Nairytale

افكار ومشاعر قصيرة عن احلامنا البعيدة ونعمل ايه واحنا بنشتغل من غير نتيجة، ويارب نروح اسبانيا مع الاسرة بقى يا جماعة

ده ليا ولكل حد حاليا في مرحلة التعب اللي ورا الكواليس اللي محدش شايفه غير صاحبه

لو حاسس ان الكلام ده بيعبر عنك او ممكن يبقى مفيد لحد تاني اعمله منشن او تبقى رائع وتعمل شير للبوست❤️

دي حاجة كنت كاتباها من فترة عشان افتكر بس انا كنت ببقى عاملة ازاي وكل حاجة مقفولة وباين اوي ان ملهاش حل وربنا بردو يحلها، من ساعة ما سافرت وانا فيه طبقة جديدة كده في حياتي وهي اني بجد مسئولة عن نفسي وانا تقريبا محستش الاحساس ده خالص غير لما سافرت، دايما الحمد لله ماما كانت واخدة بالها من كل حاجة وبابا في ضهري مهما حصل فمش شايلة حاجة يعني على قلبي ولا بفكر كتير، كنت عايشة زي الريشة كده مش خايفة من حاجة.

لحد ما بقيت عايزة حاجة اوي، عايزة ادخل الجامعة دي وعايزة اقنع بابا انه يسبني اسافر وعايزة ابقى مسئولة عن نفسي مادياً ونفسياً، اول ما روحت الجامعة فوّت حاجة مهمة عشان مصحتش ع المنبه عشان دايما ماما بتصحى عشاني بتصحيني وبتقعد نص ساعة رايحة جاية ع الاوضة لحد ماصحى، من بعد اليوم ده بقيت بصحى ع المنبه وده عمره ما حصل مهما كان ورايا ايه مكنتش بعرف اصحى ع المنبه

مبقتش عايزة اتقل على اهلي بمشاكل اكتر من كده كفاية اني بعيدة يعني فبقيت اتصرف من غير ما احكيلهم، بس انا كتكوتة على رأي ماما في الاخر فبستحمل بس وانا بموت اللي هو قلقانة وخايفة وتعبانة ومش عارفة انام ومش عارفة اذاكر، وربنا دايما بيراعيني، الوحيد اللي دايماً معايا

معلش طولت بس عايزة احكيلكوا موقف، في المطار كنت متأخرة شوية على الطيارة وقعدت ادعي ربنا في الطريق وافتكرت الاية اللي فيما معناها ألا نتوكل على الله وهو اللي دبرلنا كل حاجة، وافتكرت كل اللي عدى عليا تبقى قافلة وربنا يفتحها، دخلت المطار لقيت واحد من اللي شغالين في المطار جايلي بسرعة والله معرفش السبب لحد دلوقتي ممكن كان باين عليا متوترة او وقفت في مكان غلط بس يعني اول ما جه قالي طيارتك رقمها كام وعمل سيرش وخد شنطي وجري بيها لحد شركة الطيران وخلاني اعدي الطابور كله بالكارت بتاعه واتكلم مع الراجل بتاع البوردنج والراجل التاني راح مطلعلي البوردنج بسرعة من غير ما يوزن الشنط حتى وبعدين الراجل بتاع المطار جاب قلم وكتبلي على التيكت رقم البوابة ودخلني طابور تفتيش صغير اوي كنت تاني واحدة وقالي متخافيش وجري، قولتله شكرا بس كان نفسي اقوله ان ربنا بيستخدمه، كان نفسي اقوله ان ربنا بعته لما دعيت، انا مكلمتوش، دخلت المطار لقيته جايلي لوحده، ربنا مراعينا وشايفنا ومهما الدنيا أزمت والله ربنا سامعنا وهيحلها زي كل مرة، انا بس حبيت اقول الموقف ده عشان وانا بدعي فكرت في الاية دي وفعلا اطمنت خالص سبتها تماما على ربنا لا خوف ولا قلق ولا عياط، لما وصلت بقى عيطت، فلأي كتاكيت بتتابعني حالياً خلصوا الموضوع وبعدين عيطوا عادي بجد😂

