Balamban Rural Health Unit

ATENSYON SA TANANG LUMULUPYO SA BALAMBAN!

Tungod sa wala damhang pagbuto sa Bulkan Kanlaon, ang pag-ulan sa abog (ashfall) nakaapekto na sa atong lugar.

Ang tanan ginatambagan sa pagsunod sa mosunod nga mga lakang sa pag-amping aron masiguro ang inyong kahimsog ug kaluwasan.

Mga Pahimangno Aron Makalikay sa Pagka expose sa Ashfall (Abog gikan sa Bulkan)

🌋 Panalipdi ang imong kaugalingon ug ang imong pamilya panahon sa pag-ulan sa abog gikan sa bulkan.

1. Pabilin sulod sa balay kutob sa mahimo samtang nagpadayon ang pag-ulan sa abog.
2. Sirad-i ang mga bintana ug pultahan aron dili makasulod ang abog sa sulod sa balay.
3. Pagsul-ob og face mask (mas maayo kung N95). Kon walay N95, mahimong mogamit og limpyo nga panyo o panapton nga gamayng gibasa aron tabunan ang ilong ug baba.
4. Pagsul-ob og protective nga salamin (goggles) aron mapanalipdan ang mata batok sa abog. Likayi ang paggamit og contact lenses.
5.Taboni ang panit pinaagi sa pagsul-ob og taas nga manggas, taas nga pantalon, ug sapatos.
6. Likayi ang paggawas gawas kung kinahanglan gayod.
7.Pag-inom lamang og limpyo ug luwas nga tubig ug siguroha nga natabonan ang pagkaon ug ilimnon aron dili maabugan.
8.Hinloi ang abog sa atop ug palibot kung luwas na kini buhaton. 9. Bas-a una ang abog sa dili pa silhigon aron dili kini molupad sa hangin.
9. Pag-amping sa pagmaneho. Kon dili kinahanglan, likayi ang pagbiyahe tungod kay mahimong moubos ang makita sa dalan ug mahimong madanlog ang karsada.
10. Hatagi og espesyal nga pagtagad ang mga bata, tigulang, mabdos, ug mga adunay sakit sa baga o kasingkasing, kay mas dali silang maapektuhan sa ashfall.
11. Paminawa ug sunda ang mga pahibalo gikan sa lokal nga panggamhanan, mga awtoridad sa panglawas, ug mga ahensya sa disaster response.

Hinumdumi: Ang abog gikan sa bulkan mahimong hinungdan sa lisod nga pagginhawa, iritasyon sa mata ug panit, ug uban pang mga peligro sa panglawas. Ang hustong pag-amping makatabang sa pagpanalipod sa imong kaugalingon ug sa tibuok pamilya.