Healthysolution

فيينا، عام 1846. المستشفى العام.
تخيل سبيطار كبير مقسوم لزوج أجنحة (Deux services) مخصصين للولادة، جايين لاصقين في بعضاهم:
الجناح رقم 1: فيه الأطباء وطلبة الطب.
الجناح رقم 2: فيه القابلات (Les sages-femmes) برك.
الغريب والمرعب أن النساء الحوامل كانوا يبكيو ويحلو باش يدخلو للجناح 2، ويهربو من الجناح 1 كأنه "جحيم".
علاش؟
لأن نسبة الموت في الجناح 1 كانت مرعبة (تصل لـ 18% !). النساء يدخلو يولدو، وموراها بـ 24 ساعة تجيهم حمى قاتلة ويموتو.
بينما في الجناح 2 (تاع القابلات)، النساء يولدو لاباس عليهم ويروحو لديارهم.
جاء طبيب شاب اسمو "إجناز سيملويس" (Ignaz Semmelweis)، وهبله هذا اللغز.
بدل التهوية؟ والو.
بدل وضعية الولادة؟ والو.
قال بالك "القسيس" لي يضرب الجرس يخوف النساء ويموتو بالخلعة؟ حبس الجرس... وبقاو يموتو.
حتى لواحد النهار، صرات حادثة كشفت المستور.
صديق لسيملويس (طبيب) انجرح صبعو بمشرط وهو يشرح في جثة (Autopsie)، ومات بعد أيام بنفس الأعراض تاع النساء الحوامل !
سيملويس فهم بلي "القاتل" راهو ينتقل من المشرحة (La morgue) لغرفة الولادة.
بصح الأطباء في هذاك الوقت ما كانوش يأمنو بـ "الجراثيم".
واش هو هذا "القاتل"؟
وعلاش الأطباء، هما النخبة، كانو يقتلو كثر من القابلات؟
والحل البسيط لي اكتشفو سيملويس خلى زملاءه يدخلوه لمستشفى المجانين !
الجواب الصادم في الجزء الثاني.

"ديرلي سيروم (Sérum) باش نوض على رجلي !" 💉😩
​شكون فينا ما سمعش هاد الجملة؟
واحد مريض، فاشل شوية، ولا عندو زكام خفيف...
تقولوا: "أشرب الدواء، أشرب الماء، وارتاح."
​يخزر فيك بنص عين ويقولك:
"لالا... الكاشيات (الأقراص) ما يديرو والو ! السيروم هو الصح... هو لي يوصل للدم ديريكت وهو لي يصحح !"
​بزاف ناس مقتنعين بلي هذيك القرعة تاع السيروم فيها "قوة سحرية" ⚡، وبلي الإبرة (البيكورة) هي الحل الوحيد باش يرجع "حصان".
وإذا ما دارش السيروم... يحس روحو ما داواش ڨاع.
​❓ بصح... واش كاين داخل هذاك "السيروم" بالصح؟
❓ هل هو "فيتامينات مركزة" وقوة خارقة؟
❓ ولا رانا نعالجو في "النفسية" برك، والجيب هو لي راه يخلص؟
​الحقيقة لي لازم يعرفها الجميع... باش نحبسو ما نثقبو في يدينا باطلاً.
نتلاقاو في الجزء الثاني !
​ #السيروم #الفشلة