Stylebity

بما أنه رمضان صايي راو على العتبة و إبتداءاً من يوم الإثنين بإذن الله رانا صايمين و ربي يتقبل منا و منكم صالح الأعمال إن شاء الله و ينعاد علينا بالخير و الصحة و البركات ..
رمضان هذا العام راني متمني فيه حاجة وحدة برک ، علابالنا بلي كاين بزاااف مسلسلات و برامج و عدة محتوى على السوشل ميديا ، خويا رمضان شهر العبادة و فرصة ذهبية مكش ضامن إذا راح تعاود جيک مرة أخرى أو لا حاول تستغل هذي الفرصة باش تصلح الخراب لي بينک و بين الله و تتقرب منو و تصلح قلبک و تعود روحک على لذة العبادات و أولهم الصلاة و قراءة القرآن و الذكر و كل حاجة فيها فضل كبير ، مالا من الأحسن أنک تتجنب تبع الصوالح هذو أصلاً و تركز على جوهر و قدسية و حرمة رمضان لي نعرفوها كامل و نعرفو درجتها عند ربي ، حتى و إذا حبيت تتفرج مسلسل ولا تبع أي حاجة خليها بينک و بين روحک و ما تنشرهاش و تقول تفاهة أو أي حاجة لأنو كامل الناس علابالها بلي تفاهة و أكثر منها فسق و سوء أخلاق و الكثير من الصفات الشنيعة ..
الإمام علي بن أبي طالب رضي الله عنه قال : " أميطوا الباطل بالسكوت عنه .. " معناها كي تهدر و تنشر عليه راک غير تزيد تروجلو فقط و تساهم في التوندوندس و الترند و الأشياء هذي ، العرب قديماً و حتى في الجاهلية كانوا كي يشوفو حاجة غريبة عليهم أو مبتدعة في أعرافهم تجاهلوها حتى تختفي وحدها ..

ما تخليش التافه يوصل وين حاب ..