Eastern Visayas Peace Builders and Development Federation

MASOBRA 400 NGA MGA PARUPANGISDA NAKAKARAWAT HIN FOOD PACKS HA SEND-OFF CEREMONY HAN MODIFIED COMMUNITY SUPPORT TEAM!

Tacloban City – Manilampuson nga ginbuhat an usa nga Send-off Ceremony han Modified Community Support Team (MCST) ngan distribusyon hin food packs ngadto ha mga parupangisda kakulop nga adlaw - Hunyo 1, 2026 nga naapektuhan han kahuhuman pala nga Balikatan Exercise 2026 sugad han mga Barangay 88, 89, ngan 90 ha syudad han Tacloban.

Masobra 400 nga mga benepisyaryo an nakatagamtam labis na an mga parupangisda nga apektado han temporaryo nga restriksyon ha ira panginabuhi samtang ginpapatuman an nasabi nga military exercise, an nakakarawat hin bulig pinaagi han food packs nga iginhatag ha pangunguna han Department of Social Welfare and Development Regional Office 8.

Tumambong han nasabi nga aktibidad an mga Barangay Officials han tulo nga barangay, Executive Director han Uswag Sinirangan Bisayas Inc. pinaagi kan Mr. Terencio Eder Jr, ngan magkaduru-dilain nga ahensya han gobyerno sugad han NICA 8, Task Group Tacloban, Civil-Military Operations (CMO), PNP Mobile Force, Tacloban City Police Office ngan Philippine Coast Guard, nga nagpakita han ira suporta ngan pakigburublig para han kapakanan han komunidad.

Sumala han mga opisyal, an aktibidad diri la simbolo han pagtapos han misyon han Modified Community Support Team kundi usa gihapon nga paagi han pagpasalamat ngan paghatag suporta ha mga naapektuhan nga sektor han komunidad, labi na an mga parupangisda nga nawad-an temporaryo hin oportunidad ha panginabuhi tungod han Balikatan Exercise 2026.

Ginpasalamatan han mga benepisyaryo an mga ahensya ngan organisasyon nga nagin instrumento para makakarawat hira hin bulig, samtang ginlalauman liwat nga padayon an koordinasyon ngan serbisyo ngadto ha komunidad para han mas madig-on nga relasyon han katawhan ngan gobyerno.