Spogmai FM

د اسراییل لومړی وزیر بنیامین نتنیاهو د پارلمان په غونډه کې د مخالفو استازو له سختو اعتراضونو او د «شرموونکی» او «بهر ووځه» شعارونو سره مخ شو. دغه اعتراضونه د ارتودوکس یهودانو د اجباري پوځي خدمت د معافیت په اړه د جنجالي طرحې د بحث پر مهال وشول. د مخالفو استازو پرله‌پسې شعارونو د نتنیاهو وینا څو ځله ودروله او د غونډې فضا یې ترینګلې کړه. له خپرو شویو ویډیوګانو ښکاري چې نتنیاهو د اعتراضونو په منځ کې د پارلمان تالار پرېږدي. یاده طرحه په اسراییل کې له پراخو سیاسي اختلافونو او د مخالفو ګوندونو د سخت مخالفت سره مخ ده.

په کراچۍ کې د افغانستان سرکونسل عبدالجبار تخاري ویلي، چې د پاکستان د سند ایالت په پوهنتونونو کې پر زده‌کړو بوخت افغان محصلین تر اوسه له کومې ستونزې سره نه دي مخ شوي، خو د هغوی د ویزو له پای ته رسېدو وروسته تر اوسه نوې ویزې نه دي ورکړل شوې. نوموړي زیاته کړې، چې د پاکستان په ځینو نورو ایالتونو کې افغان محصلین له ستونزو سره مخ دي او ځینې یې د جبري ایستلو له ګواښ سره هم مخ شوي دي.