عشرين حاجة اتعلمتهم في سن العشرين:

١. لو عايزة يبقى عندي حاجة مش عند معظم الناس محتاجة ابذل مجهود و وقت ورفاهية مش بيبذلها معظم الناس

٢. بتفكري مليون سنة وفي الاخر ربنا بيدبرها من عنده، دايما. بطلي تنسي

٣. صحابي مهمين، انا بحب صحابي ومش هبادلهم بأي شيء

٤. الجامعة مش هتعلمني كل حاجة عايزة اتعلمها فانا مش هديها كل وقتي، عشان اعرف ادي للباقي اللي عايزة اتعلمه

٥. الشغل جامد واللعب جامد احسن من النص نص ده، بس الراحة اساسي وده غير الشغل والمرح

٦. كام عادة بسيطة بينقذوا اليوم والصحة، مش هبقى ابدا مشغولة لدرجة اهمال صحتي

٧. بابا وماما بيعملوا كتير علشاننا، احنا بس مكناش شايفين كل حاجة، كل يوم بفهمهم احسن

٨. "يقول ياليتني قدمت لحياتي"، محتاجة اقدم لحياتي اللي بعد الدنيا، ربنا بيحبني ومديني فرصة

٩. من المهم تكون قواعدك واضحة وخطوطك الحمرا واضحة، ده مش هيخليك شرير

١٠. محدش من طينة مختلفة عني بغض النظر عن مكانتي الاجتماعية او مهنتي، كل الاشخاص تستحق مني نفس الاحترام والود ولو انا بفهم في حاجة اكتر من حد تاني انا مش مميزة وخارقة عنه، يقدر في اي وقت يبقى زيي واحسن مني فاحترامي ليه و ودي ومساعدتي غير مشروط

١١. الاكل من الهدايا المتكررة في اليوم الواحد، الحمد لله

١٢. هندم على اللي معملتوش و فوّته بس نادرا لما بندم اني دفعت في حاجة كنت عايزة اعملها اوي او ضيعت حصة عشان اعمل حاجة تحفة، طول ما عندي الفرصة هعيش

١٣. لو محتاجة اتسلق جبل عشان اتعلم اللي عايزاه، لما اتعلم ابني سلم عشان اللي بعدي ميتسلقش

١٤. محتاجة ابص ع الفرص اللي اقدر استخدمها، بتعرف تعمل ويبسايتس وعندك وقت؟ دوّر على ناس عايزة حد يعملّها ويبسايتس وبيع لهم خدماتك

١٥. كل حاجة ممكن اتعلمها، قدراتي قابلة للتوسع

١٦. الكلام بيفرق مع ماما وبابا واصحابي والغرباء، لسه فاكرة التحول السريع لنظرة الراجل بتاع العيش اللي ماما كانت بتجيب منه ومتسربعة وهو متسربع معاها لما قولتله تسلم ايدك ده ماما مبتحبش الا العيش بتاعكوا، جملة واحدة خلت وشه ينور، وده مش الوحيد

١٧. الحماس والارادة حاجات رائعة بس مقدرش اعتمد عليها للاسف، بتروح وتيجي مفيش حاجة غلط فيا، هي دي طبيعتها بس، جميلة لما بتيجي بس مينفعش تبقى الاساس

١٨. مفيش حاجة نهاية العالم، كله بيعدي وكله هيخلص في الاخر

١٩. لو عايزة اغير المكان اللي انا فيه، لازم ابدأ واعمل حاجة، مفيش حاجة بتتغير لوحدها

٢٠. آراء الناس حقيقي لا اهمية لها، ده حتى الاطفال بيتلقوا انتقادات بذيئة، استحالة دي يبقى مرجعي عن نفسي