Ang Bigat ng Mga Salitang Hindi Sinabi

Sana, kapag naglakas-loob muli akong abutin ka,
kapag muli kong piniling sundin ang tibok ng puso,
ay may panahon pa.
Dahil kahit gaano ka katagal nawala,
hindi kita nakalimutan.
At sa bawat gabing ako'y tahimik,
naroroon ka — tinig na hindi tumigil sa pagtawag.

Ang Tagal na Rin Pala by Azethyl

Ang tagal na rin pala simula nung inalala kita.
Kung paanong gaano kaganda ang ngiti ko sa tuwing magtatagpo ang landas nating dalawa.
At hindi ito tungkol sa isang tao,
kundi sa mga limot na pangarap at kakayahang ibinaon na sa nakaraan
dahil sa mabilis na usad ng mundo.

Hindi ko na maalala ang huling hawak ko ng pluma,
hindi para magsulat ng leksyon sa kolehiyo,
kundi para ilabas ang mga ideyang umusbong mula sa tahimik na pagmuni-muni.
Hindi ko lubos mawari kung paanong muntikan nang mabaon sa limot
ang mga pangarap—
bago pa man pumasok sa mataas na paaralan,
bago pa man maharangan ng naglalakihang pader
ang kinang ng mga matang punô ng pag-asa at pagnanais.

Sana, kapag nakapagdesisyon ulit na hawakan
at sundan ang tibok ng puso,
ay may panahon pa.
Dahil habang buhay ko itong dadalhin.