အဲ့ဒီ APK ကိုဖုန်းထဲ Install လုပ်လိုက်ရင်ဘာတွေဖြစ်သွားနိုင်လဲဆက်ကြည့်ရအောင်။

ℹ️ အရင်ဦးဆုံး ဖုန်းနဲ့ဆော့ဝဲ Permission တွေအကြောင်းနည်းနည်းပြောပြပါ့မယ်။
ဆော့ဝဲတစ်ခုဟာ ဖုန်းထဲမှာ Install လုပ်လိုက်ရုံနဲ့ ဖုန်းတစ်ခုလုံးကိုမထိန်းချုပ်နိုင်ပါဘူး။
ဖွင့်လိုက်ရုံနဲ့လည်း ဖုန်းကိုသူဘာမှမလုပ်နိုင်သေးပါဘူး။
ဥပမာကိုယ့်ဓာတ်ပုံတွေ၊ ဗီဒီယိုတွေကိုသူဖတ်လို့မရသေးသလို ခိုးယူလို့မရနိုင်သေးပါဘူး။
ဆော့ဝဲတစ်ခုဟာအသုံးပြုသူထိခိုက်စေနိုင်တဲ့လုပ်ဆောင်ချက်တွေလုပ်ဖို့ဆိုရင် Permission တောင်းရပါတယ်။
ဥပမာ ဖုန်းထဲကဓာတ်ပုံနဲ့ဗီဒီယိုတွေကိုသူကဖတ်ချင်တယ်ဆိုရင် Photos, Videos ဒါမှမဟုတ် File Read/Write Permission တောင်းပါတယ်။
အဲ့ဒီ Permission ကိုဖုန်းပိုင်ရှင်ကခွင့်ပြုမှသာလျှင်သူဆက်လုပ်လို့ရမှာပါ။
ဒီနေရာမှာဓာတ်ပုံ၊ ဗီဒီယိုနဲ့ဆိုင်တဲ့ App ကအဲ့ဒီ Permission တောင်းရင်ပြဿာနာသိပ်မရှိပေမယ့် ဘာမှန်းမသိတဲ့ App တစ်ခုကတောင်းလာရင်တော့ပြဿာနာရှိသွားပါပြီ။
ဥပမာ Calculator ဆိုတဲ့ App က Contacts Permission တောင်းတာမျိုးပေါ့။
Access ရသွားတာနဲ့သူဘာဆက်လုပ်မလဲမသိနိုင်တဲ့အတွက် ကိုယ်မသိတဲ့ App တွေဆိုရင်တောင်းသမျှ Permission တိုင်း Allow မလုပ်သင့်တာပါ။
ဒါဆိုရင်ကိုယ်ကခွင့်မပြုရင် ဘယ်ဆော့ဝဲမှကိုယ့်ဖုန်းကိုထိခိုက်အောင်မလုပ်နိုင်ဘူးဆိုတာ အကြမ်းဖျင်းသိလောက်ပြီလို့ထင်ပါတယ်။

ဒါဆိုရင်အခု Apk ကရောဘာတွေလုပ်နိုင်လဲဆက်ကြည့်ရအောင်။
သူကြေငြာထားတဲ့ Permission တွေထဲကစိတ်ဝင်စားစရာကောင်းတာတွေပြောရအောင်

- android.permission.READ_PHONE_NUMBERS
ကိုယ့်ရဲ့ဖုန်းနံပါတ်ကိုရယူနိုင်ပါတယ်။
Android 8 မတိုင်ခင်ဆိုရင်တော့ ကိုယ့်ဖက်ကခွင့်ပြုပေးစရာမလိုပဲရသွားနိုင်ပါတယ်။
အဲ့ဒီနောက်ပိုင်းဖုန်းတွေမှာတော့ခွင့်ပြုပေးမှသူရနိုင်မှာပါ။

- android.permission.READ_MEDIA_IMAGES
- android.permission.READ_MEDIA_VIDEO
- android.permission.READ_MEDIA_AUDIO
ဒီသုံးခုကတော့သူ့နာမည်တွေအတိုင်းပါပဲ ဓာတ်ပုံ၊ ဗီဒီယို၊ အသံဖိုင်တွေကိုရယူနိုင်ပါတယ်။
ဒါကလည်းကိုယ့်ဖက်ကခွင့်ပြုပေးမှသူရမှာပါ။

