May author

The Midnight Under The Moon
(လနတ်သမီးနှင့်အမှောင်မိစ္ဆာသခင်)

Chapter 17

လနတ်သမီးဆုတောင်းကျောင်းဆောင်မှာ အရင်နေ့များနှင့်မတူ လူသူထူထပ်၍နေသည်။ တိုင်းသူပြည်သားများမှာလည်း အမှောင်မိစ္ဆာအန္တရာယ်မှ ကင်းလွတ်နိုင်ရန်အဆောင်ဂါထာမန္တန်များကို လာရောက်ကာအကာအကွယ်ဖြစ်ရန် လုပ်ဆောင်လိုကြသည်။ လနတ်သမီးသည် အမှောင်သခင်စုန့်မုလိန်အား သူမအတိတ်ကြေးမုံကြည့်ခဲ့ရသော ဖြစ်ရပ်မှန်ကို ပြောပြရန်ချိန်းဆိုရမည်ဟုတွေးတောရင်း ကျောင်းဆောင်အနီးတောအုပ်ထဲရှိ ပျက်စီးနေသော သူမတို့အရင်နေထိုင်ရာဝါးလုံးအိမ်လေးဘက်သို့ လမ်းလျှောက်ထွက်လာခဲ့သည်။ အိမ်နေရာသို့ရောက်သော် မြင်ကွင်းတခုမှာသူမ၏မျက်လုံးကို အဝိုင်းသားဖြစ်သွားစေပြီး ထိတ်လန့်သွားစေသည်။ အကြောင်းမှာ ပျက်စီးနေသော သူမတို့်ဝါးတဲအိမ်လေးမှာ အရင်ပုံစံအတိုင်းရှိနေသည်ကို တွေ့လိုက်ရသောကြောင့်ဖြစ်လေသည်။ ခြံဝန်းလေးထဲသို့ လမ်းလျှောက်ဝင်ကြည့်ရင်း အိမ်ထဲမှ အမှောင်သခင်စုန့်မုလိန်ထွက်လာသည်ကို တွေ့လိုက်ရသဖြင့် အံ့ဩမှင်သက်သွားလေတော့သည်။ အမှောင်သခင်သည် လနတ်သမီးကိုတွေ့သွားပြီး သူမအား အိမ်အလုံးစုံပြင်ပြီိးမှပြသရန်စီစဉ်ထားသော်လည်း ကြိုတင်သိသွားသဖြင့်အချည်းနှီးဖြစ်သွားရကြောင်း ပေါ့ပါးသောအပြုံးလေးတို့ဖြင့် ပြောလိုက်လေသည်။ လနတ်သမီးသည် အတိတ်ကြေးမုံ၌ အမှောင်သခင်၏ ဖြစ်ရပ်မှန်အလုံးစုံကို သိရှိပြီးသည့်နောက် ယခုကဲ့သို့ ပေါ့ပါးသောအပြုံးတို့ကို မြင်လိုက်ရသဖြင့် ရင်ထဲတွင် ဝမ်းနည်းမှုများဖြစ်ပေါ်လာပြီးသူမအတွက် အရာရာဖြည့်ဆည်းပေးမှုအပေါ်တွင်လည်းကြည်နူးပီတိဖြစ်ကာ အမှောင်သခင်နှင့်ပတ်သက်၍ ခံစားနေရသော အမည်မသိဝေခွဲမရသောစိတ်တို့မှာ "ချစ်ခြင်းတရား(愛)"ဖြစ်သည်ကို သေချာသိရှိသွားလေတော့သည်။ အမှောင်သခင်သည် မျက်ရည်အဝိုင်းသားဖြင့်ရှိနေသော လနတ်သမီးကို စိုးရိမ်သွားပြီး အရှေ့သို့အလျင်အမြန်သွားလိုက်ကာ အနီးကပ်ရပ်လိုက်ပြီးသူ၏လက်ဖဝါးဖြင့် လနတ်သမီး၏မျက်နှာလေးကိုညင်သာစွာကိုင်ကာ မျက်ရည်လေးများကို သုတ်ပေးလိုက်လေသည်။ မျက်ရည်တို့ကိုသုတ်ပေးလိုက်ရင်းသူမ၏မျက်နှာကို စိုက်ကြည့်နေသည့် အမှောင်သခင်အား လနတ်သမီးလည်း မော့ကြည့်ရင်း အကြည့်ချင်းတို့စုံကာ တစ်ဦးကိုတစ်ဦးချစ်ခင်စုံမက်နေကြ
သည်ကို အတည်ပြုမိလိုက်ကြသည်။

