TARGET Magazine
Share
Target magazine online is derived from a famous business magazine “Target”. It is an online media
01/07/2026
"ທ່ານ ໂດນັລ ທຣຳ" ສັ່ງໃຫ້ປ້ຳນ້ຳມັນທົ່ວສະຫະລັດຫຼຸດລາຄາທັນທີ! ຫຼັງລາຄານ້ຳມັນໂລກຫຼຸດລົງຫຼາຍແຕ່ໜ້າປ້ຳຍັງແພງ
ໃນວັນທີ 30 ມິຖຸນາ 2026, ປະທານາທິບໍດີ ໂດນັລ ທຣຳ ໄດ້ໂພສຂໍ້ຄວາມຜ່ານແພລດຟອມ Truth Social ສັ່ງການຢ່າງເດັດຂາດໃຫ້ສະຖານີບໍລິການນ້ຳມັນທົ່ວສະຫະລັດອາເມຣິກາ ຫຼຸດລາຄາຂາຍຍ່ອຍລົງທັນທີ. ຄວາມເຄື່ອນໄຫວດັ່ງກ່າວເກີດຂຶ້ນພາຍຫຼັງທີ່ລາຄານ້ຳມັນດິບໃນຕະຫຼາດໂລກປັບຕົວຫຼຸດລົງມາຢູ່ທີ່ປະມານ 68 ໂດລາຕໍ່ບາເຣວ ເຊິ່ງເປັນຜົນມາຈາກການເຮັດຂໍ້ຕົກລົງກັບປະເທດອີຣານ, ແຕ່ລາຄານ້ຳມັນແອັດຊັງໜ້າປ້ຳພັດຍັງຄົງສູງເກີນຄວາມເປັນຈິງ.
ທ່ານ ທຣຳ ໄດ້ລະບຸຊັດເຈນວ່າ ຜູ້ປະກອບການປ້ຳນ້ຳມັນຄວນຕອບສະໜອງ ແລະ ເຮັດໃນສິ່ງທີ່ຖືກຕ້ອງ ເພື່ອຊາວອາເມຣິກັນ ພ້ອມທັງກ່າວເຕືອນຢ່າງຮຸນແຮງວ່າ: "ຫາກປ້ຳນ້ຳມັນໃດບໍ່ປະຕິບັດຕາມ ຈະຕ້ອງປະເຊີນກັບຜົນກະທົບທີ່ຮ້າຍແຮງໃນອະນາຄົດ."
ນອກຈາກນີ້, ທ່ານ ທຣຳ ຍັງໄດ້ພຸ່ງເປົ້າໄປທີ່ລັດແຄລິຟໍເນຍ ເຊິ່ງເປັນລັດທີ່ມີລາຄານ້ຳມັນແພງເປັນອັນດັບຕົ້ນໆຂອງປະເທດ ໂດຍຊີ້ແຈງວ່າ ຕ້ອງຍຸຕິການເກັບພາສີນ້ຳມັນທີ່ສູງເກີນໄປຢ່າງເດັດຂາດ ເພາະໃນອະນາຄົດອັນໃກ້ ຄ່າພາສີອາດຈະແພງກວ່ານ້ຳມັນ. ພ້ອມເນັ້ນຢ້ຳວ່າ ສະຫະລັດອາເມຣິກາ ແລະ ປະຊາຊົນແຄລິຟໍເນຍ ຈະບໍ່ຍອມທົນຕໍ່ການຖືກກົດຂີ່ດ້ວຍພາສີທີ່ໄຮ້ເຫດຜົນ ແລະ ນະໂຍບາຍຂອງລັດອີກຕໍ່ໄປ.
