105.3 FM LIFE RADIO Kabankalan

NMC NAGBUYLOG SA IKA-10 NGA ANIBERSARYO SANG ARBITRAL RULING SA WEST PHILIPPINE SEA

Nagbuylog ang National Maritime Council (NMC) sa pagsaulog sang pungsod sa ika-10 nga anibersaryo sang arbitral ruling sa South China Sea nga naga-pabor sa Pilipinas.

Sandig sa ginpaggwa nga pahayag sang NMC kadungan sa nasambit nga selebrasyon, ila gina-pangabay ang gobyerno nga padayunon ang pagsunod sa international law sa tunga sang nagapadayon nga tensiyon sa gina-agawan nga teritoryo.

Dugang pa sang council, ang desisyon international court sang tuig 2016 amo ang nagapabilin bilang legal nga pundasyon sang pungsod para sa pag-depensa sa kinamatarong kag maritime entitlements sa idalom sang United Nationas Convention on the Law of the Sea (UNCLOS).

GINA-PATIHAN SMUGGLED CI******ES NA-REKOBER SA GIN-ABANDONAR NGA BANGKA SA CAUAYAN ‎

‎Na-rekober sang mga otoridad ang gina-patihan smuggled ci******es sa bangka nga gin-abandonar sa baybayon nga bahin sang Purok 3, Barangay Lina-on, banwa sang Cauayan, las-6:30 ang takna sang aga, Hulyo 11. ‎ ‎

Sa impormasyon nga nakuha nagikan sa Cauayan Municipal Police Station (MPS), nakabaton sang tawag nagikan sa Barangay Captain sang nasambit nga Barangay ang ila talatapan kag gin-report ang pagkakita sang mga sigarilyo. ‎

‎Suno naman kay alyas ‘Ariel’ — ang una nga nakakita sang amo nga mga smuggled ci******es, ginsaysay sini nga samtang nagapatuka siya sang iya mga manok, iya nasiplatan ang guba nga bangka sa higad sang baybay rason nga iya ini ginpadulungan. ‎

‎Dugang pa ni Ariel, pag-abot sa lugar iya nakita ang mga pakete sang sigarilyo sa idalom sang bangka rason nga gilayon sini nga ginpahibalo ang mga Barangay Officials. ‎

‎Gilayon man nga gin-padulungan sang mga kapulisan kag Philippine Coast Guard (PCG) ang lugar kag didto na-rekober ang 126 ka pakete sang Canon Menthol, kag 36 ka pakete naman sang Bison ci******es nga naga-balor sang ginbulubanta Php7,200.00. ‎ ‎

Sa karon padayon pa nga gina-hibalo ang tag-iya sang bangka kag sang sigarilyo nga nakita. Yara naman sa kustodiya sang PCG ang mga recovered items samtang nagapadayon ang imbestigasyon. ‎ ‎

MARIS RACAL, NASIPLATAN UPOD ANG ISA KA NON-SHOWBIZ GUY

Spotted ang Filipina actress nga si Maris Racal upod ang isa ka non-showbiz guy.

Bangud sini, madasig nga nag-ekspekular ang mga netizens nga posible naga-date na ang aktres.

Una nga nag-lapnag sa X ukon anay-Twitter ang mga laragway ni Maris kag sang ‘unknown man.’

Tubtob sa karon, wala pa sang pahayag ang aktres may angut sini.

Madumduman nga sadto mag-on nanday Maris kag ang OPM singer nga si Rico Blanco, apang naulamid ini sa kontrobersiya, upod sa iya anay on-screen partner nga si Anthony Jennings.

BOMB THREAT SA SAN CARLOS, ISA LAMANG KA PRANK SUNO SA ILA ALKALDE

Ginkumpirmar ni San Carlos City Mayor Renato Gustilo nga isa lamang ka prank ang bomb threat sa ila syuad nga ginpost sadto sa isa ka Facebook account.

Sandig sa gin-dagdag nga pahayag ni Gustilo, natukiban ang prank, matapos ang nangin imbestigasyon sang San Carlos Component City Police Station kag Philippine Coast Guard.

Suno kay Gustilo, katuyuan sang nag-prank ang pag-mislead kag pag-tuga sang panic sa mga tawo.

Dugang pa niya, naga-padayon ang imbestigasyon sang otoridad, may angut sa insidente agud matumod sa gilayon ang tawo nga responsable sa pag-pamahog.

STREET LEVEL INDIVIDUAL NGA NAKUHAAN SANG ‘SHABU’ SA HINIGARAN, ARESTADO

Arestado ang isa ka street-level individual matapos nakuhaan sang gina-suspetsuhan iligal nga droga sa operasyon sang kapulisan sa Sitio Tambitoy, Barangay Nanunga, Hinigaran, takna las 8:35 sa aga, Domingo, Hulyo 12.

Gin-kilala ang naaresto kay Alyas "Atit" 24-anyos, lalaki, kag residente sang Sitio Ubay, Brgy Calapi, Hinigaran.

Nakuha sa iya pag-hinakop ang lima-tanan ka mga heat sealed transparent plastic sachet nga nagaunod sang gina-patihan shabu nga nagabalor sang P13,600; buy-bust money; cash nga naga-balor sang P200; kag kahita.

Nagapabilin ang naaresto sa custodial facility sang Hinigaran PNP agud magapangatubang sang nagakaigo nga disposisyon.

BANTAY PANAHON

Nagapabilin sa gwa sang Philippine Area of Responsibility (PAR), ang isa ka Low Pressure area (LPA 07a).

Sandig sa monitoring sang PAGASA, may yara ini sang medium chance nga mangin bagyo sa sulod sang 24 oras.

Samtang padayon nga naga-apekto sa Luzon ang Southwest Monsoon, ukon Habagat.

Suno sa weather bureau, wala ini sang direkta nga epekto sa NIR, rason lauman ang ‘improving’ nga kondisyon sang panahon sa karon nga adlaw.

Naga-pabilin ang posibilidad sang lapta-lapta nga pag-tupa sang ulan, pag-pangilat kag panaguob sa rehiyon bangud sang localized thunderstorms.

Maga-dala sang makanay nga pag-balod sa kadagatan ang mahina nga hangin sa Negros Island Region.

Maga-dangat humalin sa 25 tubtob 30°C ang temperatura sa rehiyon subong nga adlaw.

Nag-butlak ang adlaw 5:34 sini nga aga kag maga-tunod las 6:17 sa kasisidmon.