SimbaTech

لحد اللحظة دي اتكلم عن أو شارك في الحملة ما شاء الله عدد كبير من الناس، على الأقل ٤ قنوات مصرية، ٣ صفحات مصرية، ٢ صناع محتوى عرب خارج مصر، و ٤ قنوات أجنبية كلهم فوق المليون مشترك .. بقول على الأقل لأن ممكن يكون فيه اكتر بس مشوفتش غصب عني.

بعد فيديو Linus Tech Tips امبارح دخل مئات من الاجانب في الهاشتاج على تويتر، و أثناء اللايف نفسه كان رد فعل الأجانب تجاهنا فعلا رهيب، كل رسالة في اليوتيوب شات من ١٧ ألف متفرج وقتها كانوا مصدومين من اللي بيحصل و بيساندونا بكل قوتهم، الموضوع بيتكلموا عنه على تويتر و ريديت و فيسبوك .. و بعدها دخلوا على قناتنا يكتبوا تعليقات بالدعم على كذا فيديو حتى برغم انهم مش فاهمين اللغة، الكومنت اللي في الصورة عينة بسيطة من الموضوع ..

لما Linus جه يختم كلامه عن الحملة قال حاجة مهمة اوي، افضل طريقة لدعم الحملة دي و استمرارها هي ان الهاشتاج يتكتب على تويتر و يستمر، دي لعبة بقاء .. حسب كلام Gamers Nexus على تويتر فهما كانوا بيعانوا من نفس المشكلة يوما ما في أمريكا الشمالية، و أخدوا وقت على ما قدروا يسطروا قواعد جديدة محترمة لمجتمع الهاردوير، ان شاء الله الموضوع هينجح و البدارات الحلوة كتير بس لازم نكمل بقوة على تويتر، الهاشتاج دلوقتي بيعمل من ٢٥٠ ل ٣٠٠ تويت في اليوم، دا عدد رهيب بس عشان يسمع اكتر لازم نعلى عن ال ١٠٠٠، رقم صعب بس مش مستحيل على المجتمع الرهيب بتاعنا.

حاجة أخيرة: وصلي كذا سكرين شوت من قنوات او صفحات لزملاء في المجال من الوطن العربي (خارج مصر) و هما ماسحين الهاشتاج بعد ما كتبوه أو لما بييجي ذكر الحملة بيتفادوا الكلام عنها: ردي على الموضوع اننا منعرفش ظروف الناس و الله أعلم مدى الضغط اللي عليهم أو اذا كان فيه عقود تمنعهم من المشاركة لتجنب تعارض المصالح، كل واحد حر بس لو انت ممتنع لمجرد انك خايف فأحب أقولك متقلقش، العدد المشارك كبير جدا و الموضوع أصبح على مرأى و مسمع من الجميع..

ان شاء الله نعمل تغيير كبير 😍بالنسبة للفيديوهات العادية بتاعتنا بقا انا مجهز حاليا كذا فيديو (٦ بالعدد) بس مستني أخف من دور البرد دا عشان أعرف أصوّر 😅