Radio Voix de la Réconciliation

*_Ijambo ry’Umukama, indwi y’9 yo mu gihe gisanzwe co mu mwaka, ku wa mbere, années paires_*

*IGISOMWA CA MBERE*

_Ivyo dusoma mw’Ikete rya kabiri ry’Umutumwa Petero (1, 2-7)_

Ncuti zanje, Umugisha n’amahoro nibibasagararemwo mu bumenyi bw’Imana n’ubwa Yezu Umukama wacu. Kuko ububasha bw’Imana bwatugabiye ivy’ubuzima n’ubuyobokamana vyose mu kutumenyesha uwaduhamagaje ubuninahazwa n’ubwiza bwiwe bwite, kuri ivyo nyene yaratugabiye ya mihango y’agaciro kandi y’agakura, kugira ngo bibatere gusangira n’Imana kamere yayo mu kuva mw’ibore ry’igomwe ry’ivy’isi; mbere kubera ico nyene, nimushishikare rwose, ngo mubangikanye ukwemera n’ubwiza, ubwiza n’ubumenyi, ubumenyi n’ubwirinzi, ubwirinzi n’ubwiyumanganyi, ubwiyumanganyi n’ubuyobokamana, ubuyobokamana n’ubukundanyi, ubukundanyi n’urukundo.

```Iryo ni Ijambo ry’Umukama.```

*IZABURI 90 (91) 1-2, 14-15ab, 16*

_Icit. Mana yanje, ni Wewe nizeye._

Iyo nkingiwe n’inkinzo y’Uwuhangamye mw’ijuru, nkibera mw’irebe ry’Umushoboravyose, ndibuka Umukama ari we mahungiro n’amirukiro yanje, Imana yanje nizeye.

«Nzomukimbagiza ko yanyishimikije, nzomukuza ko atiyobagije izina ryanje. Aranyakura nkamwitaba, mu marushwa sindamuvirira.

Ndamuruhura nkamuninahaza, nzomuha kuramba kandi nzomuhishurira urukiza rwanje.»

*INKURU NZIZA*

*_Aleluya, Aleluya_*

_Imana yaduhaye ubuzima bw’ijambo ryayo ry’ukuri, kugira ngo tube imfura mu biremwa vyayo vyose._

*_Aleluya_*

_Ivyo dusoma mu Nkuru nziza ya Yezu Kristu nk’uko yashikirijwe na Mariko (12, 1-12)_

*Yezu atangura kubwira abigisha n’abashingantahe mu migani ati: «Umuntu yateye imizabibu, arayizitira, yimba mw’ibuye ubwato bw’ukuganiramwo, ayubakamwo inzu y’irerekero, hanyuma ayishinga abarimyi, aca yigira mu mahanga. Igihe kigeze, atuma umusuku kuri ba barimyi ngo bamuhe uruhara rwiwe ku vyamwa vya ya mizabibu. Bo rero baramucakira, baramwegagura, bamusubiza inyuma iminwe igaragara. Arongera abatumako uwundi musuku, uyo na we bamukomeretsa umutwe kandi baramutuka baramujora. Arungika uwundi, we rero baramwica; abandi benshi babagira uko: bamwe barabakubita, abandi barabica. Yari asigaranye umuntu, umwana wiwe yakunda cane; ni we yabarungikiye ubw’imperuka, yibwira ati: Umwananje baza kumusonera. Ariko, ba barimyi bamubonye baryana akara, bati: Ng’uyu samuragwa; nimuze tumwice, iragi rizoba iryacu. Baramufata, baramwica bamurenza uruzitiro rw’imizabibu. None, nyene imizabibu azogira ate? Azoza atikize abo barimyi, imizabibu na yo ayishinge abandi. Mbe, ntimwasomye ha hantu mu gitabu ceranda ngo: Ibuye abubatsi bari bataye ni ryo ryabaye iteranirizo ry’inzu? Umukama ni we yavyigiriye kandi ni agahore kuri twebwe.» Kuva ubwo, barondera ingene bomufata, ariko bagatinya ishengero. Bari bumvise neza ko uyo mugani ari bo awuhinyika. Ni ko kumureka bakagenda.*

