Awazeswat.com

سوات ٹریڈرز فیڈریشن کے ترجمان ڈاکٹر خالد محمود نے بنوں میں پولیس چوکی پر ہونے والے دہشت گرد حملے کی شدید الفاظ میں مذمت کی ہے۔اپنے جاری کردہ بیان میں ڈاکٹر خالد محمود نے کہا کہ پولیس اور سیکیورٹی فورسز پر بزدلانہ حملے ملک دشمن عناصر کی کارروائی ہے جسے کسی صورت برداشت نہیں کیا جائے گا۔ انہوں نے کہا کہ ہماری پولیس کے جوان اپنی جانوں کا نذرانہ دے کر عوام کے جان و مال کا تحفظ کر رہے ہیں۔
ترجمان سوات ٹریڈرزفیڈریشن نے کہا کہ بنوں پولیس چوکی پر حملہ انتہائی افسوسناک اور قابلِ مذمت ہے۔ ہم شہداء کے لواحقین کے غم میں برابر کے شریک ہیں اور زخمیوں کی جلد صحت یابی کے لیے دعا گو ہیں۔ڈاکٹر خالد محمود نے حکومت سے مطالبہ کیا کہ حملے میں ملوث دہشت گردوں کو فوری گرفتار کر کے کیفرِ کردار تک پہنچایا جائے اور شہداء کے خاندانوں کے لیے خصوصی پیکیج کا اعلان کیا جائے۔انہوں نے مزید کہا کہ پوری تاجر برادری پاک فوج اور پولیس کے ساتھ کھڑی ہے۔ دہشت گردی کے خلاف جنگ میں ہم سیکیورٹی اداروں کی ہر قربانی کو قدر کی نگاہ سے دیکھتے ہیں۔