ထိုစဉ် နှစ်ဦးသားခဏငြိမ်သက်နေကြချိန် အတိတ်ကြေးမုံအကြောင်းသတိရသွားကာ လနတ်သမီးမှာအနောက်သို့ဆုတ်ပြီး ပုံမှန်အခြေအနေအတိုင်း နေလိုက်လေသည်။ တဆက်တည်းမှာပင် အမှောင်သခင်အား ၎င်း၏အတိတ်ဖြစ်ရပ်မှန်အကြောင်းကို ပြောပြလိုက်လေသည်။ အမှောင်သခင်မှာ သူ၏ဘဝအမှန်ကို ကြားသိရပြီးနောက် ထိတ်လန့်တုန်လှုပ်သွားလေသည်။ ကြမ်းတမ်းပြီး အခက်အခဲပေါင်းများစွာကြုံရသော သူ၏ဖြစ်တည်မှုသည် သေဘေးဒုက္ခခံရန် လူ့ပြည်သို့ ခေတ္တလာရသောနတ်ဘုရား၏ ဘဝအစိတ်အပိုင်းထဲမှ တစ်ခုသာဖြစ်သည်ကို ကြားသိလိုက်ရသဖြင့် ဆောက်တည်ရာမရဖြစ်ကာထွက်သွားလေသည်။ လနတ်သမီးမှာ အဝေးသို့ရှောင်တိမ်းထွက်ပြေးသွားသော အမှောင်သခင်အားတားဆီး၍ပင်မမှီဘဲ ကျန်ရစ်နေခဲ့လေသည်။ တတိုင်းမွှေး(ယွိလန်ပန်း)ပင်ရှိရာ သုံးလောကဆုံသောနေရာ၏ အမြင့်တစ်နေရာတွင် စုန့်မုလိန်သည် အချိန်ကြာမြင့်စွာဖြင့် တိတ်ဆိတ်၍နေလေသည်။ ရာသီဥတုမှာလည်း တွန်းအားတစ်ခုအလား မိုးများသည်းထန်လျက်ရှိနေသည်။ လနတ်သမီးသည် အမှောင်သခင်ကို လိုက်ရှာရင်း နောက်ဆုံး ထိုနေရာသို့ ရောက်ရှိလာလေသည်။ အတွေးများစွာက အတွင်းအားဖြင့် ထိန်းချုပ်၍မရ
နိုင်အောင်ပင် အမှောင်သခင်အား ဝါးမြိုနေလေသည်။ မိုးများစိုရွှဲနေသော အမှောင်သခင်ပေါ်သို့ ထီးလေးမိုးပေးလိုက်သောသူကို မော့ကြည့်လိုက်ရင်း လနတ်သမီးကိုတွေ့သဖြင့် ဖြူစင်သောကလေးငယ်ကဲ့သို့ဖြစ်သွားကာ ထီးကိုင်ထားသောလက်ကိုဆွဲလိုက်ပြီး လက်နှစ်ဖက်တို့ဖြင့် လနတ်သမီးခန္ဓာကိုယ်လေးကို တင်းကြပ်စွာဖက်လိုက်လေတော့သည်။ မိုးရည်စက်များနှင့်အတူ မျက်ရည်တို့မှာလည်း ရောထွေးကာ တသွင်သွင်စီးကြလာလေတော့သည်။ အမှောင်သခင်မှာ သူမအား ဆွဲဖက်လိုက်သောကြောင့် ကိုင်ထားသော ထီးမှာ ဘေးသို့လွင့်စင်သွားပြီး နှစ်ဦးသား မိုးရည်များ စိုရွှဲကုန်လေတော့သည်။အချိန်အတော်ကြာ အားပေးနှစ်သိမ့်ကာရှိနေရင်း မိုးသားတို့မှာ တိမ်ကင်းစင်ကာ အပြာနုရောင်သို့ ပြောင်းလာလေသည်။ ထိုအခါမှ အမှောင်သခင်လည်း သတိပြန်ဝင်ကာ လနတ်သမီးအားဖက်ထားသော သူ၏လက်များကို ဖြည်လျော့လိုက်ရင်း လနတ်သမီးအား ကြည့်လိုက်လေသည်။မိုးရည်များစိုရွှဲကာ အချိန်အတော်ကြာ မိမိနှင့်အတူရှိနေပေးသောကြောင့် လနတ်သမီးမျက်နှာမှာ အားမရှိနိုင်အောင် ဖြူလျော့နေသည်ကိုတွေ့လိုက်ရပြီး စိုးရိမ်သွားလေသည်။ ထို့ကြောင့် ယခုနေရာနှင့် အနီးစပ်ဆုံးဖြစ်သော အမှောင်တိုင်းပြည်သို့ခေါ်ကာ အနားယူစေရန် တွေးမိပြီး လနတ်သမီး၏ သရုပ်အမှန်မပေါ်ရန် အမှောင်အရိပ်မန္တန်ကိုရွတ်ကာ အကာအကွယ်အနေဖြင့် ဖုံးထားလိုက်ပြီး သူ၏နန်းဆောင်သို့ ခေါ်ဆောင်သွားလေသည်။
အေးစက်ကာ အမှောင်ထုများက နေရာတိုင်းတွင်ရှိနေသောကြောင့် အတွင်းအားကောင်းမွန်ပြီး အမှောင်သခင်၏ အကာအကွယ်မန္တန်ရှိနေသော လနတ်သမီးပင်အားယုတ်နေစေသော အမှောင်တိုင်းပြည်ကိုကြည့်ရင်းစုန့်မုလိန်၏ ခက်ခဲကြမ်းတမ်းမှုကို တွေးကြည့်စရာပင်မလိုလောက်အောင် စာနာမိနေလေသည်။ ခမ်းနားကြီးကျယ်လှသော အမှောင်သခင်နန်းဆောင်မှာအထီးကျန်ဆန်မှုများကိုလည်း ခံစားရလေသည်။ အမှောင်သခင်စေခိုင်းမှုကြောင့် အစေခံများက ပြင်ဆင်ပေးသည့်အဝတ်အစားကို လနတ်သမီးလည်း လဲဝတ်လိုက်လေသည်။ အမှောင်တိုင်းပြည်အဆောင်အယောင်နှင့်တမူထူးခြားစွာ လှပနေသော လနတ်သမီးကိုကြည့်ရင်းအကြည့်တို့မှာ မခွာနိုင်အောင်ဖြစ်နေလေသည်။ အစေခံများမှာ ယခုကဲ့သို့အလှအပမျိုးကို မမြင်တွေ့ဖူးသဖြင့် ချီးမွန်းစကားများဆိုရင်း အမှောင်သခင်မအရိုက်အရာအတွက် အထူးသင့်တော်ကြောင်း တီးတိုးပြောကြလေသည်။ ထိုအခါမှ အမှောင်သခင်လည်း သတိရသွားကာ လနတ်သမီးအနေခက်မည်စိုးသဖြင့် အားလုံးကို နန်းဆောင်မှထွက်ခွာစေပြီး လနတ်သမီးအား အေးဆေးစွာအနားယူစေရန် နေရာမှထွက်ခွာလာလေသည်။ အမှောင်သခင်ထွက်သွားပြီးသည့်နောက် လနတ်သမီးသည်အတော်အသင့် အနားယူပြီးသည့်နောက်တွင် အမှောင်တိုင်းပြည်၌ အကြာကြီးနေရန် မသင့်တော်သဖြင့် ထွက်ခွာရန်ပြင်ရင်း အခန်းထောင့်၌ရှိသော လေးထောင့်စားပွဲတစ်ခုပေါ်တွင် နှစ်ပိုင်းကျိုးနေသော မဟူရာဓားကိုတွေ့လိုက်ပြီး ပြန်လည်ပြုပြင်ပေးရန် သူမတွင်ရှိသော မဟူရာကျောက်ကို ထုတ်လိုက်လေသည်။ ထို့နောက် အတွင်းအားတို့ကိုစုစည်းကာ မဟူရာကျောက်ကို ဓားသွားနှင့်အတူပေါင်းစပ်စေသည်။ အတိတ်ကြေးမုံပြင်ကြည့်ရာတွင် သုံးရသော အတွင်းအားတစ်ဝက်မှာ မပြည့်ဝသေးသည်ကတစ်ကြောင်း၊ အမှောင်တိုင်းပြည်၌ရှိသောအမှောင်ဓာတ်များ၏လွှမ်းမိုးမှုကြောင့် အတွင်းအားမှာအလုံးစုံသုံးမရဖြစ်နေသည်။ အဆက်မပြတ်အတွင်းအားတို့ဖြင့် မဟူရာကျောက်ကို ဓားသွားနှင့်အတူပေါင်းစပ်ခြင်းမှာ အောင်မြင်သွားကာ ပြီးပြည့်စုံသော ဓားတစ်ချောင်းအဖြစ် အသက်ဝင်လာလေတော့သည်။ ထိုစဉ်အတွင်းအားများစွာဆုံးရှုံးသွားသဖြင့် လနတ်သမီးမှာ သွေးများအန်ထွက်လာပြီး သွေးစက်များမှာ ဓားသွားပေါ်သို့ စင်၍သွားလေသည်။ ရုတ်တရက်ဆိုသလိုပင် မဟူရာဓားမှာ လနတ်သမီး၏ သွေးများကြောင့် မူမမှန်ကာသွေးဆာနေသကဲ့သို့ သက်ဝင်လှုပ်ရှားလာပြီး လနတ်သမီးအား တိုက်ခိုက်လေသည်။ မထင်မှတ်ဘဲ မဟူရာဓား၏ တိုက်ခိုက်လာခြင်းခံရသောကြောင့် လနတ်သမီးသည် လျင်မြန်သောအမြန်နှုန်းဖြင့် ရှောင်တိမ်းလိုက်လေသည်။ သို့ရာတွင် များစွာသောအတွင်းအားဆုံးရှုံးထားသောကြောင့် လနတ်သမီးမှာ မြေပြင်ပေါ်သို့ဟန်ချက်ပြတ်ကာ လဲကျသွားလေသည်။ လဲကျနေသောလနတ်သမီးဆီသို့ မဟူရာဓားသည် အရှိန်ပြင်းစွာဦးတည်၍လာလေသည်။ လနတ်သမီးလည်း တန်ပြန်တိုက်ခိုက်နိုင်စွမ်းတို့မရှိတော့သဖြင့် မျက်လုံးအစုံတို့မှိတ်ကာရှိနေစဉ် လေအလျင်ဖြင့် အမှောင်သခင်ရောက်ရှိလာကာ လဲကျနေသော လနတ်သမီးအား လက်ဖြင့်‌ပွေ့ချီလိုက်ပြီး သူ၏ရင်ခွင်ထဲသို့ထည့်ရင်း အပေါ်စီးမှအုပ်မိုးပြီး ကျန်လက်တစ်ဖက်ဖြင့် မဟူရာဓားကို ဖမ်းဆုပ်လိုက်လေသည်။ တဆက်တည်းမှာပင် ဓားသွားအား လက်ဖြင့်ဆုပ်ကိုင်လိုက်ပြီးဆွဲချလိုက်ရာ သွေးတို့မှာ စီးကျလာလေသည်။ ထိုအခါမှ မဟူရာဓားလည်း ငြိမ်သွားလေတော့သည်။