- android.permission.WRITE_EXTERNAL_STORAGE
ကိုယ့်ဖုန်းထဲရှိသမျှ ဖိုင်အားလုံးကိုရယူနိုင်ပါတယ်။
ဒီနေရာမှာဖိုင်ဆိုတာ ဓာတ်ပုံ၊ ဗီဒီယို၊ အသံ ရှိရှိသမျှဖိုင်အကုန်ပါတယ်။
ဒါပေမယ့်လည်းကိုယ့်ဖက်ကခွင့်ပြုပေးမှရမှာပါ။
ပြီးတော့ဒီ Permission က Android 11 မတိုင်ခင်ဖုန်းတွေမှာပဲအလုပ်လုပ်မှာပါ။

- android.permission.MANAGE_EXTERNAL_STORAGE
ဒီတစ်ခုကအပေါ်က WRITE_EXTERNAL_STORAGE နဲ့အတူတူပါပဲ။
ဒါပေမယ့်သူက Android 11 နောက်ပိုင်းဖုန်းတွေအတွက်ပါ။

- android.permission.REQUEST_INSTALL_PACKAGES
ဒီကောင်ကတော့ တခြား Apk တွေကို Install လုပ်ဖို့တောင်းလာနိုင်ပါတယ်။
ဒါကလည်းကိုယ်မသိပဲ ခိုးလုပ်သွားတာမျိုးမဟုတ်ပါဘူး ကိုယ့်ဖက်ကကြည်ကြည်ဖြူဖြူ Install နှိပ်ပေးမှရမှာပါ။

- android.permission.CAMERA
ဒီကောင်ကတော့ကိုယ့်ဖုန်းကင်မရာကိုဖွင့်နိုင်ပါတယ်။
ဒါကလည်းကိုယ့်ခွင့်ပြုချက်လိုပါတယ်။

ℹ️ ဆိုတော့ဒီဆော့ဝဲအတွက်အဓိကစိတ်ဝင်စားစရာကဒီလောက်ပါပဲ။
ကိုယ့်ဖုန်းမှာ Install လိုက်ရုံနဲ့တော့ တချို့ပြောနေကြသလိုကိုယ့် Kpay အကောင့်ထဲကပိုက်ဆံတွေမပါသွားနိုင်ပါဘူး။
ဒီကောင်က Malware လည်းမဟုတ်သလို Virus လည်းမဟုတ်ပါဘူး။
အရင်ကခေတ်စားခဲ့ပိုက်ဆံချေးတဲ့ App တွေလိုဖုန်း Contacts နဲ့ SMS Permission တွေတောင်မတောင်းနိုင်ပါဘူး။
မတောင်းနိုင်တဲ့အတွက်သူမရနိုင်ပါဘူး။
သူအဓိကရနိုင်တာကဖိုင်တွေရှိပါတယ်။
ဒါပေမယ့်လည်းသတိထားရပါမယ်။

ဘာလို့လဲဆိုတော့သူ့မှာ REQUEST_INSTALL_PACKAGES ဆိုတဲ့ Permission ရှိတဲ့အတွက် မလိမ့်တပတ်နဲ့ကိုယ့်ကိုတခြား Malware ပါတဲ့ Apk တွေ Install လုပ်ခိုင်းနိုင်ပါတယ်။
ပြီးတော့အခုချိန်မှာ ဒီ Apk ပဲဒေါင်းခိုင်းပေမယ့် နောက်ကျပိုဆိုးတဲ့တခြား Apk တွေဒေါင်းခိုင်းတာမျိုးလည်းဖြစ်လာနိုင်တယ်။
အဲ့တော့အကောင်းဆုံးကတော့သူတို့ပို့လာတဲ့လင့်တွေကိုမဝင်ကြပါနဲ့။
ဝင်မိရင်လည်းအရမ်းစိတ်မပူပါနဲ့ သူတို့ဒေါင်းခိုင်းတဲ့ Apk ကိုမဒေါင်းနဲ့ပေါ့။
ဒေါင်းမိရင်လည်း Install မလုပ်နဲ့ လုပ်မိလို့ဖွင့်ဖြစ်ရင်လည်း သူတောင်းတဲ့ Permission တွေမပေးနဲ့ထပ်ဆင့် Install ခိုင်းမယ့်တခြား Apk တွေသာထပ်မသွင်းနဲ့ပေါ့လေ :3

ပြီးတော့ Apk ဆိုတာ Android ဖုန်းတွေရဲ့ Application ဖိုင်ဖြစ်ပါတယ်။
ဒါကြောင့် iOS မှာအလုပ်မလုပ်နိုင်တဲ့အတွက် iPhone သမားတွေတော့ဘာမှမဖြစ်နိုင်ပါဘူး။
ဒါပေမယ့်လည်း iOS က Android ထက်ပိုလုံခြုံတယ်လို့ပြောချင်တာမဟုတ်ပါဘူး။
ဖုန်း System တွေကလုံခြုံပါတယ် အသုံးပြုတွေကသာမလုံခြုံတာပါ 😑

Credit: Htun Win Hlaing