ຂໍ້ມູນ: Reuters
#ໂດນັລທຣຳ #ລາຄານ້ຳມັນ #ຂ່າວຕ່າງປະເທດ #ເສດຖະກິດໂລກ
30/06/2026
ລັດຖະບານ ວາງແຜນເລັ່ງຄຸ້ມຄອງລາຄາສິນຄ້າ, ຊຸກຍູ້ການຜະລິດພາຍໃນ ແລະປະຕິຮູບລັດວິສາຫະກິດ
ວັນທີ 30 ມິຖຸນາ 2026, ກະຊວງອຸດສາຫະກຳ ແລະ ການຄ້າ (ອຄ) ໄດ້ສຳເລັດການດຳເນີນກອງປະຊຸມຄົບຄະນະ ຄັ້ງທີ 3 ໂດຍການເປັນປະທານຂອງ ສະຫາຍ ມະໄລທອງ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງອຸດສາຫະກຳ ແລະ ການຄ້າ. ກອງປະຊຸມໄດ້ຕີລາຄາຜົນງານທີ່ໂດດເດັ່ນໃນໄລຍະຜ່ານມາ ເຊັ່ນ: ການຮັບປະກັນສະໜອງນໍ້າມັນເຊື້ອໄຟໃນຊ່ວງວິກິດ, ການສະໜອງທຶນໃຫ້ SME, ການເຈລະຈາການຄ້າ ແລະ ການສົ່ງເສີມການນຳໃຊ້ລົດໄຟຟ້າ.
ເພື່ອສືບຕໍ່ຂັບເຄື່ອນວຽກງານໃນ 6 ເດືອນທ້າຍປີ 2026 ໃຫ້ມີປະສິດທິພາບ, ກອງປະຊຸມໄດ້ຮັບຮອງເອົາແຜນວຽກຈຸດສຸມດັ່ງນີ້
1. ການຈັດຕັ້ງປະຕິບັດນະໂຍບາຍ: ເລັ່ງລັດການຜັນຂະຫຍາຍມະຕິ 04/ກມສພ ແລະ ບັນດາມະຕິສຳຄັນ ອອກເປັນແຜນງານ ແລະ ນິຕິກຳສະເພາະຂອງຂະແໜງ ອຄ ໃຫ້ທັນກຳນົດເວລາ ແລະ ມີຄຸນນະພາບສູງ.
2. ການແກ້ໄຂສິ່ງທ້າທາຍທາງເສດຖະກິດ: ເລັ່ງແກ້ໄຂບັນຫາພື້ນຖານໂດຍສຸມໃສ່ການຄຸ້ມຄອງລາຄາສິນຄ້າ, ຮັບປະກັນການສະໜອງສິນຄ້າໃຫ້ພຽງພໍ, ຍູ້ແຮງການຜະລິດພາຍໃນ, ປະຕິຮູບລັດວິສາຫະກິດ ແລະ ຫັນລະບົບການຄ້າໃຫ້ທັນສະໄໝ.
3. ການພັດທະນາຊັບພະຍາກອນມະນຸດ: ເພີ່ມທະວີວຽກງານກໍ່ສ້າງພັກ ແລະ ສ້າງແຜນຍຸດທະສາດພັດທະນາບຸກຄະລາກອນ 5 ປີ ເພື່ອຕອບສະໜອງຄວາມຮຽກຮ້ອງຕ້ອງການໃນໄລຍະໃໝ່.
ນອກຈາກນີ້, ຍັງໄດ້ເນັ້ນຢ້ຳໃຫ້ມີການກວດກາພາຍໃນຢ່າງເຂັ້ມງວດ ເພື່ອກະຕຸ້ນການປະຕິບັດໜ້າທີ່ຂອງພະນັກງານທຸກຂັ້ນໃຫ້ມີປະສິດທິພາບ ແລະ ໂປ່ງໃສຍິ່ງຂຶ້ນ.
ທີ່ມາ: ຂ່າວສານອຸດສາຫະກຳ ແລະ ການຄ້າ
#ກະຊວງອຸດສາຫະກຳແລະການຄ້າ #ເສດຖະກິດລາວ #ລາຄາສິນຄ້າ
