Relationship coach - Heba Bahaa

🌷 مرحلة منتصف العمر

‏الاتجاه في المرحلة دي بيبقى رايح ناحية الانبساط والاستمتاع ليا أنا …عايز او عايزة افكر في نفسي و احقق اللي فاتني لأن المراحل اللي فاتت كانت لأي حد غيري زي اولادي بيتي شغلي جيرانى …

و ‏هتلاقي الراجل فجأه يبقى عايز يشتري العربية الغالية او الموبايلات او البراندات او موتوسيكل 😉، عايز يحس انة شباب و يعوض السنين اللي فاتتة و هو مشغول في الشغل و الجواز و الاولاد و يحن لأيام المراهقة و شقاوتها أو يبدأ ينزل يقعد على القهوة مع أصحابه بتوع زمان ، عايز يتعلم هواية جديدة او يرجع لهواية قديمة نسيها .
الزوجة هنا ساعات بتتخض و تحس ان في حاجة غلط او ان جوزها شايفلة شوفة او هيبيع القضية و الحقيقية انها اعراض او افكار طبيبعية للمرحلة دي بس هي مختلفة عن افكارها كست و متخوفش ولا حاجة ولكن بالعكس هي هنا محتاجة تفهم لو لية بيفكر كدة و ازاي تتعامل مع المرحلة دي صح و تدعمة عشان يعدوا بسلام و تكون المرحلة دي سبب لنضج علاقتهم و تقويتها .
‏
وتلاقي بقى الست بتقول لنفسها خلاص كفاية كده أنا عايزة أعيش لنفسي لأن طول عمري عايشة لغيري 🥺
‏ أو تبدأ تخس وتروح الجيم أو ترجع لأصحابها بتوع زمان او تأخذ كورسات او تعمل ليزر وصبغة .

كل دي اعراض طبيعية للمرحلة دي ، المهم اننا نفهم نفسنا و ازواجنا في المرحلة دي و نعرف احتيجاتنا و مشاعرنا و افكارنا و نتعامل معاها صح .

لو حابة تعرفي اكتر عن نفسك و عن جوزك لو متجوزة في المرحلة دي و ازاي تمروا بيها بسلام و تكون سبب في تقوية علاقتكم ببعض و انضمي لورشة
" منتصف العمر و حلاوتة "

هيقدمها هبة بهاء و اسراء عبد الرحمن

الورشة يوم الاتنين ١٢ فبراير او السبت ٢٤ فبراير

للاستفسار و الحجز التواصل علي رقم +201066732137

ازاي نتعامل مع الناس اللي بتسبب لنا ضغط او أذية ؟؟ 🤔

ورقة و قلم و اكتبي ورايا يا ست الكل 😊

في ٣ طرق ممكن نتعامل بيهم بنختار الطريقة حسب نوع الضغط او الأذية و حسب جاية من مين و احنا نقدر نعمل اية

طبعا لو في ناس في حياتنا بتضغط علينا أو بتأذيني و ينفع نبعد عنهم أو نخرجهم من حياتنا يبقي فل الفل و اجرى يا مجدي 🏃🏃‍♀️

انما لو الناس دي موجودة في حياتنا و مش هنعرف نخرجهم يبقي حل من ٣ :

١- التجنب
نتجنب الاشخاص ، المواقف ، الاماكن او التجمعات اللي بيكون إحتمال الضغط او الأذية تحصل فيها قدر المستطاع

٢- التغيير
تغيير في شكل العلاقة بوضع حدود جديدة مثل طلب تغيير طريقة الكلام او المعاملة بطريقة حازمة و اظهار الرفض
تغيير رد الفعل المعتاد لرد فعل هادئ و حكيم ( و دا بيكون محتاج تحضير مسبق للموقف )
تغيير نظرتنا للأمور يعني نتاكد اننا مش شايفن الموضوع غلط او ان الطريقة دي معايا لوحدي و لا مع الكل لان ممكن انا اكون شايفة غلط

٣- التقبل
الطريقة دي غالبا مع الناس القريبة اللي مقدرش أبعد عنهم او اتجنبهم ولا حتي أغير طريقتي معاهم او احط حدود