လဲလျောင်းနေသော လနတ်သမီးသည် သတိရလာရင်းမျက်လုံးဖွင့်ကြည့်လိုက်ရာ သူမတို့၏ ဝါးလုံးအိမ်လေးဖြစ်နေသောကြောင့် အံ့ဩနေသည်။ အမှောင်တိုင်းပြည်တွင် မဟူရာဓားပြုပြင်နေသည်ကို သူမနောက်ဆုံးမှတ်မိနေသည်။ လှဲနေရာမှ ထရန်ပြင်လိုက်စဉ် သူမ၏လက်အားကိုင်ထားပြီး အိပ်ပျော်နေသော ပတ်တီးဖြင့်ရှိနေသည့် အမှောင်သခင်၏လက်ကိုတွေ့ပြီး သူမအား မဟူရာဓားအန္တရာယ်မှ ကယ်တင်လိုက်ခြင်းကို သတိပြန်ရသွားလေသည်။ လှုပ်ရှားမှုကြောင့် အမှောင်သခင်လည်းနိုးသွားကာ လနတ်သမီးသတိရလာသည်ကိုမြင်ပြီးချက်ချင်းပင်ပွေ့ဖက်လိုက်ကာ မပြောမဆိုဖြင့် မဟူရာဓားအားပြုပြင်ခြင်းအပေါ်ဒေါသထွက်ကြောင်း၊ မဟူရာကျောက်အတွက်ကြောင့် နတ်သက်တမ်းတစ်ဝက်အားအသုံးပြုပြီး အတိတ်ကြေးမုံကြည့်ခဲ့ခြင်းကို နျန့်နျန့်ဆီမှသိရှိပြီးဖြစ်ကြောင်း၊ မဟူရာဓား၏သခင်
သတ်မှတ်ခြင်းမှာ ပြင်းထန်ပြီး အရိုင်းဆန်ခြင်းကြောင့်အချိန်မှီမရောက်လာပါက လနတ်သမီးအားဆုံးရှုံးရတော့ မည့်အကြောင်းကို အလွန်စိုးရိမ်သွားသည်ဟု စေတနာဒေါသစကားတို့ဖြင့်ပြောလေသည်။ သူမအားအပူတပြင်းစိုးရိမ်ကြီးစွာပြောနေသော အမှောင်သခင်၏ နှုတ်ခမ်းတို့ကိုကြည့်ရင်း လနတ်သမီးသည် ရှေ့သို့ခန္ဓာကိုယ်ကိုင်းညွန့်လိုက်ရင်း အနမ်းခြွေလိုက်လေသည်။ အမှောင်သခင်သည် ရုတ်တရက်ဆန်သော လနတ်သမီး၏ အနမ်းကို ရလိုက်သဖြင့် စကားတို့မှာ ရပ်တန့်ကာ ခေတ္တမျှ ကြောင်သွားလေသည်။ ထို့နောက် ထိန်းချုပ်ထားသော လနတ်သမီးအပေါ်အချစ်စိတ်တို့မှာပွင့်အန်ထွက်လာကာ သူ၏လက်နှစ်ဖက်တို့ဖြင့် လနတ်သမီးမျက်နှာလေးကို ကိုင်ကာ အပေါ်နှုတ်ခမ်းဖူးလေးအား နမ်းရှုံ့လိုက်လေတော့သည်။ လနတ်သမီးလည်း အမှောင်သခင်၏ ခန္ဓာကိုယ်အား သိုင်းဖက်လိုက်ရင်း အနမ်းများခြွေကာ တစ်ဦးပေါ်တစ်ဦးထားရှိသောချစ်ခြင်းတရားကို အတည်ပြုလိုက်ကြလေသည်။

Author - May
Editor - Ivis

#လနတ်သမီးနှင့်အမှောင်မိစ္ဆာသခင်

The Midnight Under The Moon
(လနတ်သမီးနှင့်အမှောင်မိစ္ဆာသခင်)

