TED Titans

🎓 ها قد أشرقت شمس يومٍ جديدٍ يحمل معه ثمرة الجد والاجتهاد.
اليوم نحتفي بخريجينا الذين خطّوا طريقهم بالعلم، وصبروا حتى نالوا شرف التخرج.

إنها لحظة فخرٍ واعتزاز، وبدايةُ رحلةٍ جديدةٍ نحو المستقبل، تصنعون فيها بصماتكم، وتكتبون فيها قصصكم المضيئة.

مباركٌ لكم هذا الإنجاز العظيم، وعقبال ما تصنعون للأمة مجدًا ورفعة.

✨ تخرج اليوم... بداية الغد المشرق.

السلام عليكم، معاكم TED titans, أسرة قسم غزل و نسيج
حابين نديكم شوية نصائح عملية لفترة الكلية بشكل عام أياً يكن القسم الي حتكملوا فيه:

١- إحنا مش بندخل أي مجال دراسي ب "صك" أو "وثيقة" مكتوب فيها اننا بعد ما ناخد البكالوريوس حنشتغل الشغلانة الفلانية بالمرتب الفلاني. موضوع الشغل على قد ما هو مهم على قد ما حيأثر عليه متغيرات كتيييييييير أوي، سواءً حصلت جوة الكلية أو براها. فبراحة كدة و اهدى و أنت بتفكر، زي ما أنت حاطت عينك على هدف معين و ماشي اتجاهه، وارد الهدف دة يتغير، عادي خلي عندك مرونة في تقبل كدة، و متنساش تبص تحت رجليك من وقت للتاني و أنت ماشي، عشان متتكعبلش و تقع تتعور و تتعطل.

٢- في ناس كفاية أوي بالنسبة لها دافع إن المجال الدراسي بتاعها تكون فيه اشغال مجزية ماديا، و في ناس بتحتاج احساس بالانجاز و انها بتعمل حاجة حقيقية و بتقدم خدمة او بتصنع منتج ملموس عشان يبقى عندهم الدافع انهم يمشوا في الدراسة بصعوبتها و تحدياتها ثم يطلعوا لمجال العمل يتميزوا فيه. النوعين محدش فيهم غلطان و لا حد أحسن من التاني، طبيعي دوافعنا تكون مختفلة نوعاً و كيفاً، ركز بس في الي بيحركك من جوة و متقلقش، حتى الشاطر و المتميز في مجال مش معروف أوي أفضل حالاً مادياً و معنوياً من طالب هندسة تايه و مش عارف هو عايز إيه.

٣-" التجربة " حتما و دائما حتكون فردية. أنا مش أنت و أنت مش أنا، محدش فينا بيبص للحاجة بنفس العين، بالتالي مهما اتنصحت و اتوجهت في الكلية بالذات، متنساش تقيف النصيحة على ظروفك و احتياجاتك و ميولك، و متنساش: متسألش حد عن الطريق لمكان مراحهوش قبل كدة، بمعنى لما يبقى عندك تجربة و محتاج نصيحة، دور على اقرب حد شبهك في الشخصية، و حاولوا تسندوا بعض، متجلدش ذاتك مع حد مختلف عنك تماما لمجرد انكم محطوطين في نفس المركب، شوف ركاب تانيين.

٤- انت مش شايف الصورة بالكامل، و محدش يعرف عنك الا الجزء الظاهر، بالتالي زي ما أنت متحبش يتحكم عليك باحكام تكون غلط، متحكمش على حد بتسرع في مواقف ممكن تكون متعرفش عنها حاجة اصلا.

٥- لو حسيت الي حواليك بيتكلموا عن الشغل او الامتحانات او الدرجات بشكل زايد مخليك متوتر، انفصل عنهم شوية لأنه ببساطة طبيعي بيئة زي دي توترك، خاصة لو عندك ضغوطات شخصية مخلياك بالفعل مستنزف نفسيا، زي ما قلنا شوف حد عنده اهتمامات شبهك خارج حدود اسوار الكلية، تفصلوا بيها سوا، أو حتى أفصل أنت لوحدك، دة حقك.

٦- نظم مجهودك، الوقت أنت متقدرش تتحكم فيه زي ما أنت فاكر، طبيعي حيحصل شقلبظات كتير جوة الكلية و براها تبوظ اي مخطط انت عامله بناءً على الوقت، بالتالي نظم مجهودك بحيث انه الاوقات الي تقدر فيها تدي اعمل فيها التاسكات الصعبة، و الاوقات الي طاقتك فيها اقل اعمل فيها تاسكات اقل صعوبة، و هكذا. و متنساش تحط لنفسك اوقات سماحية عشان متزنقش نفسك قي مذاكرة او تسليمات و يحصل في آخر لحظة حاجة متخلكش تقدر تسلم أو تذاكر، و متنساش زي ما قلنا تفصل شوية من فترة للتانية.