```Iryo ni Ijambo ry’Umukama.```

*_Ijambo ry’Umukama, umusi mukuru w’Ubutatu Bweranda rwose (A)_*

```Umusi w’Umukama ukurikira Pentekoti.```

*IGISOMWA CA MBERE*

_Ivyo dusoma mu gitabu c’Ihunguka 34, 4-6. 8-9_

*_(Ndi Umukama, ndi Umukama Imana nyenimpuhwe n’imbabazi)_*

Muri irya misi, 4 Musa yabâjije ibisate vy’amabuye bisa n’ivya mbere, araheza avyuka kare mu gitondo nk’uko Umukama yari yabimutegetse, aduga ku musozi Sinayi afise mu minwe vya bisate bibiri vy’amabuye. 5 Umukama amanuka mu gicu, ahagarara ngaho iruhande yiwe, asamiriza izina Umukama. 6 Umukama aca imbere yiwe avuga ati: «Ndi Umukama, Ndi Umukama Imana nyenimpuhwe n’imbabazi itihutira gushavura, yuzuye ubuntu n’ukuri». 8 Ubwo nyene Musa aca arunama, akubita inkoro hasi. 9 Hanyuma avuga ati: «Ninaba naratewe iteka mu maso yawe ga Mukama, Umukama wanje nagendere hagati yacu, n’aho ari abantu badadaza igikanu, kandi uratubabarira ku caha cacu no ku gicumuro cacu, wongere utugire icibare cawe».

```Iryo ni Ijambo ry’Umukama.```

*IZABURI (Daniyeli) 3 52, 53-54, 55-56*

_Icit. Nushimagizwe wongere uhayagizwe imyaka yose._

52 Nuhezagirwe Mukama Mana ya ba sokuru, n’ushimagizwe wongere uhayagizwe imyaka yose. Nihahezagirwe izina ryawe ryeranda kandi rininahaye, nirishimagizwe, rihayagizwe imyaka yose! *_Icit._*

53 Nuhezagirwe mu ngoro y’ubuninahazwa bwawe bweranda, shimagizwa wongere uhayagizwe kuruta vyose imyaka yose! 54 Nuhezagirwe ku ntebe y’ubwami bwawe, n’ushimagizwe wongere uhayagizwe kuruta vyose imyaka yose! *_Icit._*

55 Nuhezagirwe wewe usuzuma inyenga uri ku ntebe y’ubwami hejuru y’abakerubini, nushimagizwe wongere uhayagizwe kuruta vyose imyaka yose! 56 Nuhezagirwe mu kirere c’ijuru, nushimagizwe wongere uhayagizwe kuruta vyose imyaka yose! *_Icit._*

*IGISOMWA CA KABIRI*

_Ivyo dusoma mw’ikete rya kabiri umutumwa Pawulo yandikiye Abanyakorenti 13, 11-13_

*_(Inema ya Yezu Kristu, urukundo rw’Imana n’ubunywanyi bwa Mutima Mweranda)_*

11 Benewacu, nimunezerwe, murondere ubweranda, muremeshanye, muhuze ivyiyumviro, mwamane amahoro, niho Imana y’urukundo n’amahoro izobana namwe. 12 Nimuramukanye namwe mu guhoberana nk’aberanda. Aberanda bose barabaganutsa. 13 Muragahorane mwese inema y’Umukama Yezu Kristu, urukundo rw’Imana n’ubunywanyi bwa Mutima Mweranda.

```Iryo ni Ijambo ry’Umukama.```

*INKURU NZIZA*

*_Aleluya. Aleluya_*

_Haninahazwe Data, Mwana na Mutima Mweranda; Imana iriho, iyamyeho n’iyigira ngo ize! (Ivyahishuwe 1, 8)_

*_Aleluya_*

_Ivyo dusoma mu Nkuru Nziza ya Yezu Kristu nk’uko yashikirijwe na Yohani 3, 16-18_

*_(Imana yarungitse Umwana wayo kw’isi kugira ngo ikire ku bwiwe)_*

*16 Imana yarakunze isi gushika n’aho itanga Umwana wayo w’ikinege, ngo uwumwemeye wese ntapfe, aronke riho ubuzima budahera. 17 Erega, Imana ntiyarungitse Umwana wayo kw’isi ngo acire isi urubanza, ahubwo yamurungitse ngo isi ikire ku bwiwe. 18 Uwumwemera ntiyāgîrwa n’urubanza, ariko uwutemera yarâgiriwe n’urubanza, kuko yanse kwemera izina ry’Umwana w’ikinege w’Imana.*

```Iryo ni Ijambo ry’Umukama.```

🗞 Umuryango wa Ekleziya Gatolika ya Muyinga ubicishije mu gisata c'Abalayike urabatumiye mwebwe muba mu gisigara ca muvuka muriyo Diyoseze, mu kiganiro muzogirana kuri uyu w'Imana igenekerezo rya 31 Rusama 2026.