Chapter 16

လနတ်သမီးသည် သူမအားကယ်တင်ရင်းကျိုးသွားသောအမှောင်သခင်၏မဟူရာဓားပြန်ပြင်ရန်အတွက် လိုအပ်သော မဟူရာကျောက်ကိုရှာရန် တောင်နတ််ဘုရားရှိရာကောင်းကင်ဘုံသို့ ပြန်လာခဲ့လေသည်။ တစ်နှစ်ပတ်လုံးဥတုတစ်ခုတည်းသာရှိကာ တမူထူးခြားစွာ တောင်နှစ်လုံးယှဉ်လျက်တည်ရှိနေပြီး တောင်အဝင်ဝ၌ပင် အေးစက်ပြီး နှင်းများမှာအဆက်မပြတ်ကျနေသော တောင်နတ်ဘုရားနေထိုင်ရာသို့ လနတ်သမီးတို့ ရောက်ရှိလာကြသည်။ နျန့်နျန့်မှာ ထိုအေးစက်လွန်းသောဒဏ်ကို မခံနိုင်ဘဲ လနတ်သမီးနန်းဆောင်သို့ပြန်ကာ အစီအစဉ်အရင်ဆွဲရန် ပြောလေသည်။ လနတ်သမီးမှာ လူ့ပြည်တွင်ဖြစ်ပေါ်နေသော ဒုက္ခဆင်းရဲမှာ အချိန်နှင့်အမျှအရေးကြီးကာသုံး‌လောကကပ်ဆိုးအပေါ် သက်ရောက်နိုင်သည်ကို ပြောပြပြီးလျှင် သူမတစ်ယောက်တည်းသွားပြီး နျန့်နျန့်အားစောင့်နေခိုင်းလေသည်။ နှင်းများစွာပြည့်ဖုံးနေသောတောင်နံရံကြားမှဝင်ရောက်ကာ လမ်းအဆုံးတွင် တောင်နှစ်လုံးပတ်ပတ်လည်ဝန်းရံထားသကဲ့သို့ရှိနေသော မန္တန်အစီအရင်ပြုလုပ်ထားသည့် စက်ဝိုင်းပုံမြေပြင်ပေါ်တွင် လနတ်သမီးရပ်နေလိုက်မိသည်။ ထိုစဉ် အလင်းတန်းတစ်ခုသူမအားဖြတ်သွားလိုက်ပြီး တောင်နတ်ဘုရားပေါ်လာကာ လနတ်သမီးလာရင်းအကြောင်းကို မေးလေသည်။ လနတ်သမီးသည် မဟူရာကျောက်ကိုလိုအပ်ကြောင်း လိုရင်းကိုပြောကာ တောင်နတ်ဘုရားထံ တောင်းလေသည်။ တောင်နတ်ဘုရားမှာ မဟူရာကျောက်သည် အလွန်ရှားပါးသောကျောက်မျက်ဖြစ်သည့်အားလျော်စွာ ကောင်းကင်နတ်မင်းကြီးမှလွဲ၍ မည်သူ့ကိုမှ ပေးခွင့်မရှိ‌ကြောင်းနှင့် ကောင်းကင်မင်းကြီးခွင့်ပြုမှသာလျှင် ပေးနိုင်မည်ဟုပြောကာ ပျောက်ကွယ်သွားလေတော့သည်။ တွေဝေစွာထွက်လာသောလနတ်သမီးအားနျန့်နျန့်တွေ့ပြီး စိုးရိမ်စွာမေးလေသည်။ လနတ်သမီးလည်း ဖြစ်ကြောင်းကုန်စင်ကိုပြောပြရင်း ကောင်းကင်မင်းကြီးခွင့်ပြုချက်ရရန် မည်သို့လုပ်ဆောင်ရမည်ကိုအကြပ်ရိုက်နေလေသည်။ ထိုအခါ နျန့်နျန့်သည် အတိတ်ဖြစ်ရပ်များကိုသေချာသိပါက ကောင်းကင်နတ်မင်းကြီးကို နားချနိုင်မည့်အကြောင်းအရာတစ်ခုခုကိုသိနိုင်ပြီးမဟူရာကျောက်အား ရနိုင်လောက်မည်ဟု အကြံပြုလိုက်သည်။ နျန့်နျန့်ပြောစကားကြားပြီး လနတ်သမီးလည်းအတိတ်ကြေးမုံအား ကြည့်လို့ရနိုင်သည်ကိုတွေးမိပြီး ချက်ချင်းပင်ထွက်လာခဲ့လိုက်ကြလေသည်။

အတိတ်ကြေးမုံပြင်စင်မြင့်ဆီသို့ရောက်သောအခါ လနတ်သမီးသည် စုန့်မုလိန်နှင့်ပတ်သက်သည့်အတိတ်ဖြစ်ရပ်ကိုပြသရန် တောင်းဆိုလိုက်လေသည်။ ထိုအခါကြေးမုံမှန်မျက်နှာပြင်ထက်မှအစောင့်အကြပ်၏အသံထွက်ပေါ် လာကာ အတိတ်ဖြစ်ရပ်ကိုကြည့်ရှုရာတွင် တန်ပြန်ကြေးအဖြစ် ကျင့်ကြံံထားသော အတွင်းအား နှစ်သက်တမ်းတစ်ဝက်ကိုအသုံးပြုမှသာကြည့်နိုင်မည်ဟု ပြောလိုက်လေသည်။ လနတ်သမီးသည် ထိုစကားကိုကြားပြီးလျှင်
အချိန်အတော်ကြာ သေချာစဉ်းစားလိုက်ပြီးနောက် ဆုံးဖြတ်လိုက်ကာ အတွင်းအားများကိုစုစည်းရန်ပြင်လိုက်သည်။ ထိုအရာကို နျန့်နျန့်မြင်ပြီး ထိတ်လန့်ကာအလျင်အမြန်တားလိုက်လေသည်။ ထို့နောက် လနတ်သမီးအား ထိခိုက်ဒဏ်ရာကြောင့်မသက်သာသေးသည့်အပြင်သူစိမ်းအမျိုးသားတစ်ယောက်အတွက်မိမိအတွင်းအားတစ်ဝက်ကိုအသုံးပြုပြီးပေးဆပ်ရန်မလိုကြောင်း စိုးရိမ်တကြီးပြောလေသည်။ သူမ၏ အတွင်းအားစုစည်းနေသော လက်အား တင်းကြပ်စွာဆုပ်ကိုင်ရင်း မျက်ရည်များဖြင့် တားနေသော နျန်နျန့်၏ လက်ကို ဖြေးညင်းစွာဖယ်ရင်း စုန့်မုလိန်မှာ မိမိတို့အားအကြိမ်ကြိမ် အသက်ဘေးမှကယ်ပေးသည့်အပြင် ၎င်းနှင့်ပတ်သက်သော ပဟေဠိဆန်သည့်ဖြစ်ရပ်၏
အမှန်တရားကိုလည်း သိရမည်ဖြစ်သောကြောင့် စိတ်မပူရန် ပြောလိုက်လေသည်။ ထို့နောက် အရှေ့သို့သွားကာသူမ၏အတွင်းအားတစ်ဝက်ကိုစုစည်းပြီး ကြေးမုံမှန်ကိုထိလိုက်ရာ မှန်မျက်နှာပြင်တွင် စက်ဝိုင်းသဏ္ဍာန်အလင်း
စက်ဝန်းဖြစ်ပေါ်လာပြီး ပုံရိပ်များ တဖြည်းဖြည်းပေါ်လာလေတော့သည်။

