SWABI PRESS

(انسانیت کی خدمت کا روشن ستارہ/رویز خان یوسفزئی)
صوابی:رمضان المبارک کے بابرکت مہینے میں جہاں مسلمان نیکیوں کے حصول اور عبادات میں مصروف ہیں، وہیں انسانیت کی خدمت کرنے والے افراد بھی دکھی اور نادار لوگوں کی مدد میں پیش پیش ہیں۔ اسی سلسلے میں چھوٹا لاہور کے معروف سماجی کارکن رویز خان یوسفزئی گزشتہ کئی برسوں سے مستحق اور غریب افراد کی خاموشی سے مدد کر رہے ہیں۔رویز خان یوسفزئی اپنے گلی محلوں اور دیہات میں ایسے سفید پوش اور نادار افراد کو تلاش کرتے ہیں جو رمضان میں بھی خشک روٹی اور پانی سے روزہ افطار کرنے پر مجبور ہوتے ہیں۔ ایسے کئی خاندان ایسے بھی ہیں جو عید کے موقع پر اپنے بچوں کے لیے نئے کپڑے یا جوتے خریدنے کی استطاعت نہیں رکھتے۔ ان ضرورت مند افراد کی مدد کے لیے رویز خان یوسفزئی مسلسل کوشاں رہتے ہیں اور بلا تفریق انسانیت کی خدمت کر رہے ہیں۔
ان کے اس فلاحی کام میں اندرونِ ملک اور بیرونِ ملک مقیم مخیر حضرات بھی بھرپور تعاون کر رہے ہیں۔ اسی سلسلے میں گزشتہ برسوں کی طرح رواں سال بھی رمضان المبارک کے دوران رویز خان یوسفزئی نے صوابی نامہ نیوز آفس کو 25 مستحق افراد کے لیے فوڈ پیکجز فراہم کیے جن میں گھی، چینی اور آٹا شامل تھے۔ یہ فوڈ پیکجز صوابی نامہ نیوز آفس میں 25 غریب اور مستحق افراد میں تقسیم کیے گئے۔مزید برآں رمضان المبارک کے دوران رویز خان یوسفزئی روزانہ افطاری سے قبل مستحق افراد کے لیے خصوصی انتظامات بھی کرتے ہیں۔ اس مقصد کے لیے روزانہ کی بنیاد پر رمضان تندور اور چاول کی دیگوں کا اہتمام کیا جاتا ہے جہاں غریب اور نادار افراد کو مفت تندوری روٹیاں، سالن اور چاول فراہم کیے جاتے ہیں۔ اس کے علاوہ وقتاً فوقتاً مستحق خاندانوں میں راشن بھی تقسیم کیا جاتا ہے۔رویز خان یوسفزئی صرف رمضان تک محدود نہیں بلکہ وہ غریب اور نادار خاندانوں کی بیٹیوں کی شادی کے لیے جہیز کا سامان بھی مفت فراہم کرتے ہیں۔ عید کے موقع پر غریب خاندانوں کے لیے کپڑوں اور دیگر ضروریات کی فراہمی کا بھی خصوصی اہتمام کیا جاتا ہے جس سے متعدد مستحق خاندان مستفید ہو رہے ہیں۔اہلِ علاقہ نے رویز خان یوسفزئی کی سماجی خدمات کو سراہتے ہوئے دعا کی ہے کہ اللہ تعالیٰ انہیں اس کارِ خیر کا بہترین اجر عطا فرمائے اور آئندہ بھی انسانیت کی خدمت جاری رکھنے کی توفیق دے۔ (صوابی پریس)