بنحاول نوجد معني سامي او حكمة لوجودهم في حياتنا يعني مثلا ممكن نتقبل وجودهم في حياتنا علي انة ابتلاء و اختبار من ربنا لو صبرنا علية نثاب و نؤجر
ممكن نتقبل ان وجودهم هيخلينا نشوف عيوبنا او أخطائنا و نحسن من نفسنا
نتقبل ان مش كل الناس لازم تحبنا و تشوفنا كويسين و ترضي عننا
نتقبل اننا لازم نتعلم نحط حدود لنفسنا و ننقي الناس اللي هندخلها حياتنا
و بيساعد اوي في الخطوة دي اننا نتكلم مع حد حكيم عاقل ونحكيلة كمحاولة لتفريغ مشاعرنا السيئة و بأكد علي حد حكيم و عاقل عشان يهدينا فعلا .

سؤال بتسألة كتير اوي
هو لية انا بجذب ناس مش كويس ؟
لية انا مغنطيس لناس غريبة لية ؟

تعالوا نتفق علي حاجتين الاول :

*اولا : كل واحد بيجذب ناس كويسة و ناس مش كويسة ، بنرفض ناس و بنقبل ناس ، احنا اللى بنفتح الباب و ندخل الناس دي حياتنا
يعني الموضوع باختيارنا مش قدر ولا مغنطيس و لا حاجة و بالتالي احنا بنختار غلط
فالحقيقة ان اختياراتنا هي اللي ملخبطة حياتنا .

*تاتي حاجة : اسمها حد مناسب و حد مش مناسب مش وحش او حلو ، مناسب لافكاري ،لقيمي ، لديني ، اخلاقي ، عاداتي ، تقاليدي ، عائلتي ، اعتقداتي و اسلوب حياتي ، الوحش ليا هو حلو اوي لغيري .

تعالوا بقة نشوف احنا لية ممكن نفتح الباب و نقبل الناس الغلط في حياتنا :

١- ساعات بنختار الناس اللي بيكون فيها شبة في صفاتهم من صورة ذهنية في عقلنا عن الناس اللي كانوا بيدونا الاهتمام و الحب و الرعاية و احنا صغيريين زي ماما ، بابا ،تيتة ،جدو و الصورة دي مش بتكون لشخص معين هي خلطة من الناس دي و كل ما الشبهة يكون اقوي كل ما بيعجبونا اكتر ، و هنا اللي بيختار عقلنا اللاواعي .

٢- عارفين الفرق لما ننزل نشتري عربية عشوائي و مش محددين طلبات او مواصفات معينة فنختار اي عربية يكون شكلها حلو او بيقولوا حلوة فنشتريها و يا تطلع مناسبة ليا و مريحاني او لاء و الفرق لما اروح اشتري عربية و انا محدد مواصفاتها ، لونها .....
اكيد هتفرق
نفس الكلام لما اكون عارف نفسي كويس و عارف اية المناسب ليا و اللي محتاجة في الشريك عيني مش هتلقط غير اللي فية المواصفات دي ......هنا بقي العقل الواعي هو اللي هيختار

٣-معرفتي هو انا استحق اية ، لو متاح ليا كل حاجة هختار لنفسي اية ، اي حاجة و السلام و ارضي بقليلي ولا انا استحق احسن حاجة و دي ساعات بتجي من التربية واحنا صغيرين كان بيتقال لنا اية علي نفسنا ، هتقعد في ارابيزنا و مش هنلاقي حد يتجوزها ولا بيتقال انتي تستاهلي احسن واحد في الدنيا .
يا ريت اللي عندهم اطفال صغيرين يخلوا بالهم من الحتة دي.

٤- نظرية بقة ان الgood boy المحترم دة ممل ومش لطيف و هيبقي مقفل و مش ملحلح ( بتقولوا كدة والله ) ، انما ال bad boy دة حلو و لطيف و الموضوع في اثارة و challange كدة حلو .

و طبعا دي مش كل الاسباب

بس حقيقي اكتر حاجة بتفرق هي اننا نكون عارفين نفسنا كويس و عارفين المناسب لنا و حاطين معايير مظبوطة ،كدة عنينا مش هتلقط غير المناسب و مش هنسمح بدخول اي حد في حياتنا .

طولت عليكم ؟ قولولي طولت

يمكن تفرق