Pyae sone linn

ငိုပါရစေ ကော်ဖီရယ်

အနာဂါတ်တွေ အလင်းမဲ့သွားတယ်
ပစ္စုပ္ပာန်တွေ မှောင်လာတယ်
ရက်စက်လိုက်တာ "အတိတ်ရယ်"

တစ်မွှာထဲ ရှင်သန်နေတဲ့ဘဝထဲ
နင် ဝင်လာတယ်
နှစ်လွှာတစ်ရွက် ဖြစ်ကြရအောင်ဆို•••••
ရက်စက်လိုက်တာ စွယ်တော်ရယ်

တိမ်းလာတဲ့ ခဏလေးကိုမှ
သိမ်းထားချင်မိတာ•••••
နင်ဘာလို့ တဖက်မှာ
​လေစိမ်းတွေနဲ့ယိမ်းနေရတာလဲ

ငိုပါရစေ ကော်ဖီရယ်
အနားမှာ "သကြား" တွေရှိပေမယ့်
အချိုတွေနဲ့ ငါမဖောက်ပြန်ခဲ့ဘူး
နင် ခါးတာ ငါသိပေမယ့်
ဆေးဖက်ဝင်မယ်ထင်ခဲ့တာပါ ကော်ဖီရယ်

နာကျင်နေပါပြီ
ငါ သိပ်ချစ်ခဲ့တာ နင်သိတယ်

အတိတ်မှာ
ရွှေကြာရှိခဲ့ဖူးတာလည်း နားလည်ပေးခဲ့တယ်
ဗေဒါ ရှိခဲ့ဖူးတာလည်း ခွင့်လွှတ်ခဲ့တယ်
ချစ်တဲ့စိတ်တခုထဲနဲ့
ငါ့ကိုယ်ငါ မြေစာအဖြစ်ခံခဲ့တာပါ

အတူနေမယ်ဆို
ဘယ်တော့မှ မခွဲဘူးဆို
အရမ်းချစ်တယ်ဆို
လက်ထပ်ကျမယ် တနေ့နေဆို
အယုံလွယ်သူကို မျှော်လင့်ချက်တွေပေးပြီး
နှစ်ခါသတ်လိုက်တာလားဟာ
နှစ်ခါသတ်လိုက်တာလား•••••••

ခါးပါ••••• ခါးလိုက်ပါ
အစကတည်းက ငါ သကြားမကြိုက်ခဲ့မိတာ
သွားပါ•••••သွားလိုက်ပါ
အစကတည်းက ပျော်စေချင်ခဲ့တာပါ
ထားပါ••••••ထား••••ထားခဲ့ပါ
အစကတည်းက နေခဲ့ရမယ့်လူပါ

အိပ်ပျက်မယ် မသောက်နဲ့ဆိုပေမယ့်
ငါ နင့်ကို စွဲလမ်းနေပြီ ကော်ဖီ

ငါက ကြက်သွန်နီလေးလိုပဲ
ငါ့ကြောင့် မျက်ရည်ကျရတယ်လို့သာ
ခေါင်းစဉ်တတ်ကြတာ........
တကယ်တော့ငါကအမြဲ ဓားစာခံပဲမဟုတ်လား

အခုတော့ ၃နဲ့၄လိုပဲ
အနေနီးသလိုလိုနဲ့
ကျောတွေခိုင်းပြီး
သူစိမ်းတွေဆန်နေလိုက်တာ

ဝမ်းနည်းလိုက်တာဟာ
လေစိမ်းတွေအရမ်းမတိုက်ပါနဲ့ကွာ
ငါ့မှာလည်း ကြွေပေးစရာဆိုလို့
ဘဝပဲရှိတော့လို့ပါ

ဒီရက်ပိုင်းတွေ ပြဿဒါးများတယ်နော
နဂါးခေါင်း ငါ့ဘက်လှည့်တယ်ထင်ပါရဲ့
စနေဒေါင့်မှာ ငါရှိနေတယ်

ပိတောက်ပဲမှားမှား
မိုးပဲမှားမှား
ငါက ချစ်တဲ့သူလေ
ငါခွင့်လွှတ်ပါတယ်

ဒါပေမယ့်
နင် မိုးကို မျှော်တာလား
ပိတောက်ကို မျှော်တာလားဆိုတာကိုတော့
တိတိကျကျသိချင်တယ်

မှားတာတွေ အတွက်
တောင်းပန်လိုက်ပါတယ် ကော်ဖီရယ်
ငိုပါရစေ ကော်ဖီရယ်

ညို့သခင်(စိတ်စေရာ)