Perfect Shot

اجمل وادي في العالم Lauterbrunnen-سويسرا 🇨🇭
كتير شفت فيديوهات وصور عن هاد المكان وجماله بس ما توقعت يكون هيك جميل على الطبيعة.
اجمل وادي في العالم موجود قي قرية Lauterbrunnen في سويسرا 🇨🇭 رحنا عليه من مكان اقامتنا في قرية برينز بالقطار ، سعر التذكرة ٢١ يورو ، تقريبا ٢٢ فرنك سويسري
مدة الرحلة بالقطار من محطة برينز الى محطة قرية Lauterbrunnen ساعة تقريبا
المكان كتير حلو بتشوف من خلاله المناظر الجميلة وقمم جبال الالب المغطية بالتلج و الصخور الضخمة والمناظر الطبيعية من اشجار و شلالات
هاد الواد موجود فيه ٧٣ شلال المكان في كتير مشي ومسارع صعب للصعود للشلال بس المشي فيه ما بحس الواحد بتعب لانه بكون مندمج و مستمتع بالمناظر الطبيعية الجميله حوليه
وللي ما بقدر يمشي او بتعب في باصات بتوصل من المحطة لنص الواد ،وازا الواحد كان جوعان 😅المكان في مطاعم وكافيهات واكشاك على طول الطريق ، بس اسعارهم غاليه مقارنة مع باقي الاماكن
بنصح الكل يزور هاد المكان ازا سافرتو على سويسرا 🇨🇭
هاي الصور من الجولة في الواد
و كمان عملت فيديو على اليوتيوب عن الجولة ازا بتحبو تشوفه بجودة 4K بتمنى تستمتعو فيه

رابط الفيديو 👇👇👇

https://youtu.be/ukZwhwqUXJo

كل عام وانتم بالف خير
عيد اضحى مبارك 🐑

الجزء التاني من رحلتنا لسويسرا
جرينديل فولد(Grindelwald) -سويسرا 🇨🇭
ملاحظة ⚠️ " الي شايف البوست طويل او ما بحب يقرا بقدر يشوف الفيديو على اليوتيوب ملخص كلشي فيه
في اليوم التاني من رحلتنا توجهنا لقرية Grindelwald بالقطار من قرية برينز تكلفة التذكرة ٢١ فرنك سويسري يعني تقريبا ٢٠ يورو والطريق أخدت تقريبا ساعه و نص او ممكن توصلوها بوقت اقل بالسيارة
وتعتبر Grindelwald من اهم الاماكن السياحية واشهرها في في سويسرا وبنصح الكل يزور هاد المكان ازا كانت زيارته لاول مرة لسويسرا
واحنا ماشيين بالقطار من كل الجهات بتشوف الطبيعة الجميلة و ابداع الخالق في خلقه( الجبال العالية وقمممها المغطية بالثلوج و الغيوم المنخفضة و السماء الزرقاء، والبيوت الخشبية) كانها لوحة فنية مرسومة رسم
وعلى طول الطريق الواحد ما بمل او بحس انه الطريق طويلة
ولما توصل القرية في عدة نشاطات او ومغامرات تسمتع فيها مثل ركوب التلفريك و تكلفته ٣٢ يورو( للصعود بس😅)
و النسر الجبلي( هي عرباي زي الzip line بركبوها ٤ اشخاص و بتمشي مسافة ٨٠٠ متر بسرعه تقريبا ٨٠كم/ساعه)
و العربة الجبلية بتنزل فيها من اعلى القمة لاسفلها
وفي كمان الZip line و البسكليت
والاحسن انه تحجز التذاكر اونلاين لانه لما توصل هناك رح تستنى على الدور او ما رح يجيك دور بالمرة
رح احطلكم رابط حجز التذاكر باخر البوست
ولما توصل القمة فوق بتشوف النتاظر الطبيعة الجميلة و الهواء المنعش وبتكون بين الغيوم و قريب من التلج
و في مسار جبلي معلق بتقدر تمشيه بس خطير جدا مش لاصحاب القلوب الضعيفة او الي بخافو من المرتفعات ، و موجود باخره منصة عشان الواحد ياخد صور و من وراه جبال التلج العالية
بنصح الكل يزور المكان هاد
وازا بدك تنزل بالتلفريك برضه بدك تدفع ٣٢ يورو
او ازا بدك تنزلها مشي في مسار خاص للنزول مشي بس طويل كتير ممكن ياخد اكتر من ٤ ساعات
وهدىل الصور جزء من الجولة بتمنى تعجبكم
و عملت فيديو عن الجولة على اليوتيوب 4K ازا بتحبو تشوفه بدون ما تقراو البوست بتمنى يعجبكم

رابط الفيديو على اليوتيوب
https://youtu.be/D23I8d1PtyU

رايط حجز التذاكر اون لاين
https://www.jungfrau.ch/en-gb/grindelwaldfirst/

مسا الخير
اليوم رح انزلكم تفاصيل عن الجولة الاوروبية في بعض الدول
و اول بوست رح يكون عن مدينة ميلان في #اطاليا
وعملت كمان فيديو عن الرحلة للي بحب يشوفوه موجود رابط الفيديو على اليوتيوب بجودة 4K
ميلان -ايطاليا 🇮🇹
كتير قرأت وشفت صور عنها عالفيسبوك وانها من اجمل مدن اوروبا وبدها اقل اشي يومين او ٣ ايام
بس بعد ما رحتها الاسبوع الماضي اكتشفت انها مدينة عادية و ممكن تزور كل الاماكن المشهورة فيها بيوم واحد (طبعا هاي من وجهة نظري )
زرنا الاماكن الي شفتها ع الجروب زي الكنيسة و ساحة الدومو و سوق و فيتورو ايمانويل ومشينا بالزقاق مسافات كبيرة
واكلنا من بيتزا سبونتيني (بس للاسف ع حظنا كانت شوي محروقة من تحت )و حسيتها عادية و في ازكى منها
واكلنا من الجيلاتو و التيرامسو الايطالي من مكان بالسنتر قريب ع الكنيسة وللاسف طلعو عادية جدا جدا و التيرامسو زي كعكة عادية و عليها رشة كاكاو 😅مش زي ما كنت متخيل
بالمقابل ردينا اعطيناها فرصة تانية و اكلنا من محل بالزقاق بعيد عن السنتر
وطلع كتييير زاكي وارخص بكتير من المكان بالسنتر
وميلان فيها كتير نصابين و بضحكو على الناس سواء من المطاعم او الكافيهات بالسنتر او بساحة الدومو
و جولتنا كانت فيها نص يوم تقريبا
وهدول صور من الجولة في المدينة
وعملت فيديو على اليوتيوب عنها لكل الأماكن الي رحناها ازا بتحبو تشوفوه 👇👇👇

https://youtu.be/cBl4YS80DXY
#ميلان
#ايطاليا
#اوروبا

بعد غياب وانتظار هاد الخبر الجميل 😍
خبر جميل لعشاق السفر والمغامرات ✈️
الغاء فحص PCR للقادمين للمملكة الاردنية 🇯🇴 من كافة المعابر والمطارات اعتبارا من بداية اذار
والبقاء على التسجيل على المنصة
انتظرونا اليوم في اعلان عن رحلة اوروبا 🇪🇺 لشهر مايو ✈️
#سافر