အတိတ်ကြေးမုံမြင်ကွင်း— (သုန့်ဇယ်မင်းကြီး၏ဦးရီးတော်မင်းလက်ထက်) နန်းတွင်းမိဖုရားခေါင်နန်းဆောင်တွင် မိဖုရားခေါင်ကြီးမီးဖွားနေသောကြောင့် အခြွေအရံများစွာအလုပ်ရှုပ်ရင်း ပြည့်နှက်နေသည်။ ပြည့်ဖြိုးဝင်းပသောခန္ဓာကိုယ်နှင့် သားတော်လေးတစ်ပါးဖွားမြင်လာသဖြင့် မင်းကြီးနှင့် နန်းတွင်းတစ်ခုလုံး ပျော်ရွှင်စွာရှိနေကြသည်။ ထိုအပျော်မှာ တမဟုတ်ချင်းပျောက်၍သွားလေတော့သည်။ အကြောင်းမူကား အမှောင်တိုင်းပြည်မှရင်သွေးကို လာရောက်ခေါ်ဆောင်သောကြောင့် ဖြစ်ပေသည်။ ထိုသို့သောအချက်ကြောင့် မင်းကြီးမှာ အလွန်ပင်အံဩသွားလေသည်။ အဘယ်ကြောင့်ဆိုသော် အမှောင်သခင်ကြီးမှာ မင်းကြီးနှင့် ကောင်းကင်မင်းကြီးတို့ရှေ့မှောက်တွင် ကတိကဝတ်ပြုလုပ်ခဲ့ခြင်းကြောင့်ဖြစ်သည်။ အကြောင်းမှာ အမှောင်သခင်မကြီးအတွက်လိုအပ်သော မဟူရာကျောက်မှာ ကောင်းကင်ဘုံမှမင်းကြီးနှင့် မိဖုရားခေါင်တို့အတွက် မင်္ဂလာလက်ဖွဲ့အဖြစ် ချီးမြှောက်ခဲ့ခြင်းဖြစ်သည်။ ထိုအရာကို မင်းကြီးသည် သူ၏ရင်သွေးမျိုးဆက်အန္တရာယ်ကင်းရန် အမှောင်သခင်ကြီးမှ ကောင်းကင်မင်းကြီးရှေ့မှောက်တွင် လူ့ပြည်အား အနှောင့်အယှက်တစ်စုံတစ်ရာမပေးဘဲနေထိုင်မည်ဟု ကတိပေးခိုင်းကာ မဟူရာကျောက်ကို ပေး ခဲ့ခြင်းဖြစ်သည်။ ထိုအချိန်တစ်ဆက်တည်းမှာပင် မြို့ပြင်ရှိ သာမာန်မိသားစုမှ သားယောင်္ကျားလေးတစ်ယောက် မွေးဖွားလေသည်။ ထူးခြားသည်မှာ ထိုကလေး၏လည်ပင်းတွင် ပန်းပုံစာအမှတ်ပါရှိနေပြီး မွေးကာစကပင် ငိုကြွေးခြင်းမရှိ တည်ငြိမ်လွန်းလှပေသည်။အကြောင်းမှာ ထိုကလေးသည် ရှင်သန်ခြင်းနတ်ဘုရား၏ နတ်သက်တမ်းမြင့်မားရန် လူ့ပြည်၌ သေဘေးဒုက္ခဆင်းရဲကို ခံရမည့်အတွက် မွေးဖွားလာခြင်းဖြစ်ပေသည်။ ထိုအဖြစ်မှန်ကို ကောင်းကင်နတ်မင်းကြီးမှ သိထားခြင်းဖြစ်သောကြောင့် မီးဖွားနေစဉ်အချိန်တွင်ကလေးချင်းလဲလှယ်စေလိုက်လေသည်။

