Dardistan tv

پاکستان پیپلز پارٹی سٹی گلگت کے نائب صدر علی کریم خان نے اپنے ایک حالیہ بیان میں پاکستان تحریک انصاف (PTI) اور مجلس وحدت المسلمین (MWM) کے تین سالہ دورِ اقتدار کو حلقہ ون کے لیے "سیاسی دشمنی" کا دور قرار دے دیا ہے۔

انہوں نے سوشل میڈیا پر جاری اپنے سخت ردعمل میں کہا کہ:
"گزشتہ تین سالوں کے دوران پی ٹی آئی اور ایم ڈبلیو ایم کے گٹھ جوڑ نے جس طرح حلقہ ون کی عوامی مفاد کی اسکیموں کو سبوتاژ کرنے کی ناکام کوششیں کیں، وہ تاریخ کا سیاہ باب ہے۔ ان جماعتوں نے عوامی خدمت کے بجائے صرف رکاوٹیں ڈالنے کی سیاست کی، لیکن ان کے ناپاک عزائم کبھی کامیاب نہیں ہو سکے۔"

علی کریم خان نے سابق وزیر اعلیٰ خالد خورشید کے دور کو شدید تنقید کا نشانہ بناتے ہوئے کہا کہ "خالد خورشید کی منشی گری" نے حلقے کے عوام کو ترقی کی دوڑ میں برسوں پیچھے دھکیل دیا ہے۔ جو وقت عوامی فلاح اور تعمیر و ترقی پر صرف ہونا چاہیے تھا، وہ فائلیں روکنے اور سیاسی انتقام کی نذر کر دیا گیا۔

"حلقہ ون کے عوام باشعور ہیں اور وہ اپنی محرومیوں کا ایک ایک حساب یاد رکھے ہوئے ہیں۔ تین سال تک عوام کے حقوق پر ڈاکہ ڈالنے والے اب کس منہ سے ان کے پاس جائیں گے؟ الیکشن کا وقت قریب ہے، اور یہی وہ وقت ہے جب حلقے کے عوام اپنے ووٹ کی طاقت سے ان سازشی عناصر کو ہمیشہ کے لیے مسترد کر دیں گے جنہوں نے منشی گری کی خاطر عوام کا مستقبل داؤ پر لگایا۔"


علی کریم خان نے اس عزم کا اعادہ کیا کہ پاکستان پیپلز پارٹی ہمیشہ کی طرح عوامی مفاد کے تحفظ کے لیے صفِ اول میں کھڑی ہے اور سارشوں کے باوجود عوامی خدمت کا سفر رکنے نہیں دیا جائے گا۔

گلگت (پ ر) کوہستان سے تعلق رکھنے والے افراد کا اہم اجلاس میں آئندہ سیاسی منظرنامے کے حوالے سے بڑا اعلان سامنے آیا ہے۔تفصیلات کے مطابق اتوار کو کوہستانی کمیونٹی کا ایک اہم اجلاس سونی کوٹ کے ایک نجی ہوٹل میں منعقد ہوا، جس میں کوہستان سے تعلق رکھنے والے عمائدین کی بڑی تعداد نے شرکت کی۔ اجلاس کے دوران موقف اپنایا گیا کہ پچھلے کئی دہائیوں سے کوہستانی کمیونٹی کے ساتھ سوتیلی ماں کا سلوک کرتے ہوئے ان کو نظرانداز کیا گیا مگر اس بار کوہستانی کمیونٹی گلگت بلتستان کے دس اضلاع سے ایسا سرپرائز دے گی کہ سب حیران رہ جائیں گے۔۔اجلاس کے شرکاء کا کہنا تھا کہ اس بار کوہستانی کمیونٹی جس بھی جماعت یا امیدوار کے ساتھ اتحاد کرے گا، وہی میدان مارنے کی پوزیشن حاصل کرلے گا۔مقررین نے اتحاد و اتفاق پر زور دیتے ہوئے کہا کہ علاقے کی ترقی اور عوامی مسائل کے حل کے لیے مشترکہ حکمت عملی اپنائی جائے گی۔اجلاس کے اختتام پر اس عزم کا اعادہ کیا گیا کہ آئندہ سیاسی فیصلے باہمی مشاورت سے کیے جائیں گے اور عوامی مفادات کو ہر صورت مقدم رکھا جائے گا۔کمیونٹی کے افراد نے اجلاس کے آخر میں آپریشن معرکہ حق کا ایک سال مکمل ہونے کی خوشی میں اس عزم کا اظہار بھی کیا گیا کہ کوہستان کا بچہ بچہ پاک وطن کے دفاع کے لئے اپنی بہادر افواج کے ساتھ کھڑا تھا کھڑا ہے اور کھڑا رہے گا۔۔