Deepak Trivedi

વચ્ચે ઠેકી પડવું છે ....દીપક ત્રિવેદી

ડાબું હો કે છો ને જમણું વચ્ચે ઠેકી પડવું છે
આ ફેરે તો એથી બમણું વચ્ચે ઠેકી પડવું છે

અડખે પડખે બોઘા જેવાં માણસ ઊભા ઠેકો લઇને
ઉગમણું કે હો આથમણું વચ્ચે ઠેકી પડવું છે

વર્ષોથી મારા મોભીઓ એને ભજતાં ભાવ થકી
લાગે વહરું કે સોહમણું વચ્ચે ઠેકી પડવું છે

જુઠ્ઠા છે જે જુઠ્ઠા છે એ ઢગ પાણાનો મારે મન
હો કદરૂપું કે હો નમણું વચ્ચે ઠેકી પડવું છે

સૌ ઊભા છે સામેસામા મૂછોની મરજાદા લઇ
મૂંગુ હો કે હો બાઝકણું વચ્ચે ઠેકી પડવું છે
...દીપક ત્રિવેદી

સમગ્ર ભારતમાં લોકડાઉન વેળાએ ....

રામ- તુલસીદાસ ..... દીપક ત્રિવેદી

હોય પુસ્તક પાસમાં તો એકલાં જીવી શકો
મન રહે ઉલ્લાસમાં તો એકલાં જીવી શકો
આપણે જોયા કરી હર વખત બીજાની ક્ષણો
નિજ સમયનાં શ્વાસમાં તો એકલાં જીવી શકો
ખુદ રચેલાં બાગમાં ફરતાં રહો જો આપ તો
આભ, વર્તુળ , વ્યાસમાં તો એકલાં જીવી શકો
કોઇનાં લઈ ચંદ્રમા ઠેકડા માર્યા હશે
લ્યો, હવે અમ્માસમાં તો એકલાં જીવી શકો
હા, તમે જીવ્યાં નથી એના સહારે જિંદગી
રામ, તુલસીદાસમાં તો એકલાં જીવી શકો

દીપક ત્રિવેદી