ထိုသို့ ပြုလုပ်ရခြင်းအကြောင်းအရင်းမှာ သုံးလောကကပ်ဆိုးဖြစ်ချိန်ကာလတွင် လေနတ်ဘုရား၏ မိမိကိုယ်ကို စတေးခံကာ အရာအားလုံးကို ချုပ်ငြိမ်းစေခဲ့သော်လည်း အသက်ဝိညာဉ်အပိုင်းအစမှာ အမှောင်တိုင်းပြည်သို့ ကျရောက်ပြီး အမှောင်‌မိစ္ဆာဓာတ်များ၏ ဝါးမြိုခြင်းခံလိုက်ခြင်းကြောင့် နောင်တစ်ချိန်တွင်အင်အားကြီးမားလာနိုင်သည်ကို ကြိုတင်သိလိုက်သောကြောင့် ရှင်သန်ခြင်းနတ်ဘုရားအား အမှောင်တိုင်းပြည်သို့ရောက်စေကာ တားဆီးနိုင်ရန် ရည်ရွယ်သောကြောင့်ပင်ဖြစ်သည်။ ထို့ကြောင့် လနတ်သမီးအားသူမ၏ဖခင် လေနတ်ဘုရား၏လက်နက်ကို ပေးကာ ပြန်၍ဆက်သွယ်သောနည်းဖြင့် အလင်းအမှောင်စွမ်းအားထွက်ပေါ်လာစေရန် ရည်ရွယ်ခြင်းဖြစ်ပေတော့သည်။ လနတ်သမီးသည် ထိုဖြစ်ရပ်များကို ကြေးမုံမှန်ပြင်တွင်မြင်ပြီးသည့်နောက် ချက်ချင်းပင် ကောင်းကင်နတ်မင်းကြီးအား တွေ့ဆုံရန် ကောင်းကင်နန်းတော်သို့ ထွက်လာခဲ့လိုက်သည်။ ကောင်းကင်နတ်မင်းကြီးသည် လနတ်သမီး အတိတ်ကြေးမုံအား ကြည့်လာခဲ့သည်ကို ကြိုသိရှိနေလေသည်။ လနတ်သမီးနှင့်တွေ့ဆုံသောအခါ နတ်ဘုရားကျင့်စဉ်တို့မည်သည်ပူလောင်သော စိတ်ခံစားချက်များကို ဖယ်ရှားကာတည်ငြိမ်သော စွမ်းအားတို့ အမြစ်တွယ်ပြီး ကျင့်ကြံရသည့်အလျောက် လနတ်သမီး၏ ယခုတွင်ဖြစ်နေသောခံစားချက်တို့ကြောင့် တစ်ချိန်တွင် ကြီးမားသော
အန္တရာယ်ကျရောက်ကာ ဘဝအသစ်မရနိုင်ဘဲ နတ်သက်ပင်ကြွေနိုင်သည်ဟု သတိပေးလေသည်။ ထိုအခါ လနတ်သမီးသည် သူမအား ပေးအပ်သော တာဝန်ကိုအသက်ပင်ပဓာဏမထားဘဲ ကျေပွန်အောင် ထမ်းဆောင်မည်ဖြစ်ပြီး ယခု သူမပြုလုပ်နေသည့်အရာများမှာလည်းထိုအထဲမှတစ်ခုဖြစ်သောကြောင့် ကောင်းကင်နတ်မင်းကြီးခွင့်ပြုပေးပါရန် အရိုအသေပေးကာ တောင်းဆိုလိုက်လေသည်။ ကောင်းကင်မင်းကြီးလည်း မဟူရာကျောက်ရရှိနိုင်ရန် ခွင့်ပြုမိန့်ကို လနတ်သမီးအား ပေးလိုက်လေတော့သည်။ လနတ်သမီးသည် ကောင်းကင်နတ်မင်းကြီးအမိန့်ဖြင့် မဟူရာကျောက်ကို တောင်နတ်ဘုရားဆီမှတောင်းယူလိုက်ပြီးလျှင် စုန့်မုလိန်အားပေးရန် ကောင်းကင်ဘုံမှ ဆင်းလာခဲ့လိုက်သည်။ နှစ်လိုဖွယ်အပြုံးတို့နှင့် ပြည့်နှက်နေသော လနတ်သမီးကို ဖြစ်စဉ်တောက်လျှောက် ဘေးနားတွင်ရှိနေသော အကြောင်းစုံသိမြင်သည့် နျန့်နျန့်သည်ပင် အသက်ပင်မငဲ့ကာ ယခုကဲ့သို့ ကိုယ်ကျိုးစွန့်ကာ ကူညီပေးနေခြင်းကို နားမလည်နိုင်သောမျက်လုံးတို့နှင့်ကြည့်ရင်း အတူလိုက်ပါလာလေတော့သည်။

Author - May
Editor - Ivis

#လနတ်သမီးနှင့်အမှောင်မိစ္ဆာသခင်

The Midnight Under The Moon
(လနတ်သမီးနှင့်အမှောင်မိစ္ဆာသခင်)

Chapter 13

ဝါးကုတင်ထပ်ကခန္ဓာကိုယ်တစ်ခုလုံးအေးစက်ကာတောင့်ခဲနေသောစုန့်မုလိန်ကိုကြည့်ပြီးဆေးဆရာအယောင်ဆောင်အထိန်းတော်ကြီး၊ နျန့်နျန့်နှင့် လနတ်သမီးတို့မှာမည့်သို့ပြုလုပ်ရမည်မသိဖြစ်နေကြသည်။ မိစ္ဆာစွမ်းအား၏ယင်ဓာတ်များမှာ စုန့်မုလိန်၏အတွင်းအားတစ်ခုလုံးကိုဝါးမြိုရန်ကြိုးစားနေလေသည်။ အမှောင်သခင်မှာ ငယ်စဉ်အခါကပင် မိခင်၏အထူးကြပ်မတ်လေ့ကျင့်ပေးမှုကြောင့် ယင်နှင့်ယန် အတွင်းအားကိုမျှတစွာထိန်းချုပ်နိုင်သည့်တစ်ဦးတည်းသောသူဖြစ်ပေသည်။ ယခုအခါတွင် မိစ္ဆာစွမ်းအားတို့မှာ ပိုမို၍အင်အားကောင်းလာပြီး စုန့်မုလိန်အား ထိန်းချုပ်ရန်ကြိုးပမ်းနေခြင်းဖြစ်သည်။ အကြောင်းအရင်းမှာ အလင်းအမှောင်စွမ်းအားသည် သူ၏‌မိစ္ဆာစွမ်းအားမှတဆင့် အမှောင်သခင်စုန့်မုလိန်နှင့်တစ်သားတည်းဖြစ်စေကာ ထိန်းချုပ်လိုက်ပြီးလျှင် နောက်ဆုံးတွင် လောကတခွင်၌ အင်အားကြီးမားလာသည့် မိစ္ဆာအဖြစ်သို့ ရောက်ရှိမည်ဖြစ်သောကြောင့်ဖြစ်ပေသည်။ လနတ်သမီးသည် အမှောင်စွမ်းအားများဝါးမြိုခံနေရသောစုန့်မုလိန်အား သူမ၏အတွင်းအားဖြင့် ဖယ်ရှားပေးလေသည်။ ခေတ္တအကြာတွင် စုန့်မုလိန်၏ဖြူစုတ်နေသောမျက်နှာပြင်မှာ သွေးရောင်လေးများသန်းလာပြီး သတိရလာလေသည်။ လနတ်သမီးတို့လည်း ဝမ်းသာစွာဖြင့် ဆက်လက်၍ သူမ၏သန့်စင်သောအတွင်းအားဖြင့် ကုသပေးနေသည်။

