HLL Technology

တီႈ ဝီႇၶီႇၶၢဝ်ႇတႆး တႄႇထွမ်ႇပႃး သဵင်ဢၢၼ်ႇၶၢဝ်ႇ လႆႈယဝ်ႉ
-
ဝီႇၶီႇၶၢဝ်ႇ ၽႃႇသႃႇတႆး (http://shn.wikinews.org/) ၼႆႉ ၶဝ်ႈပႃး ၼႂ်း ၶူင်းၵၢၼ်ဝီႇၶီႇတႆး ဢၼ်ၼိုင်ႈယဝ်ႈ။ ဝီႇၶီႇၶၢဝ်ႇဢၼ်ဝႃႈၼႆႉတႄႉ ပဵၼ်ၼႃႈလိၵ်ႈၶၢဝ်ႇ ဢၼ်လွတ်ႈလႅဝ်းထၢင်ႇႁၢင်ႈ ဢၼ်လုၵ်ႉတီႈ ၾွင်ႇတေးသျိၼ်း ဝီႇၶီႇမီႇတီႇယႃႇ ပိုၼ်တၢင်ႇဝႆႉပၼ်ၼၼ်ႉယဝ်ႉ။
-
ၶူင်းၵၢၼ်ဝီႇၶီႇၶၢဝ်ႇ ၽႃႇသႃႇတႆးၼႆႉ ပေႃးဢဝ်ၼႂ်းမိူင်းဝႃႈၵေႃႈ ပဵၼ်ဢၼ်လႆႈဢွၼ်တၢင်းသုတ်းပိူၼ်ႈသေ တေႃႇထိုင်ယၢမ်းလဵဝ်ၵေႃႈ တိုၵ်ႉမီး ၽႃႇသႃႇတႆး ဢၼ်လဵဝ်ၵူၺ်း။
-
သင်ၸိူဝ်ႉဝႃႈ ၽူႈလႂ်ၽႂ် ၶႂ်ႈဢဝ် ၶၢဝ်ႇပိုၼ်ႉတီႈတၢင်ႇလႄႈသင်၊ ဢမ်ႇၼၼ် ၶႂ်ႈဢဝ်ၶၢဝ်ႇၵူႈမိူင်းမိူင်းတၢင်ႇလႄႈသင် ၸၢင်ႈႁူမ်ႈမိုဝ်းၵၼ်သေ တႅမ်ႈတၢင်ႇလႆႈ လွတ်ႈလွတ်ႈလႅဝ်းလႅဝ်းယူႇၶႃႈ။
-
ယၢမ်းလဵဝ်တႄႉၵေႃႈ လုၵ်ႉတီႈ ႁွင်ႈၵၢၼ်ၽၢႆႇဝီႇၶီႇၶၢဝ်ႇႁဝ်းၶႃႈ လႆႈတႄႇၽိုၵ်းပၼ် လုၵ်ႈဢွၼ်ႇၵူၼ်းၼုမ်ႇႁဝ်းၶဝ် တႃႇႁႂ်ႈမေႃဢၢၼ်ႇၶၢဝ်ႇဢွၵ်ႇသဵင်ၼႆလႄႈ ႁဝ်းၶႃႈ လႆႈတႄႇသႂ်ႇပႃး သဵင်မၼ်း ၼႆၶႃႈဢေႃႈ။ ပေႃး ဢမ်ႇမီးၶၢဝ်းယၢမ်းဢၢၼ်ႇလိၵ်ႈၵေႃႈ ပိုတ်ႇသဵင်မၼ်းသေ ထွမ်ႇငိၼ်းလႆႈယူႇ။ ယွၼ်ႉပိူဝ်ႈဝႃႈ တိုၵ်ႉပဵၼ် ၽွင်းၽိုၵ်းၵၼ်လႄႈ သင်ဝႃႈ သဵင်ဢၢၼ်ႇၶၢဝ်ႇမၼ်း ပႆႇတႅတ်ႈတေႃးလီၼႆၵေႃႈ ၶႅၼ်းတေႃႈ ပွင်ႇၸႂ်ပၼ်သေၵမ်း။ ၽူႈလႂ် သူင်ၽၢႆႇလႂ်ၵေႃႈ ယိၼ်းႁူမ်ၸူမ်း ႁပ်ႉတွၼ်ႈ တႃႇႁူမ်ႈမိုဝ်းၸွမ်းၵၼ်ယူႇၶႃႈ။