Awj Advertising

إزاي تكتب Prompt لتوليد صور بالـ AI؟ 🤔
بصوا، متكبّروش الموضوع 😅، عشان الذكاء الاصطناعي هدفه إنه يفهم انت عايز إيه بالظبط ويعمله، مش محتاج غير شوية إنجليزي وبس، ده مش كود مثلا وليه قواعد ورموز وكده، والموضوع ده بيتطور يوم عن يوم وقدرة الذكاء الاصطناعي على فهم الـ prompt والالتزام بيه بتزيد.
بس لو عايزين تكبّروا الموضوع وماله؟ من عينيا 😅
بص يا سيدي...

أنا عن نفسي ببدأ الأول بنوع القطع، يعني إيه قطع؟ يعني حجمك في الكادر، يعني قربك من الكاميرا، يعني الكادر فيه منك من فين لفين
مثلا Close-up shot يعني صورة مقربة وعندك medium shot يعني متوسط، لحد صدرك مثلا أو بطنك، وعندك long shot or full body shot يعني صورة بعيدة مبينة جسمك كله، ولو عايز تتأكد من ان جسمك كله من راسك لرجليك هيطلعوا في الكادر ابقى اوصفله الحذاء بتاعك ;) ساعتها غصب عنه هيجيبك لحد رجليك 😁
وفيه قطعات كتير تانية زي American shot أو cowboy shot وده معتقدش ان الـ AI يفهمه قوي لإنه مصطلح سينمائي وده شوط لحد بعد ركبتك كده بحاجة بسيطة واتسمى كده عشان أفلام الكاوبوي بتستخدمه كتير فممكن تقوله مثلا knee level shot
طب الزاوية؟
عندك إنك تقول المستوى زي Eye Level Shot أو Shoulder Level Shot أو Ground Level Shot، ممكن بشكل تاني high \ low angle shot لو زاوية التصوير من فوق او من تحت إلخ
لو صورة فتوجرافية قوله مثلا infocus عشان يزغلل الخلفية لو عايز التأثير ده، ولو فاهم تصوير ممكن تقوله نوع العدسة كمان! يعني fish eye lens أو 50mm lens إلخ
وكمان زاوية الشخص نفسه مش بس زاوية الكاميرا، عايزه يبان من الجنب ولا وشه للكاميرا ولا قفاه للكاميرا الخ فتكتب front view \ back view \ side view وهكذا
في نفس الوقت بتقوله الستايل مع الشوت، عايزه cinematic \ realistic - hyper realistic \ 3D Pixar style \ Anime style \ comic \ hand drawing \ oil painting وهكذا، يعني عايز صورة واقعية ولا كارتون 3D ولا أنيمي ولا كإنها صفحة من كوميكس ولا لوحة مرسومة بالزيت إلخ
أما بقى لو عايز صورة تبان عفوية ومش متصورة في ستوديو ولا بتلمع كده اكتبله Amateur Shot أو selfie ;) ساعتها هيطلع الصورة كإنها متصورة بكاميرا موبايل وبشكل عفوي مش في ستوديو ولا من فوتوسيشن.
خلصنا من الستايل والقطع؟

نخش على العنصر الأساسي، الـ person أو الـ object
اوصفه هو نفسه (اوصف نوعه وسنه وشكله وبعدين أوصف لبسه واكتب كل التفاصيل اللي عايزها، قصة الشعر، النضارة مثلا، اللحية، الكوفية، لابس بدلة ولا كاجوال؟ و و و)
وبعد كده اوصف الشخص ده "بيعمل إيه" وماتنساش توصف شعوره (مبتسم، حزين، غضبان إلخ)، واقف ولا بيجري ولا قاعد ولا ماسك حاجة؟ إلخ.

نخش على الإضاءة، اوصفها، مثلا sun light أو professional studio lighting أو low key light أو moon light وبالمرة اوصف زي سيناريو الأفلام كده: نهار خارجي، ليل داخلي إلخ

مادام دخلنا على اللوكيشن بقى اوصفه هو كمان
واختم بالخلفية ولو عايزها فاضية اكتب مثلا simple white background هيعملك خلفية بيضاء فاضية.

✅الخلاصة :-
نوع القطع - الستايل - وصف العنصر الأساسي وبيعمل ايه - الإضاءة واللوكيشن والخلفية.

وأوصف العناصر من قدام لورا بالنسبة للكاميرا كإنها ليارات كده مترتبة.

ومش لازم تلتزم بالترتيب ده أساسا، فيه ناس بتكتب الستايل في الآخر عادي جدا، بس الترتيب السليم المنطقي بيطلّع نتائح أفضل وبيكون بالنسبالك انت نفسك أسهل في الكتابة لإنه مترتب ومُنسّق كده، فلو هتكتب prompt طويل جدا مثلا ماتتوهش فيه، انت خلاص حافظ إيه فين، عايز تغيّر حاجة في اللبس هتيجي للجزء بتاع الهدوم تعدل فيه لإنه مكتوب على بعضه مش متنطور كل كلمة في ناحية. عايز تغير الخلفية أديك عارف مكانها في نهاية الـ prompt، عايز تغير القطع أديك عارف إنه في البداية إلخ.

لو انت بقى مكسّل تكتب كل ده ممكن تستعين بـ chatGPT أو DeepSeek وتطلب منه يكتبلك prompt للي انت عايزه، هتلاقيه بيجوّد ويزود تفاصيل من عنده 😆
منقول للاستفادة

وده الـ prompt بتاع الصورة اللي في البوست ده كمثال:-

in focus hyper realistic professional fashion photography medium side view shot of a young handsome smiling man with sunglasses in a gray modern suite, white shirt, red tie and wrist watch, arms crossed, looking up, confident pose, professional studio lighting with strong rim light, simple dark background