ထိုအချိန်တွင် လနတ်သမီးသည် ရုတ်တရက်ဆိုသလို မူမမှန်မှုကို ခံစားလိုက်ရသည်။ သူမ၏အတွင်းအားများကို
သံလိုက်သဖွယ်စုပ်ယူနေသကဲ့သို့ ခံစားရကာ အားအင်များနည်းလာလေသည်။ အမှောင်သခင်လည်း သတိရကာ အသိစိတ်ဝင်လာပြီး သူ၏အတွင်းအားမှ လနတ်သမီးအတွင်းအားကို စုပ်ယူ‌နေသည်ကိုသိပြီး အလျင်အမြန် မိမိအတွင်းအားကိုချိတ်ပိတ်လိုက်လေသည်။ ထိုအခါမှ လနတ်သမီးလည်း သူမ၏အတွင်းအားများကို ပြန်စုစည်းလိုက်နိုင်လေတော့သည်။ အမှောင်သခင်လည်း လနတ်သမီးအား အလွန်စိုးရိမ်သွားပြီး ထိန်းမရဖြစ်ကာ ယခုကဲ့သို့ပြုလုပ်ခြင်းမှာ အသက်ကိုပင်သေစေနိုင်ကြောင်း ဒေါသဖြင့်ပြောမိသွားလေသည်။ နျန့်နျန့်မှာ လနတ်သမီးလက်အားတင်းကြပ်စွာကိုင်ထားသောအမှောင်သခင်၏လက်ကိုကြားဝင်ဖြတ်ချလိုက်ပြီး တောင့်ခဲနေသောအမှောင်သခင်အား အမြန်ကယ်တင်ရန် အရေးပေါ်ပြုလုပ်ကာ ကယ်တင်ပေးသူကို ကျေးဇူးမတင်ဘဲယခုကဲ့သို့ ဒေါသထွက်ရခြင်းကို နားမလည်ကြောင်းနှင့် အပြစ်တင်ချင်ပါက မိမိအတွင်းအားမှစုပ်ယူခြင်းဖြစ်သောကြောင့် မိမိကိုယ်ကိုသာအပြစ်တင်ရန်ပြောလိုက်လေသည်။

ထိုအခါမှ အမှောင်သခင်လည်း သူ၏အတွင်းအားမှာ အခြားသူများနှင့်မတူ တမူထူးခြားပြီးကျင့်ကြံခဲ့ရခြင်းကို သတိရသွားကာ လနတ်သမီးအား အလွန်စိတ်ပူသွားရသောကြောင့် မထိန်းနိုင်ဘဲပြောလိုက်ရခြင်းဖြစ်ပြီး အသက်ကိုပင်မငဲ့ဘဲ မိမိအားကယ်တင်ပေးသည့်အတွက် မည်သို့ကျေးဇူးဆပ်ရမည်ကို အရိုအသေပေးကာမေး
လိုက်လေသည်။ လနတ်သမီးမှ အမှောင်သခင်မှာ သူမတို့အား အကြိမ်ကြိမ်ကယ်တင်ပေးသောကျေးဇူးမှာပို၍သာသည်ဖြစ်သောကြောင့် ပြန်ပေးဆပ်ရန်မလိုအပ်ကြောင်းပြောကာ ညှိုးငယ်သောမျက်ဝန်းတို့ကိုမျက်လွှာချ၍ သူမအိပ်ဆောင်သို့နျန့်နျန့်အားခေါ်ပြီးထွက်သွားလေသည်။ ဖြစ်စဉ်တစ်လျှောက်လုံးတွင်ရှိနေသော အထိန်းတော်ကြီးမှာ လနတ်သမီးအား သေချာထပ်မံတောင်းပန်ရန်ပြောပြီး သူမဖော်စပ်ထားသော အတွင်းအားပြန်လည်ထိန်းညှိပေးသောဆေးအားသောက်စေပြီးလျှင် အနားယူစေသည်။ အမှောင်သခင်သည် အလင်းအမှောင်စွမ်းအားမှာ ပိုအင်အားကြီးလာသောကြောင့် အမြန်ပြန်ထိန်းချုပ်ရမည်ကိုတွေးမိပြီး အထိန်းတော်ကြီးပေးသောဆေးခွက်အားတစ်ချက်တည်းမော့လိုက်ပြီးလျှင် လနတ်သမီးတို့အားသေချာစောင့်ရှောက်ပေးရန်မှာကြားပြီးအမှောင်တိုင်းပြည်သို့ပြန်ရန်ထွက်လာခဲ့သည်။ အထိန်းတော်ကြီးသည် အမှောင်သခင်၏နောက်ကျောအားကြည့်ရင်း ရင်မောစွာဖြင့် သက်ပြင်းရှည်ကြီးချကာ ကျန်ရစ်နေခဲ့လေတော့သည်။

