Pakistan Perspective

کوئٹہ (نمائندہ خصوصی)
​بلوچستان بالخصوص صوبائی دارالحکومت کوئٹہ کے عوامی حلقوں کی جانب سے بی اے مال (BA Mall) کے مالک خالد حسین بھٹ کے خلاف شدید غم و غصے کا اظہار کیا جا رہا ہے۔ عوامی سطح پر یہ سنگین الزامات عائد کیے جا رہے ہیں کہ مذکورہ فرد ہنہ اور منگلی کے علاقوں میں مبینہ طور پر کالعدم تنظیموں، جن میں ٹی ٹی پی اور بی ایل اے شامل ہیں، کے نام کا سہارا لے کر خوف و ہراس پھیلا رہے ہیں اور مقامی آبادی کو دھمکانے کا سلسلہ جاری رکھے ہوئے ہیں۔
​کوئٹہ کے مقامی رہائشیوں اور قبائلی عمائدین نے اپنا موقف اختیار کرتے ہوئے کہا ہے کہ خالد حسین بھٹی، جن کا تعلق پنجاب سے بتایا جاتا ہے، پشتونوں کی آبائی اور فطرتی زمینوں پر غیر قانونی قبضے کی کوشش کر رہے ہیں، جسے عوام مکمل طور پر مسترد کرتے ہیں۔ عوامی نمائندوں کا کہنا ہے کہ ہماری زمینیں ہماری پہچان ہیں اور کسی بھی غیر مقامی فرد کو طاقت کے زور پر ان پر قبضہ کرنے کی ہرگز اجازت نہیں دی جائے گی۔
​اس صورتحال کے پیشِ نظر عوامی حلقوں کی جانب سے بی اے مال اور اس کے مالک خالد حسین بھٹی کے مکمل سماجی و تجارتی بائیکاٹ کا اعلان کیا گیا ہے۔ شہریوں کا کہنا ہے کہ جب تک مذکورہ شخص کی جانب سے ان اقدامات کا خاتمہ نہیں ہوتا اور متعلقہ حکام کی جانب سے ان الزامات کی شفاف تحقیقات نہیں ہوتیں، تب تک عوام اس مال اور اس سے وابستہ کسی بھی سرگرمی کا بائیکاٹ جاری رکھیں گے۔
​متاثرہ علاقوں کے مکینوں نے حکومتِ بلوچستان، ضلعی انتظامیہ اور قانون نافذ کرنے والے اداروں سے مطالبہ کیا ہے کہ ہنہ اور منگلی کے علاقوں میں مبینہ دہشت گردی اور دھمکیوں کے الزامات کی فوری تحقیقات کی جائیں، زمینوں پر قبضے کے معاملات کا نوٹس لیا جائے تاکہ صوبے میں امن و امان کی صورتحال مزید نہ بگڑے، اور مقامی لوگوں کے تحفظ کو یقینی بنایا جائے تاکہ کسی بھی ناخوشگوار صورتحال سے بچا جا سکے۔ عوامی حلقوں نے خبردار کیا ہے کہ اگر ان کے جائز مطالبات پر عمل درآمد نہ ہوا تو وہ اپنے احتجاج کے دائرہ کار کو وسیع کرنے پر مجبور ہوں گے۔