٧- جيب المادة من الآخر: المواد عندنا كتيرة و فيها شغل كتير، و على قد ما مزعج انك تخش صرح علمي عظيم لكن ميكونش عندك وقت و لا جهد تستكشف بحر العلم دة كما ينبغي، على قد ما مهم جدا تقدر الحاجة بحجمها و تتعلم مهارات "انك تجيب من الآخر" عشان تبقى مهندس شاطر مستقبلاً. في مواد حلها إنك تذاكر امتحاناتها، بمعنى انك بعد ما تفهم الافكار الرئيسية و الاساسية تشوف الاسألة بتاعتها في الامتحانات بتيجي ازاي و ازاي تعرف من الافكار دي يتكون حلول للأسألة دي، خاصة ان بعض الاقسام فيها مواد بتكون امثلة محاضرتها بدائية و اسألة امتحاناتها متقدمة.

٨-لاقي الاتزان بين مبدأين: " لو أن الناس كلما استصعبوا أمراً تركوه ما قام للناس دنيا و لا دين " و " اعتزل ما يؤذيك ":
طبيعة الدراسة و بداية فترة العشرينات انك حتواجه تحديات كتير و في منهم الصعب، بس نستعين بالله و واحدة واحدة الصعب يبقى مقدور عليه، لكن لو بقى الصعب بالنسبة لنا "مؤذي" ، فهنا لازم يكون في وقفة طويلة و صريحة جدا مع النفس، عشان حقيقة لا تقبل النقاش، انه الدراسة لا يمكن تكون مؤذية.
لو وصلت لا قدر الله لكدة، اسأل نفسك بصراحة:
هو انا حاسس كدة ليه؟
هل انا كنت بقدر نفسي بدرجاتي و بس و نسيت اني بني آدم عندي جوانب تانية غير الدراسة؟
هو في حد مضايقني؟ مين و ليه؟ طب ممكن اتجنبه و المشكلة تتحل و لا محتاج حل أعمق؟
هو أنا في المكان الصح؟
طب هو أنا دخلت ادرس هنا ليه؟
هو أنا عندي مشاكل مأثرة عليا و محتاج أحلها ؟
هل محتاج آخد بريك أراجع فيه نفسي؟
هل محتاج اتكلم مع متخصص؟
هل محتاج اغير طريقة معيشتي او ابعد عن ناس معينة؟
في الواقع احنا بنرجو محدش يقع في الحتة دي خلال فترة دراسته، لكن عشان طبيعة دراسة الكلية متطلبة و ضاغطة، سهل جدا لو في استعدادات صادرة عن مشاكل شخصية او طريقة تفكير سامة اكتسبتها سواءً خلال التربية او من المجتمع، تظهر مشاكل كتير متلاقيش ليها تفسير غير انك محتاج تصلح شوية شروخ كنت فاكر انك تقدر تعيش بيها عادي.

في النهاية، نأسف على الاطالة، احنا حبينا نفيدكم على قد ما نقدر عشان طبيعي مرينا بمواقف و تجارب عايزنكم متمروش بيها او تبقوا عارفين تتصرفوا ازاي، لكن في الأول و في الآخر الشيء الوحيد الي نقدر نتحكم بيه هو التنويه و التبليغ، فاللهم بلغنا، اللهم فاشهد.

إحنا مين؟
إحنا أسرة TED Titans: أسرة قسم غزل و نسيج
بنرحب بيكم, و حابين تعرفوا عنا نبذة سريعة:

- الأسرة بتشارك في فعاليات داخلية بتساعد الطلبة و بتدي روح جميلة, زي إيفينت استقبال الطلبة الداخلي للقسم و فعاليات مختلفة عن التطورات الأخيرة في المجال و أفطار رمضان السنوي و إحتفالية ذكرى تأسيس القسم.
- بنشارك اتحاد الطلبة في فعاليات كبيرة زي يوم كن رفيقي و حملة التبرع بالدم.
- بنحرص على التواجد الطلابي للقسم في عدة نواحي من الحياة الجامعية, مع ابقاء المصلحة الدراسية في المقام الاول للطلبة المشاركين بالعمل التطوعي في الأسرة.

حابين نقابلكم بكرة عشان نعرفكم و تعرفونا أكتر!

'25
'25