အမှောင်တိုင်းပြည်၏ကမ္ဗည်းတိုင်များထားရှိသောခန်းမဆောင်တွင် စုန့်ရန်သည် ဒူးထောက်နေပြီး နှုတ်မှလည်း
သူ၏အကြံအစည်ရှုံးနိမ့်မှုအတွက် အလင်းအမှောင်စွမ်းအားအား တောင်းပန်၍နေသည်။ အလင်းအမှောင်
စွမ်းအားမှာ စုန့်ရန်အားထပ်မံ၍ရှုံးနိမ့်ပါက အသက်ပင်ပေးဆပ်ရမည်ဟုပြောပြီး ပျောက်ကွယ်သွားလေသည်။
စုန့်ရန်မှာ အလင်းအမှောင်စွမ်းအား၏ သူမတူစွမ်းအားကိုလက်ခံနိုင်ရန် မိမိတွင်အမှောင်စွမ်းအားကျင့်စင်သာရှိ
သောကြောင့် အလင်းစွမ်းအားကိုလက်ခံနိုင်စွမ်းမရှိဖြစ်နေသည်။ ထို့ကြောင့် လနတ်သမီး၏ သန့်စင်သောကျင့်စဥ်နှင့်ဝိညာဉ်စွမ်းအားကိုရယူရန်လုပ်ရာတွင် ရှုံးနိမ့်ခဲ့ခြင်းအပေါ်မချိတင်ခဲဖြစ်ကာဒေါသထွက်နေသည်။ ထိုစဉ်သူ၏အနောက်မှ အမှောင်စွမ်းအားတစ်ခု၏တိုက်ခိုက်ခြင်းကိုခံလိုက်ရပြီး ကမ္ဗည်းတိုင်များဘက်သို့လွင့်စင်သွားခဲ့သည်။ လဲကျနေရာမှပြန်တိုက်ခိုက်ရန်ထလိုက်ရာ တိုက်ခိုက်လာသူမှာ အမှောင်သခင်ဖြစ်နေသည်ကို တွေ့ပြီး အားနည်းဟန်ဆောင်ကာ ဒူးထောက်ဦးညွတ်လိုက်သည်။ အမှောင်သခင်မှာဆက်ပြီး စုန့်ရန်အား အမှောင်စွမ်းအားဖြင့်အပြစ်ပေးလိုက်သည်။ နှုတ်မှလည်း အလင်းအမှောင်စွမ်းအားထပ်မံထွက်ပေါ်လာခြင်းကို အသိမပေးသည့်အပြင် လူ့ပြည်၌ ထိုစွမ်းအားကို ခေါ်ထုတ်ပြလာခြင်းမှာ သုံးလောကစစ်ပွဲထပ်ဖြစ်ပွားရန်လမ်းကိုစတင်နေခြင်းဖြစ်နေသည်ဟုပြောလိုက်သည်။ စုန့်ရန်လည်း အမှောင်သခင်၏ခြေထောက်အောက်တွင် အရိုအသေပေးကာ အလင်းအမှောင်စွမ်းအားသည် ယခုကဲ့သို့ ကြီးမားသောစွမ်းအားဖြစ်နေခြင်းကို မသိကြောင်းနှင့် အမှောင်သခင်အားလည်း မထီမဲ့မြင်ပြုလုပ်ရခြင်းမဟုတ်ကြောင်းပြောလေသည်။ သို့သော် အလင်းအမှောင်စွမ်းအားထွက်ပေါ်လာခြင်းမှာ အမှောင်တိုင်းပြည်အတွက် သုံးလောကကိုအုပ်စိုးနိုင်မည့် တစ်ခုတည်းသောစွမ်းအားဖြစ်သောကြောင့် မည်သူ့ကိုမှ ကြောက်ရွံ့စရာမလိုတော့ကြောင်း ပြောလိုက်သည်။
အမှောင်သခင်လည်း သူ၏လက်ထက်တွင် အမှောင်တိုင်းပြည်မှာ သုံးလောကအားပေးခဲ့သောကတိအားတည်စေပြီး သူ့နေရာနှင့်သူအေးချမ်းစွာတည်ရှိနေမှုကို လိုလားသည်။ အလင်းအမှောင်စွမ်းအားဖြင့်သုံးလောကကိုအုပ်စိုးပါလိုက်ပါက ၎င်းစွမ်းအားသည် အငြိုးကြီးစွမ်းအားဖြစ်သည့်အလျောက် အမုန်းအာဃာတများမှတဆင့် မိစ္ဆာစွမ်းအားများမှာပိုမိုအားကောင်းလာပြီး သုံးလောကကိုပျက်စီးစေလိမ့်မည်ဟုပြောလိုက်လေသည်။သို့ရာတွင် ထိုအချက်မှာ စုန့်ရန်လိုလားသောအချက်ပင်ဖြစ်သည်။ စုန့်ရန်လည်း သူ၏မျက်နှာအမူအရာကိုပြင်လိုက်ပြီး အမှောင်သခင်အားဦးညွတ်လိုက်ကာ မိမိမှာအတွေးတိမ်သွားသောကြောင့်အမှားကျူးလွန်ခြင်းဖြစ်သဖြင့်အပြစ်ပေးရန်ပြောလိုက်သည်။ အမှောင်သခင်သည် စွမ်းအားချိတ်ပိတ်မန္တန်ဖြင့် စုန့်ရန်၏အတွင်းအားကိုချိတ်ပိတ်လိုက်ကာ မိစ္ဆာသခင်တို့၏ကမ္ဗည်းတိုင်ခန်းမဆောင်အတွင်းတွင် လူ့ပြည်၌အခြေအနေငြိမ်သက်သည့်အချိန်အထိ အမှားပြန်သုံးသပ်နေရန်အပြစ်ပေးလိုက်ပြီး စုန့်ရန်အပြင်မထွက်နိုင်အောင် ခန်းမဆောင်တစ်ခုလုံးကိုချိတ်ပိတ်လိုက်လေတော့သည်။

စုန့်ရန်အားအပြစ်ပေးပြီးနန်းဆောင်သို့ပြန်လာနေစဉ် မိမိနှင့်ညီဖြစ်သူတို့ဓားသိုင်းလေ့ကျင့်နေသောနေရာသို့အ ရောက် ခေတ္တရပ်ကာ အတိတ်မှဖြစ်ရပ်တို့ဆီသို့ အတွေးရောက်သွားခဲ့သည်။ ယခုကဲ့သို့အပြစ်ပေးနည်းမှာပြင်းထန်သော်လည်း အမှားကိုပြန်လည်ပြင်ဆင်စေခြင်းနှင့် သူ၏ညီအားအန္တရာယ်ကင်းစေရန်ရည်ရွယ်သောကြောင့် စုန့်ရန်အား သနားညှာတာစိတ်ကိုဖျောက်ကာ စိတ်အားတင်း၍ သူ၏နန်းဆောင်သို့ပြန်လာခဲ့လေသည်။ အမှောင်သခင်သည် နန်းဆောင်အလည်တည့်တည့်ရှိစားပွဲပေါ်သို့ နှစ်ပိုင်းကျိုးနေသောမဟူရာဓားကိုတင်လိုက်ပြီး ဝမ်းနည်းစွာဖြင့်ထိကိုင်ကြည့်နေမိသည်။ ထိုဓားမှာ အမှောင်သခင်ရာထူးဆက်ခံရာတွင် မိခင်မှအထူးပြုလုပ်ပေးထားသောဓားဖြစ်သည့်အလျောက် ပြန်ပြုပြင်ရန်ခက်ခဲလှပေသည်။ အဘယ်ကြောင့်ဆိုသော်မဟူရာဓားပြုလုပ်ရာတွင် အလွန်ရှားပါးပြီးတွေ့ရခဲသောတောင်မှရသည့် သန့်စင်လှသောမဟူရာကျောက်တစ်မျိုးပါဝင်ပေသည်။ ထိုမဟူရာကျောက်မှာ အပြုသဘောဆောင်သည့်အစွမ်းသတ္တိရှိပြီး စိတ်နှင်ကိုယ်ကိုဟန်ချက်ညီစေရန်ထိန်းညှိပေးနိုင်သည့်စွမ်းအင်ရှိသည့်ကျောက်တစ်မျိုးဖြစ်သည်။ ထို့အပြင် မဟူရာကျောက်ကိုဝတ်ဆင်ထားပါကလည်း စိတ်ဝိညာဉ်ကိုသန့်စင်စေသည်။ အမှောင်သခင်၏မိခင်မှာ သာမာန်လူဖြစ်သည့်အလျောက် အမှောင်တိုင်းပြည်၏မိစ္ဆာဓာတ်များဒဏ်ခံနိုင်ရန် အရင်အမှောင်သခင်ကြီးမှ ကောင်းကင်ဘုံတွင်ကတိကဝတ်ပြုကာယူလာပြီး ထိုကျောက်အား လက်ကောက်အဖြစ်ပြုလုပ်ကာ မိခင်အား အမြဲဝတ်ဆင်ထားစေသည်။ သို့သော် မိခင်မဆုံးပါးခင်တွင် ထိုလက်ကောက်ဖြင့် မဟူရာဓားကိုဖန်တီးစေခဲ့ပြီး ပေးခဲ့သောကြောင့်ဖြစ်ပေတော့သည်။

Author - May
Editor - Ivis

#လနတ်သမီးနှင့်အမှောင်မိစ္ဆာသခင်