Gilgit Life

گلگت :
گلگت بلتستان بیوروکریسی میں تبادلے ، رحمان شاہ سیکریٹری اطلاعات، فیصل احسان پیرزادہ سیکریٹری داخلہ اور سید عبدالوحید شاہ کو چیف منسٹر انسپکشن ٹیم کا سربراہ تعینات کر دیا گیا۔

گلگت ۔۔۔۔۔

محکمہ برقیات نے غریب شہری کو ایک ماہ کا 10لاکھ 10 ہزار 990 روپے کا بجلی بل بھیج دیا ، غریب شہری محکمہ برقیات کے دفاتر کے چکر لگا رہا ہے لیکن کوئی شنوائی نہیں ہو رہی ۔ نواز شریف چیتا کالونی جوٹیال کے رہائشی عبدالقدوس نے میڈیا کو بتایا کہ ان کا گھر 2 کمروں پر مشتمل ہے اور ان دو کمروں پر مشتمل گھر کا اتنا زیادہ بل دیکھ کر وہ خود بھی حیران ہیں۔ انہوں نے بتایا کہ انہوں نے 18 دسمبر کو اکتوبر کا 2500 روپے کا بل جمع کرایا ہے اور اب دسمبر اور جنوری کا بل 10 لاکھ 10 ہزار 990 روپے کا دیا گیا ہے جبکہ شہر میں بجلی کی حالت کا بھی سب کو پتہ ہے کہ 24 گھنٹے میں 4 گھنٹے بجلی ملتی ہے۔ انہوں نے بتایا کہ میں ایک غریب آدمی ہوں اب میں کیسے اور کیوں اتنا بڑا بل ادا کروں۔ انہوں نے سیکریٹری برقیات سے اپیل کی کہ وہ اس ظلم کو روکیں اور جائز بل فراہم کریں تاکہ وہ بل جمع کروا سکے۔

پاک فوج کے شعبہ تعلقات عامہ نے برزل حادثے کی تفصیلات جاری کر دی ۔
*گلگت بلتستان: ضلع استور کے علاقے
برزل ٹاپ پر برفانی تودے گرنے کے باعث حادثہ؛ ایک افسر، ایک سپاہی اور ایک سول اپریٹر شہید*

گزشتہ شب تقریباً تین بجے کے قریب گلتری بینڈ کے مقام پر یہ حادثہ پیش آیا، جب سڑک پر برف ہٹانے کا کام جاری تھا۔ اچانک برفانی تودہ گرنے کے باعث ایک افسوسناک حادثہ رونما ہوا۔

واقعے کی اطلاع ملتے ہی پاک فوج کی ریسکیو ٹیمیں فوری طور پر جائے حادثہ پر پہنچ گئیں اور مشکل موسمی و زمینی حالات کے باوجود ریسکیو آپریشن بلا تاخیر انجام دیا۔ ٹیموں نے بروقت کارروائی کرتے ہوئے تمام میتوں کو نکال لیا۔

اس حادثے میں پاک فوج کے کیپٹن اسمد، سپاہی رضوان اور سول اپریٹر محمد عیسیٰ خان نے وطن اور عوام کی خدمت کے دوران لائن آف ڈیوٹی میں اپنی جان قربان کر دی۔ یہ شہداء اپنی بہادری، قربانی اور فرض شناسی کی وجہ سے ہمیشہ یاد رکھے جائیں گے۔

تمام شہداء کی میتیں تدفین کے لیے ان کے آبائی علاقوں کی جانب روانہ کی جا رہی ہیں، جہاں انہیں فوجی اعزازات کے ساتھ سپرد خاک کیا جائے گا۔