📌

*_Ijambo ry’Umukama, indwi y’8 yo mu gihe gisanzwe co mu mwaka, ku wa gatandatu, années paires_*

*IGISOMWA CA MBERE*

_Ivyo dusoma mw’Ikete ry’Umutumwa Yuda-Tadeyo (17, 20-25)_

Bakunzi banje, nimwibuke ivyabuwe n’abatumwa b’Umukama wacu Yezu Kristu. Nimwishimikize ukwemera kwanyu kweranda cane. Nimusabe muri Mutima Mweranda, nimwizigame mu rukundo rw’Imana, nimwame muhahamira ikigongwe c’Umukama wacu Yezu Kristu azobashikiriza ubuzima bwamaho. Abatararimbuka mubahanure, mubakize mubokore mu muriro ; abandi na bo mubagirire imbabazi kandi mutinye, muhunge n’impuzu nyene yandujwe n’umubiri wabo. Na we, Uwushobora kubazigama ngo ntimutsitare no kubarengukisha imbere y’ubuninahazwa bwiwe mutagira amahinyu kandi muri mu kanyamuneza, Imana imwe rudende ari yo Mukiza wacu ku bwa Yezu Kristu Umukama wacu, ni we akwiye ubuninahazwa, inganji, ubukomezi n’ububasha kuva kera na rindi, ubu no mu myaka yose. Amen.

```Iryo ni Ijambo ry’Umukama.```

*IZABURI 62 (63) 2, 3-4, 5-6*

_Icit. Umutima wanje urakunyotewe, Mukama, Mana mfise._

Mana, ni Wewe Mana yanje mpora ndondera kuva mu gitondo ca kare; umutima wanje urakunyotewe. Nanje ndakwipfuza. Muri iyi si yase imigaga ibuze ikinyotera.

Ni ko, narakubonye mu ngoro yawe, ndihweza ububasha n’ubuninahazwa bwawe; niho urukundo rwawe rwandutira amagara, ngashobora kugushimagiza.

Ni ko nzoguma nguhezagira umwanya nkiriho, nzokwayira iminwe izina ryawe; niho nzohimba nk’uwagaburiwe imisoso n’ibinure, nzoguhaya mpimbarwe n’ukuguhoza mu kanwa.

*INKURU NZIZA*

*_Aleluya, Aleluya_*

_Yeruzalemu, igine Umukama, ni we arungikira isi ijambo ryiwe._

*_Aleluya_*

_Ivyo dusoma mu Nkuru nziza ya Yezu Kristu nk’uko yashikirijwe na Mariko (11,27-33)_

*Yezu n’abigishwa biwe basubira kugaruka i Yeruzalemu. Igihe Yezu yari mu Ngoro y’Imana agendagenda, abaherezankuka bakuru, abanditsi n’abakurambere baramwegera bati: «Ubukuru bw’uko ukora ivyo ni ubuhe? Mbere nako uwaguhaye ubwo bukuru bw’ugukora utyo ni nde?» Yezu arabishura ati: «Ndababajije nanje ijambo rimwe. Nyishure, nanje ndababwira iyo nkura ubukuru bw’ugukora ntyo. Mbega, ibatisimu ya Yohani yaturuka mw’ijuru canke mu bantu? Nyishure.» Na bo bibwira mu mutima bati: «Nitwishura tuti: Mw’ijuru, atubwira ati: None se, ko mutamwemeye? Naho twishure tuti: Mu bantu?» Batinya ishengero, kuko bose bemera ko Yohani yari umuhanuzi w’ukuri. Bishura rero Yezu bati: «Ntitubizi.» Yezu na we abishura ati: «Nanje rero simbabwira ubukuru butuma nkora ivyo.»*

```Iryo ni Ijambo ry’Umukama.```

*_Ijambo ry’Umukama, indwi y’8 yo mu gihe gisanzwe co mu mwaka, ku wa gatanu, années paires_*

