Sijil

مهام كتير في مجال الرعاية الصحية تكرارية، وبتستهلك أوقات طويلة، ومجهود كبير لكن عن طريق الذكاء الاصطناعي المهام دي بقت بيتم عملها بشكل أوتوماتيكي، وبدون اي تدخل بشري عشان الأطباء، والإداريين في المؤسسات الصحية يكون عندهم وقت أكتر لعمل المهام الضرورية، والمهمة.

تطوير، وصناعة الأدوية كان بيتم عن طريق تحديد الباحثين للبروتين المسبب للمرض، وده كان بياخد وقت طويل جدا عشان يتم تحديده بدقة، ولتقليل احتمالية صرف مبالغ ضخمة على البروتين الغلط.

بعد كده بيبدأ البحث عن جزيء، أو مركب يقدر يأثر على البروتين ده، وبيتم اختبار عدد كبير جدا من المركبات، وجزء كبير منها بيكون غير فعال، والعملية دي بتستهلك وقت، ومجهود كبير جدا، وهنا يجي دور الذكاء الاصطناعي.

فالعلماء في البداية بيحددوا مجموعة خصائص مميزة هتكون في المركب المناسب لعلاج المرض، وبيقوم الذكاء الاصطناعي بمقارنة مئات، والاف المركبات بالخصائص دي لحد ما يوصل للمركب المناسب، والفعال، والأمن.

مع تطور التكنولوجيا بقي اسهل كتير متابعة، وتسجيل العلامات الحيوية للمرضى سواء عن طريق أجهزة مخصص لمتابعتها، أو حتى عن طريق الموبايلات، أو الساعات الذكية.

سواء ضغط الدم، أو مستوي الاكسجين، أو معدل نبضات القلب، وغيرهم بقي بيتسجل بكل سهولة، ويقدر الدكتور يشوفه، ويتابعه، وهو في مكانه، ومن غير ما يشوف المريض حتى، وده اللي بيساعد الدكاترة انهم ياخدوا بالهم من اي مشاكل حاصله بدري، وبيخلي احتمالية انهم يلحقوها أكبر.