Cook it right with Aya
Share
وصفات طبخ لذيذة وسهله بمقادير مظبوطه ��
15/03/2025
لو هتعملى الكحك اقرى البوست ده كويس عشان تتجنبي أى اخطاء 😍😍😍😍
طريقة الكحك سهلة جداً بس فيها كام نقطة كدة لازم نخلي بلنا منها كويس اوي عشان الكحك ما ينشفش مننا و يطلع ناعم و جميل.
المقادير لكيلو من الكحك 👇👇👇
كيلو دقيق ( جميع الأغراض )
نص كيلو سمنة بقري 🐄 ( نوعها كويس )
رشة ملح
٣/٤ كوب مياه دافئة ( 1/4 منها للخميرة )
ملعقة صغيرة خميرة فورية
٣ ملاعق سكر
3معلقة صغيرة ريحة كحك او البديل ( باكت فانيليا )
3ملاعق كبار سمسم
سكر بودر للتزين
📍كل كليو دقيق عليه نص كيلو سمنة. هايطلع ناعم و حلو. في ناس بتحط ٥٥٠ او ٦٠٠ جرام سمنة ( هايبقى ناعم اوي اوي و يلزق في سقف البق و انا مش بحب كدة )
📍اهم حاجة نوع السمنة. لازم سمنة بقري🐄 ١٠٠٪
( زي البقرة الحلوب او شيراتون )
⁉️طب ينفع زبدة؟ : لا 😂
⁉️طب ينفع زيت؟: لا 😂😂
⁉️طب ينفع اخلط سمنة على زبدة؟: لا بردو 😂
📍فيه ناس بتعمل الكحك على البارد.
يعني ايه على البارد يا ست انتي؟: يعني السمنة تكون بردة مش مقدوحة.
في الحالة دي الكحك هايطلع كويس بس أسبوع او ٢ و رحته هاتزنخ و هايترمي خصوصاً لو عامله كمية كبيرة فا حرام.
انا بعمل الكحك بالسمنة مقدوحة كويس و بيطلع ريحته حلوة اوي ( عشان الزيوت ال في ريحة الكحك او البهارات الموجودة بتطلع من سخونة السمنة ) كمان الكحك بيقعد عندي شهور و بيفضل طعمه و ريحته جنان
يعني ايه نقدح السمنه؟: يعني السمنه تسخن كويس أوي اوي اوي. 📣📣ياريت مايكنش فيه أطفال في المطبخ في المرحلة دي بليز 📣📣
📍لازم نبس الدقيق بالسمنه كويس اوي اوي. حوالي ١٠-١٥ دقيقة. نبس مش نعجن ( المرحلة دي اهم مرحلة )
⁉️يعني ايه نبس
نبس يعني ندعك الدقيق بالسمنة بباطن الايد الاتنين.
⁉️طيب هانبس ازاي و السمنة سخنة؟:
اول ما هانحط السمنة المقدوحة على الدقيق، هانقلب بمعلقة خشب كله مع بعضه كويس ٢-٣ دقايق هايكون برد
شوية و بعد كدة نبتدي نبس.
📍الخميرة نذوبها في ربع كوباية مياه دافئة ( مش بردة و مش سخنة اوي عشان الخميرة ما تموتش ) .
📍السوائل، فيه ناس بتحب تعمل الكحك باللبن و ناس بتحب بالمياه. انا جربت الاتنين و مفيش فرق
كمية السوائل لو زادت عن الوصفة هاتنشف الكحك 😱 خالي بالكم من النقطة دي اوي. كيلو الدقيق بياخد كوباية الا ربع ( ٣/٤ ) مياه او للبن. منهم ربع هانزوب فيه الخميرة. ( يعني ربع كوب للخميرة و نص كوب لواحده )
في ناس مش بتحط مياه خالص و بتكتفي بالربع كوب بتاع الخميرة ( انا مش بحب الطريقة دي خالص )
📍ريحة الكحك من عند العطار ولو مفيش ييقا كيس فانيليا بودر هايطلع ريحته و طعمه حلو اوي.
📍الكحك مايتشلش من الصاج غير لما يبرد خاااااالص.
📍بحط الكحك في علب واغطيه او طبق كبير منغلف بكيس المهم يبقا مقفول عليه .
Click here to claim your Sponsored Listing.
