Mosoj Chaski Ministries

We will be closing this page in a few days... please look for us at Radio Mosoj Chaski.

IMAPIS YACHAKUNPUNI
Ñawiriy: Salmo 51:1-19

Uj mamaqa iskay juch'uy qhari wawakunayoj kasqa. Chantá uj kuti chay mamaqa sandiata qhatumanta rantispa, wasinman apasqa. Chantá ujtawan qhatuman kutinan kasqa, chaypachataj mamankoqa chay iskay lloqallitunkunata nisqa: Wawasníy, ujtawan risaj qhatuman. Kay sandiataqa ama mikhunkichejrajchu; q'ayalla tataykichej chayamojtin, tukuyninchej mikhusun, nispa. Chayta niytawantaj, llojsisqa chay mamaqa. Tumpamantawantaj, chay ujnin lloqallitoqa nisqa: Kay sandiataqa munayman llamiriyta. Manachu uj chhikanta q'allurikusunman? nispa. Chay ujpis munallasqataj, jinataj uj chhikanta q'alluspa, llamirisqanku. May misk'i kasqanraykutajrí, ujtawan q'allullasqankutaj; jinamanta jinaqa tukuynin sandiata tukurparisqanku. Mamanku ama yachananpaj, sandíaj mujunta jawapi p'ampaykamusqanku. Chantá mamanku chayamojtin, paykuna llullakuspa willasqanku: B***o mikhurparisqa, nispa. Uj iskay semanamantarí uj p'unchay chay mamaqa rikusqa chay sandía mujusqa p'uturamusqankuta. Chayta rikuytawan, wawankunata wajyaspa, chayta rikuchisqa, rikuchiytawantaj ujtakama seq'osqa: Chayqa mana kasuwasqaykichejmanta, nispa. Chaymantataj ujtawanpis seq'ollasqataj: Kaytaj llullakuwasqaykichejmanta, nispa. Arí, cheqamanta jallp'a urapi ruwasqapis yachakunpuni. Diosrí ima juchanchejtapis rikunpuni.

Ima ruwasqanchejtapis mashkha unaytapis atisunman
pakayta; Diostajrí tukuy ima ruwasqanchejta rikuwanchej.

MUNANMANCHU DIOS NOQANEJTA PAYPAJ LLANK'AYTA?
Ñawiriy: 1 Corintios 1:26-31

Tata Diospaj llank'anaqa mana may yachayniyoj runakunallapajchu kashan, astawanqa pikunachus pisipaj qhawasqa kaspapis, Diospaj llank'anapaj sonqoyoj kanku, chaykunapajpis kashallantaj. Runa kayninchejpi Tata Diosta nisunman: Noqaqa ni imapis kanichu, mana imatapis ruwayta yachanichu, ashkha kutipi pantaykuni; chaywanpis cheqamantachu noqanejta Qanpaj llank'awaj, Diosníy? nispa. Chay tapuyman kuticheyqa Diosmanta Qhelqasqapi kashan. Moisesqa atiyniyoj runakunawan parlayta manchachikorqa; iskayrayaj runa karqa. Chaywanpis Diospa yanapayninwan t'ukuna imakunata ruwarqa. Tata Diosqa michejkunata, challwirikunata, chajrata tarpoj runakunata ima ajllakorqa Paypaj llank'anankupaj chantá nisqanta qhelqanankupaj ima. Jinallataj k'ulluta llajllaj runa, mana kasu ruwana sipas ima Diospa Churintapis uywarqanku. Kunanpis Diosqa chay jina runakunanejta llank'ashallantaj. Mana ñawiriyta yachaj uj campo warmeqa evangeliota atin willarayta, wakinkunataj creenku. Mana institutopi estudiayta atej uj hermanoqa Jesucristoj ujnin iglesianta michiyta atin, chay iglesiataj wiñan. Ashkha tapukunchej: Atiymanchu Diospaj imatapis ruwayta? nispa. Tata Diostaj kutichiwanchej: Noqaqa ajllakuni wampupaj qhawasqa kajta yachayniyojkunata p'enqachinanpaj, nispa. Diosqa pisipaj qhawasqa runakunatapuni ajllakun Paypaj llank'ananchejpaj.

Yachayniyoj runakunaj qhesachasqan runakuna atinchej
t'ukuna ruwaykunata ruwayta Diospa yanapayninwan.

DIOSPA MANKA RUWANAN T'URU KANCHEJ
Ñawiriy: Jeremías 18:1-10

Profeta Jeremiasqa Diosmanta yachakorqa ashkhata manka llut'a runaj wasinpi. Pay rikusqa chay manka llut'a runata t'urumanta k'achitu mankata ruwashajta, chantá ruwashajtin, chay mosoj mankaqa ñat'uykukusqa. Chay manka llut'aqa watejmanta t'uruman tukuchisqa, chay mankata ruwasharqa chaytaqa, chantá waj jina mankata ruwasqa munayninman jina, Jeremías qhawashajtin. Chayman rijch'asqata Diosqa kawsayninchejta cheqanchan mana walej ruwaykunamanta. Sapa kuti Diosqa munayninman jina cheqanchashan kawsayninchejtaqa. Mana walej ruwayninchejmanta k'amiwanchej, yachachillawanchejtaj allin ruwaykunata ruwayta. Chantapis chay manka llut'a runaqa mana manchachikuspa makinwan q'allperqa chay t'urutaqa. Kikillantataj Tata Diosqa atiyninwan kawsayninchejta munayninman jina apaykachan, allin kawsayniyoj kananchejkama. Chantá Diosqa rikorqa uj Salvajta necesitasqanchejta juchanchejmanta kacharichinawanchejpaj, chaypajtaj kachamorqa Churinta juchanchejrayku cruzpi chakatasqa wañunamnpaj. Jesucristota Salvawajninchejpaj rejsikapusqanchejmantapacha mosoj kawsayniyoj kanchej, chay mosoj kawsayninchejtataj Tata Dios cheqanyachin munasqanman jina, Jesucristoj rijch'ayninman. Dios kashan manka llut'ajkunaj yachachejnenqa.

Kawsayniykita jayway Diosman, Paytaj kawsasqaykimanta aswan walejta kawsachisonqa.

The staff is recording a dramatized version of the book of Acts these days. I´m sure they would appreciate your prayers.