Ultra Technology

ازاي تكمل كورسOnline للـ آخر ؟ ^_^
قبل ما تعرف ازاي تكمل كورس اونلاين لآخره، لازم تعرف انك مش لوحدك ^_^ .. وان دي مشكلة عالمية في نظام التعليم الاونلاين ان نسبة كبيرة مش بتكمل الكورس لآخره، وفي أحسن الظروف النسبة بتوصل من 10 ل 15 % ..
مصريًا بقى ..
في دراسة عملها طلاب من كليات الطب في مصر عن استخدام طلاب الطب للكورسات الاونلاين، من بين 2106 طالب جاوبوا ع الاستبيان، 456 طالب سمعوا مصطلح MOOC وعارفينه قبل كدا، منهم 136 طالب انضموا لكورس اونلاين واحد على الاقل سابقًا، منهم 25 طالب فقط اللى أنهوا كورس وحصلوا على شهادة :"D فالموضوع مشكلة حقيقية.. هنا بقى لزتونة اللى هتساعدك عشان تكمل كورس للآخر..
1 - حدد الاول انت عايز تتعلم ايه، ويا سلام لو اللى هتحدده دا هيكون مفيد ليك سواء في مجال دراستك اللى بتحبها، او شغلك او اي شكل من اشكال الافادة.. اكتب كل الحاجات في ورقة ورتبها حسب الاهمية والاولوية..
2 - ابحث عن الكورسات اللى انت محددها مسبقًا في خطوة 1، عشان لو دخلت على موقع زي كورسيرا او ايدكس وانت مش محدد انت عايز تتعلم ايه بالظبط هتلاقي نفسك فجأة انضميت لخمس ست كورسات وطبعا مش هتكمل اي حاجة فيهم..
3 - شوف الفيديو التعريفي بالكورس، والوصف بتاعه، والمنهج اللى هيتشرح، ومين المحاضرين، واسم الجامعة.. بعد ما تشوف الكلام دا كله حدد بقى اذا كان الكورس دا على قدر توقعاتك للي عايز تتعلمه ولا لا.. جمع كل الكورسات بالمحتويات بتاعتها في ورقة محترمة كدا عشان تفاضل بينهم...
4 - متنضمش لكورس بشكل مباشر من عنوانه او وصفه! اصبر على نفسك يومين تلاتة كدا وقارن بين كل الكورسات المتاحة حسب المنهج بتاع كل كورس، وشوف الانسب ليك وبعدين قرر هتنضم لأيهم..
5 - أحيانا في كورسات بيبقى ليها متطلبات ودراسة سابقة وبيبقى متوضح دا في وصف الكورس. لو لقيت حاجة بالشكل دا يبقى الاول تتعلم وتوفر متطلبات الكورس وبعد كدا تنضم ليه، هما مش بيبقوا كاتبين الكلام دا منظرة يعني :"D.
6 - ادرس الكورس مع مجموعة من اصحابك، سواء بقى اصحاب في الحياة الواقعية او الافتراضية عشان تحمسوا بعض انكم تكملوا الكورس وتتناقشوا في محتويات المنهج اللي بتتعلموه..
7 - التخطيييط: مينفعش تسيب الموضوع عشوائي.. اعمل خطة محترمة كدا وجدول تمشي عليه بشكل ثابت كأنك رايح الجامعة بالظبط.. يعني مثلا يوم الجمعة من الساعة 7 للساعة 9 هتكون بتشوف كورس اونلاين وبتذاكر ليه عشان خلال خمس اسابيع تكون أنهيت الكورس مثلًا. مينفعش تسيب الموضوع عشوائي كدا وتقول انا فاضي النهاردة خمس دقايق اما ادخل اخطف فيديو ع السريع :"D.
8 - صفحات النقاش، والاسئلة، والامتحانات مش محطوطة غتاتة كدا بدون سبب والله! ابسلوتلي.. لازم تشارك في النقاشات، اطرح اسئلة، جاوب على اسئلة غيرك، حل الاختبارات، سلم مشاريع، شوف المشاريع اللى زمايلك بيسلموها...الخ دا هيخليك تلتزم شويتين تلاتة..
9 - خليك على تواصل مستمر مع زمايلك اللى بيدرسوا الكورس، والمحاضرين وفريق العمل وحاول تكون علاقات من الكورس دا على قد ما تقدر...
10 - حاول تعلم كل اللي هتتعلمه في الكورس للناس سواء بقى هتعلمه لزمايلك، جمهور عام، هتنشر بوستات عن كل محاضرة، هتعمل مدونة تحط عليها تلخيصات.. الخ.. افضل طرق التعلم على الاطلاق هي انك تعلم الناس الحاجة اللى انت بتتعلمها..
11 - أثناء الوقت اللى انت مخصصه للتعلم الاونلاين، اقفل كل وسائل ومواقع التواصل الاجتماعي وتجنب اي حاجة ممكن تشتتك.. وعشان انت مش هتقدر تعمل كدا ممكن تستخدم ادوات زي Stayfocused، self control وغيرهم..
12 - سجل ملاحظات أثناء مشاهدة الفيديوهات، وأفضل طرق تسجيل الملاحظات هي Cornell system، ابحثوا عنها على جوجل هتعرفوا بتتعمل ازاي، وممكن تستخدموها بردو في تسجيل المحاضرات في الكلية ورا الدكاترة...
لو عملت الحاجات دي فانت بنسبة كبيرة ان شاء الله هتضمن انك هتكمل الكورس لحد آخره وتحصل على شهادة، وخليك فاكر ان الموضوع كله شخصي أولًا وأخيرًا انت المتحكم الوحيد في مقدار تقدمك في عملية التعلم، عشان كدا لازم تكون حريص جدا انك تختار حاجة بتحبها او مفيدة ليك عشان تزود من قابليتك لإنهائها