*IGISOMWA CA MBERE*

_Ivyo dusoma mw’Ikete rya mbere ry’Umutumwa Petero (4, 7-13)_

Bakunzi banje, Umuhero wa vyose uri hafi: nimwitonde rero kandi nimwigerere ngo mubone uburyo bwo gusenga: imbere ya vyose, nimugiriranire urukundo rwa cane, kuko urukundo rupfuka isinzi ry’ibicumuro. Nimuhane indaro mutidodomba. Nk’uko umwe wese muri mwebwe yahawe ingabirano y’Imana, abe ari ko muyifashisha abandi nk’abashikiriza b’iyo ngabirano Imana igaba ku bwinshi. Uwuramutse avuga ijambo, n’arivuge nk’ijambo rivuye ku Mana; na we uwuramutse akorera abandi, n’abigire nk’uwahawe n’Imana ubwo bukuru; kugira ngo muri vyose Imana ininahazwe ku bwa Yezu Kristu afise ubuninahazwa n’inganji mu myaka n’imyaka. Amen. Bakunzi banje, ntimutangazwe na wa muriro wabadutsemwo ngo mugeragezwe, nk’uko akatabonetse koba kabadutsemwo; mugabo, nk’uko musangira amagorwa ya Kristu abe ari ko munezerwa, kugira ngo no ku musi w’ihishurwa ry’ubuninahazwa bwiwe muze munezerwe muhimbarwe.

```Iryo ni Ijambo ry’Umukama.```

*IZABURI 95 (96) 10, 11-12a, 12b-13b*

_Icit. Umukama ariko araza ngo acire urubanza isi._

Cire agace abanyamahanga muti: «Umukama ari ku ngoma!» ni we yagize isi itayegayega; ni we acira urubanza ibihugu akurikije ubutungane.

Ijuru nirihimbarwe, isi na yo itārîke, ikiyaga n’ivyo gitunze bitere akamo, imirima n’ivyamwa nibihimbarwe!

Ibiti vyo mw’idonzi binezerwe, n’uko bibonye Umukama ariko araza, ngo acire urubanza isi.

*INKURU NZIZA*

*_Aleluya, aleluya_*

_Nimwazigama ijambo ry’ubuzima, muzoba isôko ry’umuco wakaka kw’isi._

*_Aleluya_*

_Ivyo dusoma mu Nkuru nziza ya Yezu Kristu nk’uko yashikirijwe na Mariko (11, 11-25)_

*Hanyuma, Yezu yinjira mu gisengero. Amaze kwihweza vyose, buhaye bwira, asohokana na ba bandi cumi na babiri, bagenda i Betaniya. Bukeye, bavuye i Betaniya, Yezu yumva arashonje. Ngo abone kure umutenahi wuzuyeko ibibabi, araza ngo arabe ko yohakura icamwa, ariko amaze kwegera, asanga ni ibibabi bisa. Nka ko, nticari igihe c’amatenahi. Abwira rero nya mutenahi ati: «Ntihabe hakigira umuntu n’umwe akurya icamwa!» Na bo abigishwa biwe baravyumva. Bashika rero i Yeruzalemu. Na we Yezu ngo yinjire mu gisengero, aja mu vyo kwirukana abavunja amafaranga n’abagurira mu gisengero, atembagaza ameza y’abavunja amafaranga n’intebe z’ababunza inuma, kandi ntihagira n’umwe arekura ngo acane ikintu mu gisengero. Ni ko kubigisha ati: «None ntihanditswe ngo: Ingoro yanje izokwitwa ingoro y’ugusenga kw’ibihugu vyose? Mweho mwayigize uburumba bw’abasuma.» Ivyo bigera mu gutwi kw’abaherezankuka n’abigisha, baja mu vyo kurondera ingene bomwica: nkako baramutinya, kuko igihugu cose cari catamariwe n’ivyo yigisha. Buhaye bwira, Yezu n’abigishwa biwe bava mu gisagara. Bahindukiye mu gitondo kare, babona ca giti c’umutenahi cumye no mu mizi. Petero rero aribuka, abwira Yezu ati: «Mwigisha, raba! Wa mutenahi wavuma wumye.» Na we Yezu abishura ati: «Be mwemera Imana. Ni ivy’ukuri ndabibabwiye: hagize uwubwira uyo musozi ati: Ikure aho, wite mu kiyaga, adahigima mu mutima wiwe ariko yemera ko ico avuze kiba, azobona kigirwa. Ni co gituma mbabwiye nti: Ico musabisha igisabisho cose, nimwemera ko muza kukironka, muzokironka. Iyo muhagaze naho ngo musabe, hari ako mufitiye umuntu, nimumurekurire, ngo So ari mw’ijuru abarekurire namwe ivyo mwamututse.»*

```Iryo ni Ijambo ry’Umukama.```