The Baphnom Daily

ពលរដ្ឋប្រមាណជិត២០០នាក់ ទិញផ្ទះក្នុងគម្រោងឧកញ៉ាឡេង ណាវ៉ាត្រា តវ៉ាបិទផ្លូវនៅមុខក្រសួងដែនដី

នៅព្រឹកថ្ងៃព្រហស្បតិ៍ ទី១៥ ខែមករា ប្រជាពលរដ្ឋប្រមាណជិត២០០នាក់ ដែលបានទិញផ្ទះនៅក្នុងគម្រោងរបស់ឧកញ៉ា ឡេង ណាវ៉ាត្រា បានប្រមូលផ្ដុំគ្នាតវ៉ាបិទផ្លូវនៅមុខក្រសួងរៀបចំដែនដី ដោយស្នើឱ្យថ្នាក់ដឹកនាំ និងម្ចាស់គម្រោង ធ្វើការដោះស្រាយ និងអនុវត្តតាមកិច្ចសន្យា។

ពាក់ព័ន្ធនឹងករណីនេះ នាយកខុទ្ទការល័យក្រសួងរៀបចំដែនដីលោក សុំ មនោរម្យ ដែលជាអ្នកទទួលបន្ទុកក្នុងការដោះស្រាយ ហើយត្រូវបានដក់ស្រង់សម្ដីដោយសមាគមការពារសិទ្ធិមនុស្សអាដហុក បានបញ្ជាក់ឱ្យប្រជាពលរដ្ឋបើកផ្លូវឡើងវិញ និងរងចាំការដោះស្រាយ ដោយសន្យាជាមួយអ្នកតវ៉ា ថា យ៉ាងយូរខែឧសភា នឹងចេញប្លង់កម្មសិទ្ធិឱ្យពលរដ្ឋ ហើយជំរុញឱ្យមានការសាងសង់ផ្ទះតាមកិច្ចសន្យា។

យោងតាមអក្សរនៅលើបដាដែលប្រជាពលរដ្ឋបានកាន់ក្នុងអំឡុងពេលបិទផ្លូវនៅមុខក្រសួងរៀបចំដែនដី ស្ថិតក្នុងសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ពួកគេបានទាមទារឱ្យឧកញ៉ា ឡេង ណាវ៉ាត្រា ប្រគល់ផ្ទះដែលបានទិញនៅក្នុងប្លុក គម្រោង៦A ហើយប្រសិនបើមិនមានផ្ទះប្រគល់ឱ្យទេនោះ ពួកគេក៏ទាមទារឱ្យលោក ឡេង ណាវ៉ាត្រា បង្វិលប្រាក់ត្រលប់មកវិញផងដែរ។
រូបភាព៖ វិទ្យុស្ត្រី Women's Radio
#ពលរដ្ឋតវ៉ាបុរីឡេងណាវ៉ាត្រា