ဇေယျာရွှေပြည့်ဆောက်လုပ်ရေးနှင့် အိမ်ခြံမြေအကျိုးဆောင်လုပ်ငန်း

မန္တလေးတိုင်းဒေသကြီး ပုသိမ်ကြီးမြို့နယ်ရှိ လယ်မြေများပေါ်တွင် ခွင့်ပြုချက်မရှိဘဲမြေယာအသုံးပြုထားသူများကို ဥပဒေပုဒ်မ ၁၄၄ ဖြင့် ထိရောက်စွာအရေးယူမည်ဟုဆို

ရန်ကုန်၊ ဖေဖော်ဝါရီ ၁ရက် ၊ ၂၀၂၆

မန္တလေး ပုသိမ်ကြီးမြို့နယ်ရှိ မြေယာအသုံးပြုမှုများနဲ့ပတ်သက်လို့ လိုက်နာမှုမရှိဘဲ ကျူးလွန်ဆောင်ရွက်သူတွေကို ရာဇဝတ်ကျင့်ထုံး ဥပဒေပုဒ်မ ၁၄၄ ဖြင့် ထိရောက်စွာ အရေးယူသွားမယ်လို့ ပုသိမ်ကြီးမြို့ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီက ထပ်မံအသိပေး ကြေညာလိုက်ပါတယ်။

မန္တလေးတိုင်းဒေသကြီး၊ အောင်မြေသာစံခရိုင်၊ ပုသိမ်ကြီးမြို့နယ်ရှိ လယ်ယာမြေများပေါ်မှာ ခွင့်ပြုချက်မရှိဘဲ တရားမဝင် လမ်းဖောက်လုပ်ခြင်း၊ အကွက်ရိုက်ရောင်းချခြင်း၊ ခြံစည်းရိုးကာရံခြင်း၊ အဆောက်အဦဆောက်လုပ်အသုံးပြုနေထိုင်ခြင်း၊ အခြားနည်း အသုံးပြုခြင်းများ မလုပ်ဖို့ နိုင်ငံပိုင်သတင်းစာတွေမှာ အသိပေးကြေညာခဲ့ပေမယ့် မြေပြင်မှာတော့ စီးပွါးရေးသမားပွဲစားများက Facebook ၊ TikTok မှတဆင့်် လိမ်လည်ရောင်းချမှုများ ရှိနေဆဲဖြစ်ပြီး ဝယ်ယူမိသူတွေမှာ ဆုံးရှုံးနစ်နာမှုတွေဖြစ်ရတယ်လို့ ဆိုပါတယ်။

နိုင်ငံတော်ပြန်တမ်းဖြင့် မြို့မြေ၊ ရွာမြေအဖြစ် ပြင်ဆင်တိုးချဲ့ဖွဲ့စည်းထားတဲ့ ရပ်ကွက်မြေ(သို့) ရွာမြေများနှင့် တစ်ဆက်စပ်တည်းရှိတဲ့ လယ်မြေ၊ ယာမြေ၊ သစ်တောမြေ၊ မြေလွတ်မြေလပ်နဲ့ မြေရိုင်းများကို စည်ပင်သာယာရေးနယ်နိမိတ်ထဲပါတယ် (သို့မဟုတ်) ရွာမြေထဲပါတယ်ဟုဆိုကာ ဥပဒေနဲ့မညီဘဲ ကွက်စိတ်ရိုက်၊ အုတ်တံတိုင်းကာရံကာ အခိုင်အမာအဆောက်အအုံအဖြစ် ကျူးလွန်ခြင်း၊ အရောင်းအဝယ်ပြုလုပ်ခြင်းများလည်း ရှိနေတယ်လို့ သိရပါတယ်။

ပုသိမ်ကြီးမြို့နယ်ရှိ မြေယာအသုံးပြုမှုများနဲ့ပတ်သက်လို့ သက်ဆိုင်ရာဌာနအဖွဲ့အစည်းများက မြေပြင်ကွင်းဆင်းစစ်ဆေးကာ ထိရောက်စွာ အရေးယူသွားမှာဖြစ်ပြီး အသုံးပြုခွင့်မရှိတဲ့မြေတွေကို ပြည်သူများရောင်းမှားဝယ်မှားမဖြစ်စေဖို့ ပုသိမ်ကြီးမြို့နယ်စီမံခန့်ခွဲရေးနှင့်အုပ်ချုပ်ရေးကော်မတီက ထပ်မံသတိပေးတားမြစ်ချက် ထုတ်ပြန်ခဲ့သည်။ (BMNZ)
ဓာတ်ပုံ — အင်တာနက်
#ပုသိမ်ကြီး #လယ်ယာမြေ