Mahfoudi Mokhetaria

السلام عليكم زبوناتي و متتبعاتي الوفيات ❤️
اليوم لحق الموس للعظم😡 ماكنتش راح نجاوب بصح كل واحد يليق نوقفه عند حده
ليامات هادو راني نلاحظ في حملة تشويه وكلام فارغ من طرف بعض المنشورات مجهولة الهوية (Anonyme) في مجموعات فرندة، يحاولو يروجوا لإشاعات بلي "نغلي" ولا "ما نجاوبش". أنا عادتي ما نردش على هاد التفاهات، بصح كي تلحق لدرجة الكذب والافتراء وتغليط الناس، هنا لازم كل واحد يعرف حدّو.
أولا بخصوص الرسائل والردود
صفحة العمل والأنستغرام ورقم الهاتف هما الوسيلة الوحيدة والشرط الأساسي للحجز والاستفسار، وهناك نرد على كامل الزبونات بكل احترافية وفي أقرب وقت. الحساب الشخصي تاعي (Mokhetaria Mhd) راه من اسمه "شخصي" للعائلة والأصدقاء فقط، وماشي مخصص للعمل. كي تجيني رسالة فيه من بروفايل مجهول كاتبلي "سسسسس" ولا "سلام عليكم" بلا ما يعرف بنفسه ولا واش حاب، أكيد ماراحش نرد، ومن حقي الكامل ندير بلوك للحفاظ على خصوصيتي.
ثانياً بخصوص الأسعار والخدمة
الحمد لله، خدمتي وسلعتي يتكلموا عليا، والزبونات لي جربوا عندي يعرفوا المعاملة والنية لي نخدم بها. السعر دايما يكون متناسب مع جودة المواد لي نخدم بها والتعب لي نتعبو باش تخرج الزبونة راضية ومرفوعة الراس. لي يعجبها المكتوب وشافت الخدمة تستاهل مرحبا بها فوق الراس والعين، ولي تظهرلها غالية، السوق واسع وكل واحد يخدم بقد الميزانية والسلعة تاعه. المقارنات هادو لي راهم ينداروا في لي ستاتي المجهولين باين الهدف تعهم والغيرة لي وراهم.
نشكر بزاف كاع البنات والزبونات لي دافعوا عليا وحطوا كلمة حق في التعليقات❤️ ربي يحفظكم ليا. أما الفئة لي تضل مورا الشاشات وتحت اسم "مجهول" تحاول تكسر العباد، نقولكم: "القافلة تسير و... تـ*ـبح"، والنجاح والرزق بيد ربي سبحانو ماشي بيدكم الحمدلله