Dr.Aya Ziedan

المانجو 😍😋🥭


#تغذية

هل ممكن حد يموت لو أكل ويا ترى إمتى 🤔
طبعا فى حالات كتير ممكن يكون حد عنده حساسية من أكل معين أو لو عنده مرض معين واكل حاجة ممنوعة فحالته الصحية تدهور إنما اللى هنتكلم عنه النهارده حاجة مختلفة وبتحصل كتير وناس ممكن تموت ومش عارفين إن ده السبب

♦️واحدة ست مأكلتش لمدة ٣ ايام ولما أكلت ماتت

♦️بنوتة جميلة كانت عاوزة تخس ومشيت بنظام ديوتكس جيباه من على النت لمدة اسبوع بتشرب ديوتكس بس ومش بتاكل ولا حاجة وطبعا زهقت فراحت واكلة مرة واحدة وبسبب كده دخلت العناية

♦️راجل كبير كان عنده مشكلة صحية وخس بسببها ومكنش قادر ياكل لمدة ٥ ايام وأهله لقيوه بيخس قاموا مأكلينه وجبات كبيرة والراجل اتوفى ..

♦️بنوتة صغيرة عندها نحافة و عاوزة تتخن وهى مبتاكلش راحت جابت نظام غذائى من على النت برضه وأخدت كمية الاكل الكبيرة مرة واحدة وراحت فيها..

الحالات دى كلها حقيقية وبنشوف زيها كتير فى العناية المركزة وبقولهالكوا علشان تاخدوا بالكوا ومتقعوش فى نفس الأخطاء ..
🔹طب نفهم مع بعض بقى إيه اللى بيحصل للناس دى
المشكلة دى اسمها متلازمة إعادة التغذية او الإفراط فى التغذية ( over feeding أو Refeeding syndrome)
بتحصل امتى لما يكون الجسم فى حالة مجاعة ( سواء انت اللى مجوع نفسك علشان الدايت أو بسبب مشكلة صحية فمش قادر تاكل أو مشكلة إقتصادية زى البلاد اللى بيكون فيها مجاعات )

⬅️ الجسم فى وقت المجاعة بيبذل كل طاقته علشان يخليك على قيد الحياة بيعمل توازن لكل المعادن اللى فى جسمك وبينتج طاقة تشغل أجهزة جسمك علشان تعيش فلما حضرتك تروح تاكل مرة واحدة الجسم بيدخل فى حالة صدمة فبيقف عن انتاج الطاقة لأن الأكل علشان يتهضم بيحتاج طاقة وهو يعينى شوية الطاقة اللى حيلته معيشك بيهم بالعافية فبيحصل مضاعفات خطيرة فى الدماغ والقلب والكلى ممكن توصل للوفاة ...

🔸طيب الحالة دى لو حصلت أعراضها إيه ونعمل إيه ؟
ضعف عام - مشاكل في التنفس - غثيان أو ترجيع - ألم في البطن - هبوط ضغط الدم - ارتفاع مستويات سكر الدم - اضطرابات في نبض القلب - احتباس السوائل .

👈🏻وفى الحالة دى لازم تروح أقرب مستشفى يكون متوافر فيها عناية مركزة

🔸نعمل ايه علشان نتفادى المشكلة دى 🤔
لو مش بتاكل بقالك فترة لأى سبب من الاسباب أو زى الحالات اللى ذكرناها فوق👆🏻
◾لما تيجى تاكل كل بالتدريج وزود بالتدريج يعنى لو كنت بتاكل ربع رغيف خليه نص ومتبدأش مرة واحدة برغيفين !
◾تتابع مع حد متخصص يحسبلك تاخد أد إيه بالظبط فى الحالة دى وياريت برضه نركز مع الناس الكبيرة واللى بيكون السبب عندها مشكلة صحية .
و دمتم بخير 💜🌸